Ti Biblia Balbaliwanna ti Biag Dagiti Tattao

Kasano a ti maysa a lalaki a nangrugi nga agusar iti marijuana ken sigarilio manipud kinaagtutubona ket naisardengna dagita a bisio? Ania ti nakatulong iti maysa a miembro ti gang a mangmedmed iti pungtotna ken mangikkat iti panangidumdumana iti puli? Usigem ti komento ti tunggal maysa kadakuada.

PERSONAL NGA IMPORMASION

NAGAN: HEINRICH MAAR

EDAD: 38

NAKAYANAKANNA: KAZAKHSTAN

PAKASARITAANNA: ADIKTO ITI MARIJUANA KEN SIGARILIO

TI NAPALABASKO: Nayanakak iti makin-abagatan a Kazakhstan, agarup 120 a kilometro manipud iti siudad ti Tashkent. Dayta a lugar ket natikag ken nadagaang no kalgaw, a dumanon iti 45 degree Celsius ti temperaturana, ken agarup –10 degree Celsius no panawen ti lam-ek​—ti klima a kaykayat a pagtubuan ti ubas ken marijuana.

Aleman dagiti nagannakko. Agpadada a miembro dagiti ebanghelikal a Kristiano ngem saanda a deboto. Nupay kasta, insurodak a mangkabesado iti Amami. Idi agtawenak iti 14, da nanang ken manangko nakipagadalda iti Biblia kadagiti Saksi ni Jehova. Naminsan, nagimdengak bayat nga impakita dagiti dua a Saksi ken nanang ti nagan ti Dios a Jehova iti bukodna a Biblia. Natukay ti riknak iti dayta. Insardeng ni nanang ti panagadalna, ken awan ti inaramidko a mangparayray iti pannakaammok iti Dios. Nupay kasta, adda idi gundaway a kanayon nga ibaga ti maestrami dagiti pammadakes a nangngegna maipapan iti maysa kano a sekta a maaw-awagan iti Saksi ni Jehova. Gapu ta sagpaminsan a natabunuak met idi ti gimong dagiti Saksi ni Jehova a kadua ni manangko, imbagak iti maestrak a saan a pudno dagiti maulit-ulit nga ibagbagana.

Idi agtawenak iti 15, naibaonak idiay Leningrad, nga ita ket St. Petersburg, Russia, tapno mangala iti bokasional a kurso. Inranudko kadagiti kakaseraak ti bassit nga ammok maipapan ken Jehova. Ngem nangrugiak nga agsigarilio. Idi nagbakasionak idiay Kazakhstan, naglakaak laeng a makagatang iti marijuana, nupay ilegal dayta. Nalaingak met nga uminum iti arak.

Idi nagturposak, nagpasalistaak kas soldado ti Soviet iti dua a tawen. Nupay kasta, saanko a nalipatan ti dadduma kadagiti kinapudno ti Biblia a nasursurok idi ubingak pay. Tunggal adda gundaway, iranudko kadagiti padak a soldado ti maipapan kenni Jehova ken ikalintegak dagiti Saksi no padaksenda ida.

Idi nairingpasko ti serbisiok iti militar, napanak idiay Alemania. Bayat ti kaaddak iti kampo dagiti imigrante, nakaawatak iti kopia ti libro a katulongan iti panagadal iti Biblia nga impablaak dagiti Saksi. Sipapasnek a binasak dayta ket nakitak a kinapudno dagiti linaonna. Ngem diak maikkat ti bisiok a panagsigarilio ken panagsusop iti marijuana. Di nagbayag, immakarak iti siudad ti Karlsruhe. Adda naam-ammok sadiay a Saksi ni Jehova ket inyadalannak iti Biblia.

NO KASANO A BINALBALIWAN TI BIBLIA TI BIAGKO: Nabayagen a mamatiak a ti Biblia ket Sao ti Dios. Ken kalpasan a nabasak ti libro a katulongan iti panagadal iti Biblia, kombinsidoak a sungbatan ti Biblia ti amin a napateg a saludsod maipapan iti biag. Kaskasdi, nabayag pay sakbay a naisardengko dagiti bisiok. Idi agangay, impapusok ti balakad ti Biblia iti 2 Corinto 7:1 ken inkeddengko a dalusan ti bagik manipud iti “tunggal pakatulawan iti lasag ken iti espiritu,” a kaipapananna ti panangisardengko iti panagusarko iti marijuana ken sigarilio.

Alisto a naisardengko ti agusar iti marijuana. Ngem nagpaut iti innem a bulan sakbay a naisardengko ti agsigarilio. Naminsan, insaludsod ti mangyad-adal kaniak iti Biblia, “Ania ti panggep ti biagmo?” Dayta ti namagpanunot kaniak maipapan iti pannakaadiktok iti sigarilio. Namin-adu a pinadasko nga isardeng ti panagsigariliok. Ngem itan, inkeddengko ti agkararag sakbay a mangalaak iti sigarilio imbes a dumawatak iti pammakawan ti Dios kalpasan ti panagsigariliok. Idi 1993, nangikeddengak iti aldaw a panangisardengko iti panagsigariliok. Babaen iti tulong ni Jehova, diakon nagsigarilio sipud idi.

