“Dayawek ti Nagpaiduma a Determinasionna”

NI GÜNTER GRASS ket maysa nga Aleman nga autor. Nangabak iti Nobel Prize for Literature idi 1999 ket idi 2006, impablaakna ti libro a mangisalsalaysay iti pakasaritaan ti biagna. Iti dayta a libro, dineskribirna ti kasasaad idi isu ket napaayaban tapno agserbi iti civil defense ti Alemania. Iti dayta met la a libro, nadakamatna ti maysa a lalaki a malaglagipna pay laeng uray no nasurok nga 60 a tawenen ti napalabas. Maysa dayta a lalaki a di nangtallikud iti pammatina iti sidong ti pannakaidadanes.

Iti maysa nga interbiu nga impablaak ti periodiko a Frankfurter Allgemeine Zeitung, kinuna ni Grass a dayta a naisangsangayan a lalaki ket nagkitakit nga agsoldado ken “dina sinuportaran ti aniaman kadagiti nalatak idi nga ideolohia dagiti Nazi, Komunista, wenno Sosialista gapu ta isu ket maysa kadagiti Saksi ni Jehova.” Saan a malagip ni Grass ti nagan dayta a Saksi a binirngasanna iti Wirtunsowasnicht (Dimi Ar-aramiden Dagita). Dayta a birngas ket nainaig iti panagkedked dagiti Saksi ni Jehova a makipaset kadagiti aramid a konektado iti militar. Idi sinukimat dagiti Saksi ni Jehova ti maipapan iti dayta a lalaki, naammuanda a dayta ket ni Joachim Alfermann. Namin-adu a nakabkabil ken naibabain, ket idi agangay, isu ket naibalud nga agmaymaysa ngem nagtalinaed latta a nasungdo ken nagkitakit nga agsoldado.

“Dayawek ti nagpaiduma a determinasionna,” insurat ni Grass. “Pinampanunotko: Kasano ngata a naanduranna amin dagita?” Kalpasan ti panangibturna kadagiti napaut a panagregget a mangdadael iti kinatarnawna iti Dios, ni Alfermann ket nayakar idi agangay iti kampo konsentrasion ti Stutthof idi Pebrero 1944 ken nawayawayaan idi Abril 1945. Nalasatanna ti gubat, ken nagtalinaed a nasungdo a Saksi ni Jehova agingga iti ipapatayna idi 1998.

Ni Alfermann ket maysa kadagiti agarup 13,400 a Saksi idiay Alemania ken kadagiti pagilian a dati a sakup dagiti Nazi a nagsagaba iti kinaulpit gapu ta dida tinallikudan ti pammatida. Tinungpalda ti bilin ti Biblia nga agtalinaedda a neutral iti politika ken saanda nga agsoldado. (Mateo 26:52; Juan 18:36) Agarup 4,200 a Saksi ti naibalud kadagiti kampo konsentrasion ket 1,490 ti natay. Agingga ita, adu a saanda a karelihionan ti mangap-apresiar kadakuada gapu iti determinasion ken kinasungdoda.

[Ladawan iti panid 32]

Ni Joachim Alfermann