Agturay ti Sumagmamano, Gunggona Para iti Adu
SIPUD idi kaaldawan dagiti apostol, nangpili ti Dios manipud iti sangatauan iti maysa a limitado a bilang dagiti matalek a Kristiano, nga inamponna kas annakna. Naan-anay ti panagbalbaliw a mapasaran dagitoy nga annak isu nga inawagan dayta ti Sao ti Dios kas baro a pannakayanak. Ti panggep daytoy ket tapno maisagana dagitoy a mayanak manen nga adipen ti Dios iti panagturayda idiay langit. (2 Timoteo 2:12) Tapno mapasamak dayta, mapagungarda manipud ken patay nga agturong iti nailangitan a biag. (Roma 6:3-5) Idiay langit, “agturayda a kas ar-ari iti daga” a kadua ni Kristo.—Apocalipsis 5:10; 11:15.
Ngem ibaga ti Sao ti Dios a malaksid kadagiti mayanak manen, adda pay dadduma nga umawat iti agnanayon a pannakaisalakan. Sigun iti Biblia (iti Hebreo a Kasuratan agraman ti Kristiano a Griego a Kasuratan), panggep ti Dios nga isalakan ti dua a grupo dagiti tattao—maysa a bassit a grupo dagiti agturay idiay langit ken maysa a dakkel a grupo dagiti iturayanda ditoy daga. Imutektekanyo, kas pagarigan, ti insurat ni apostol Juan kadagiti pada a manamati a nangtagiragsak iti baro a pannakayanak. Kinunana maipapan ken Jesus: “Isu ket pangikappia a sakripisio maipaay kadagiti basoltayo, ngem saan a maipaay kadatayo laeng [ti bassit a grupo] no di ket maipaay met iti intero a lubong [ti dakkel a grupo].”—1 Juan 2:2.
Umasping iti dayta, insurat ni apostol Pablo: “Ti sigagagar a panagsegga ti sangaparsuaan [ti dakkel a grupo] ket agur-uray iti pannakaipanayag ti annak ti Dios [ti bassit a grupo].” (Roma 8:19-21) Ania ti kayat a sawen dagita a sasao da apostol Juan ken Pablo? Dagidiay mayanak manen ket agbalin a paset ti gobierno idiay langit. Agpaay iti ania a panggep? Tapno mangyeg iti agnanayon a gunggona kadagiti di mabilang a tattao ditoy daga nga iturayan ti gobierno ti Dios. Dayta ti makagapu nga insuro ni Jesus nga ikararag dagiti adalanna: “Umay koma ti pagariam. Maaramid koma ti pagayatam, kas sadi langit, kasta met iti daga.”—Mateo 6:10.
Ti Hebreo a Kasuratan dinakamatna met ti pannakaisalakan daytoy dua a grupo. Imutektekanyo, kas pagarigan, ti kinuna ni Jehova kenni Abraham nga inapo ni Jesus: “Babaen ti bin-im [ti bassit a grupo] pudno unay a dagiti amin a nasion iti daga [ti dakkel a grupo] bendisionandanto ti bagbagida.” (Genesis 22:18) Wen, mabendisionan ti amin a nasion babaen iti ‘bin-i’ ni Abraham.
Asino dayta a ‘bin-i’? Isu ni Jesu-Kristo, a kaduana dagiti nangtagiragsak iti baro a pannakayanak, dagiti annak nga inampon ti Dios. Inlawlawag ni apostol Pablo: “No kukuanakayo ni Kristo, pudno a bin-inakayo ni Abraham.” (Galacia 3:16, 29) Ket ania dagiti bendision a sagrapen ti amin a nasion babaen ti ‘bin-i’? Ti pannakagun-od manen iti anamong ti Dios ken ti agnanayon a biag iti paraiso a daga. Impadto ni salmista a David: “Dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:29; Isaias 45:18; Apocalipsis 21:1-5.
Wen, ti panagturay idiay langit ket agpaay iti sumagmamano. Ngem ti gunggona nga itden dayta a turay—ti biag nga agnanayon ditoy daga ken ti amin a kakuyogna a bendision—ket agpaay iti adu. Sapay koma ta matagiragsakyo a sangapamiliaan dagiti agnanayon a gunggona nga iyeg ti Pagarian ti Dios.
[Ladawan iti panid 12]
Di mabilang a tattao ti mabendisionanto iti agnanayon a biag ditoy daga. Maysakanto kadi kadakuada?