Saludsod Dagiti Agbasbasa
Pannusa Kadi ti Dios Dagiti Pakarigatanyo iti Biag?
Adda kadi trahedia a napasaranyo a namagpanunot kadakayo no pagayatan ti Dios nga agsagabakayo? Ti giddato a panagsakit, nakaro nga aksidente, wenno di ninamnama nga ipapatay ti maysa a miembro ti pamilia ti mabalin a makagapu a panunotentayo a dusdusaennatayo ti Dios.
Maisupadi iti kasta a kapanunotan, maliwliwakayo a makaammo a kayat ti Dios nga agbalin a naragsak ken natalged dagiti tattao. Nabatad dayta idi pinarsuana ti umuna a pagassawaan, nga inkabilna ida iti “minuyongan ti Eden,” kasla paraiso a parke, a sadiay awan ti aniaman a pakarigatan.—Genesis 2:15.
Nakalkaldaang ta ti umuna a pagassawaan inlaksidda daytoy a nagsayaat a namnama ken sipapakinakem a nagsukirda iti Dios. Makapaladingit ti imbungana kadakuada ken iti amin a kaputotanda, a pakairamanantayo. Apay? Mayarig dayta iti mapasamak no ti ama saanna a bayadan ti inkarina nga abang ti pagnanaedanda a balay—mapapanaw ti intero a pamilia ket agrigatda amin. Umasping iti dayta, nagpasar iti rigat ti amin a tattao sipud idi nagrebelde ti umuna a pagassawaan. (Roma 5:12) Kalpasan ti adu a tawen, inyasug ti nalinteg a lalaki a ni Job a no ti saem ken panagsagaba a mapaspasaranna ket ‘maikabilda iti timbangan,’ mabalin a ‘nadagdagsen pay ngem kadagiti darat dagiti baybay.’—Job 6:2, 3.
Ti maysa a pakaigapuan ti panagsagabatayo ket ti limitado a pannakaammotayo iti masanguanan. Kas pagarigan, ipapanyo a ti maysa a negosiante ket nagibangon ken nagilako kadagiti balay iti lugar a masansan nga adda uram. Gapu ta saanyo nga ammo dayta, gimmatang ken nagnaedkayo iti maysa kadagita a balay. Saan kadi nga isarsarangyo ti bagiyo ken ti pamiliayo iti nakaro a peggad? Saanyo la ketdi a panunoten a pannusa ti Dios ti aniaman a tumanor a pakarigatan! Nailanad iti Biblia dayta a kinapudno: “Ti asinoman nga awanan kapadasan maaddaan pammati iti tunggal sao, ngem daydiay nasaldet utobenna dagiti addangna.”—Proverbio 14:15.
Ngem makaliwliwa a maammuan a nupay agpasartayo amin iti pakarigatan, panggep ti Dios nga iti din agbayag mawayawayaanton ti sangatauan manipud kadagita. Inton dumteng dayta, ditayton pulos mapasaran, makita, wenno mangngeg man laeng dagita a pakarigatan. ‘Aglabaston’ dagiti lulua gapu iti liday, saem, ipapatay, ken ladingit. (Apocalipsis 21:4) Makaparagsak met ti kari a ti ibangon dagiti tattao a balbalay ken dagiti mulada ket saanton a madadael gapu kadagiti gubat ken didigra. Imbes ketdi, ‘mausardanto a naan-anay’ dagiti gapuanan ti imada.—Isaias 65:21-25.
Bayat nga ur-urayem a naan-anay a pagpatinggaen ti Dios ti aniaman a pakarigatan, ania ti mabalinmo nga aramiden ita tapno makissayan dagita a pakarigatan? Umuna ti amin, “dika agkammatalek iti bukodmo a pannakaawat,” ibalakad kadatayo ti Biblia, no di ket “agtalekka ken Jehova buyogen ti isuamin a pusom.” (Proverbio 3:5) Agpannurayka kenkuana maipaay iti giya ken liwliwa. Ipangagmo ti nadiosan a sirib a masarakan iti Biblia. Dayta ti makatulong kenka a mangaramid kadagiti nainsiriban a desision ken mangsalaknib kenka kadagiti pakarigatan a mabalin a maliklikan.—Proverbio 22:3.