NO KASANO A NAGUNGGONAANAK: Ita ta nawayawayaanakon manipud iti nangina ken makadadael a pannakaadikto iti marijuana ken sigarilio, simmayaat ti salun-atko. Naaddaanak met iti pribilehio nga agserbi iti sanga nga opisina dagiti Saksi ni Jehova idiay Alemania. Maragsakanak unay ta nasursurok nga iyaplikar ti balakad ti Biblia! Naaddaanak iti pudno a panggep ti biag gapu kadagiti pannakaammo a nagun-odko iti Biblia.

PERSONAL NGA IMPORMASION

NAGAN: TITUS SHANGADI

EDAD: 43

NAKAYANAKANNA: NAMIBIA

PAKASARITAANNA: NARANGGAS A MIEMBRO TI GANG

TI NAPALABASKO: Dimmakkelak iti maysa nga away iti rehion ti Ohangwena iti makin-amianan a Namibia. Nakabkabil ken napapatay dagiti kalugaranmi bayat ti gubat a napasamak iti daytoy a rehion idi dekada 1980. Iti purokmi, maibilang a malalaki ti maysa no nalaing a makiranget ken atiwenna ti dadduma nga ubbing. Gapuna, nasursurok ti makiranget!

Idi naturposko ti panageskuelak, nakipagnaedak iti ulitegko iti asideg ti baybay nga ili ti Swakopmund. Di nagbayag, nakimiembroak iti maysa a gang dagiti rebelioso nga agtutubo. Mapankami kadagiti lugar a saan a mabalin a papanan dagiti nangisit, kas iti hotel ken pagiinuman, tapno mangprubokar. Namin-adu a nakirangetkami kadagiti guardia ken polis. Rinabii nga adda awitko a natadem ken atiddog a kutsilio tapno nakasaganaak a mangdarup iti asinoman a kumarit kaniak.

Maysa a rabii, bayat ti pannakirangetmi iti kalabanmi a gang, dandaniak napapatay. Maysa kadagiti kalabanmi ti dimmarup iti likudak ket tagbatenna koman ti ulok ngem maysa kadagiti kaduak ti nangdanog kenkuana isu a naawanan iti puot. Iti laksid ti dandani pannakapapatayko, nagtultuloy ti kinaranggasko. No adda karirik, lalaki man wenno babai, kanayon a siak ti umuna a dumanog.

NO KASANO A BINALBALIWAN TI BIBLIA TI BIAGKO: Idi damo a nakasaritak ti maysa a babai a Saksi ni Jehova, imbasana kaniak dagiti bersikulo ti Salmo 37 sa kinunana a ti libro ti Biblia nga Apocalipsis ket naglaon kadagiti agkakaimbag a kari para iti masanguanan. Ngem gapu ta dina imbaga no ania a bersikulo, nangalaak iti Biblia ket binasak ti intero nga Apocalipsis iti dayta a rabii. Nagustuak ti kari a nabasak iti Apocalipsis 21:3, 4 nga “awanton ni patay, awanto metten ti panagleddaang wenno panagsangit wenno ut-ot.” Idi nagsubli dagiti Saksi, immanamongak nga agadal iti Biblia.

Nagrigatko a binalbaliwan ti panagpampanunot ken panagtigtignayko. Ngem naadalko iti Aramid 10:34, 35 a “ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” Inkagumaak met nga inyaplikar ti Roma 12:18: “No mabalin, agingga a makapagpannuray kadakayo, makikappiakayo iti amin a tattao.”

Malaksid iti panangmedmedko iti pungtotko, masapul met nga isardengko ti pannakaadiktok iti sigarilio. Masansan nga agsangsangitak a mangikararag a tulongannak ni Jehova. Ngem idi damo, saan nga umiso ti pamay-ak gapu ta ibagak a daytoyen ti “maudi” a panagsigariliok, sa agkararagak. Ti Saksi a mangyad-adal kaniak tinulongannak a makakita iti kinapateg ti panagkararag sakbay a mangalaak iti sigarilio. Masapul met a liklikak ti makikadua kadagiti mannigarilio. Kanayonanna, sinurotko ti singasing nga ibagak kadagiti katrabahuak a dakes ti agsigarilio. Talaga a nakatulong daytoy gapu ta awanen ti katrabahuak a mangted kaniak iti libre a sigarilio.

Idi agangay, naisardengko met laeng ti agsigarilio ken tinallikudak ti dati nga estilo ti panagbiagko. Kalpasan ti innem a bulan a panagadal ken panangyaplikar kadagiti prinsipio ti Biblia, nakualipikarak nga agpabautisar kas Saksi ni Jehova.

NO KASANO A NAGUNGGONAANAK: Nakombinsirak a dagiti Saksi ni Jehova an-annurotenda ti pudno a relihion idi nakitak ti panagiinnayatda aniaman ti nasion wenno pulida. Uray idi sakbay pay a nabautisaranak kas Saksi, adda puraw a Saksi a nangawis kaniak a makipangan iti pagtaenganna. Kasla maysa a tagtagainep dayta. Diak pay pulos idi napadasan ti sitatalna a nakisango iti puraw, nangnangruna iti pannakipangan iti pagtaenganda. Ngem ita, pasetakon ti pudpudno a sangalubongan a panagkakabsat.

Iti napalabas, pinadas dagiti guardia ken polis a balbaliwan ti panagpampanunot ken panagtigtignayko ngem saanda a nagballigi. Ti laeng Biblia ti addaan iti bileg a nangbalbaliw iti personalidadko ken namagbalin kaniak a naragsak.

[Blurb iti panid 29]

“Masansan nga agsangsangitak a mangikararag a tulongannak ni Jehova”