Nainsiriban a Solusion

TALLO nga agtutubo a lallaki idiay Sentral Africa ti agtarigagay a tumabuno iti kombension distrito. Kasano a makagtengda sadiay? Dandani 90 a kilometro ti kaadayoda a lumasat iti lasonglasong, natapuk a kalsada, ken awan luganda. Inkeddengda ti bumulod iti tallo a bisikleta ngem awan ti nasarakanda a nasayaat a bisikleta.

Naammuan ti maysa a panglakayen iti lokal a kongregasion no ania ti parikutda isu nga intukonna ti bisikletana​—daanen ngem maus-usar pay. Inlawlawagna no kasano nga isu ken ti dadduma a kakabsat nakatabunoda idi iti maysa a kombension. Insingasing ti panglakayen a pagsisinnublatan dagiti tallo nga agtutubo ti bisikleta. Simple ngem mamagpanunot a solusion. Kasano?

Tapno maliklikanda ti pudot, parbangon pay idi nagkikita dagiti agtutubo a kakabsat ket inkargada dagiti gargaretda iti bisikleta. Maysa ti nagbisikleta, bayat a napartak a nagna ti dua. Kalpasan ti agarup 500 a metro, agsardeng ti nagbisikleta sa isadagna ti bisikleta iti maysa a kayo. Siempre, siguraduenna a ti bisikleta ket matannawaganen dagiti dua a nagna a kakabsat sakbay a panawanna dayta tapno saan a matakaw. Kalpasanna, ituloynan ti magna.

No madanonen dagiti dua ti bisikleta, maysa ti aglugan ket agtultuloy a magna ti sabali iti 500 a metro agingga a dumteng ti batangna. Isu a babaen ti nasayaat a panagplano ken determinasion, 60 a kilometro laeng ti pinagnada imbes a 90 a kilometro. Saan a sayang ti bannogda. Nakaduada a nagtataripnong dagiti Kristiano a kakabsatda iti kombension ken tinagiragsakda ti naespirituan a padaya. (Deut. 31:12) Iti daytoy a tawen, aramidenyo kadi ti amin a kabaelanyo tapno matabunuanyo ti kombension distrito iti lugaryo?