No Dagiti Kristiano Mayakayakda a Kas iti Trigo
NABIIT pay sakbay ti ipapatayna, pinakdaaran ni Jesus dagiti adalanna: “Adtoy! kinalikaguman ni Satanas nga ikutannakayo tapno yakayakennakayo a kas iti trigo.” (Luc. 22:31) Ania ti kayatna a sawen iti dayta?
Idi kaaldawan ni Jesus, adu a panawen ken pigsa ti kasapulan iti panagani iti trigo. Umuna, dagiti agani gapasenda dagiti trigo. Kalpasanna, taltagenda wenno agusarda kadagiti animal a mangguyod iti pagirikan tapno maisina dagiti irik kadagiti garami ken taep. Kalpasanna, maibuyog daytoy, isu a mabati dagiti irik iti pagtaltagan, ket itayab ti angin dagiti taep. Mayakayakton a naimbag dagiti irik tapno maikkat ti amin a bambanag a di kasapulan.
Maitunos kadagiti sasao ni Jesus, kankanayon idi a rauten ni Satanas dagiti adalan ni Jesus, ket rarautennatayo met ita. (Efe. 6:11) Agpayso a saan nga amin a pakarigatantayo iti biag ket maigapu ken Satanas. (Ecl. 9:11) Kaskasdi, ar-aramiden ni Satanas ti amin a kabaelanna tapno madadaelna ti kinatarnawtayo. Kas pagarigan, mabalin a sulisogennatayo nga agbalin a materialistiko, mangpili iti dakes a paglinglingayan, wenno agaramid iti imoralidad. Mabalin nga usarenna met dagiti kaeskuelaan wenno katrabahuan ken dagiti di manamati a kakabagian a mangpilit kadatayo a mangikagumaan a manggun-od iti amin nga itukon ti eskuelan ken ti trabahotayo. Kasta met, mabalin nga usaren ni Satanas ti panangidadanes tapno dadaelenna ti kinatarnawtayo iti Dios. Adu pay dagiti pamay-an nga us-usaren ni Satanas tapno arigna a mayakayaktayo.
Kasano a masarangettayo daytoy a nagbileg a kabusor? Ditay kabaelan iti bukodtayo. Nabilbileg ni Satanas ngem datayo; kaskasdi, ammotayo a nabilbileg nga amang ni Jehova ngem ni Satanas. No naan-anay nga agtalektayo ken Jehova, sipapasnek nga agkararagtayo maipaay iti sirib ken tured nga agibtur, ken naan-anay nga agtalektayo iti panangiwanwanna, bumilegtayo a manglaban kadagiti panangraut ni Satanas.—Sal. 25:4, 5.
No masuboktayo, masapul nga ammotayo nga ‘ilasin agpadpada ti umiso ken di umiso.’ Iti kasta, saantayo a maallilaw kadagiti gakat ni Satanas. (Heb. 5:13, 14) Tulongannatayo ni Jehova a mangpatanor iti kasta nga abilidad. Aniaman ti mapasamak, masapul nga agtalinaedtayo iti umiso a dalan. No agpaiwanwantayo ken Jehova, sigurado a pabilgenna ti determinasiontayo a mangaramid iti umiso.—Efe. 6:10.
Mabalin a padasen ni Satanas a yakayakennatayo a kas iti trigo. Ngem babaen ti bileg ni Jehova, makapagtakdertayo maibusor kenkuana, a sititibker iti pammati. (1 Ped. 5:9) Wen, ipanamnama kadatayo ti Sao ni Jehova: “Busorenyo ti Diablo, ket isu agtalawto kadakayo.”—Sant. 4:7.