Ti Biblia Balbaliwanna ti Biag Dagiti Tattao

Apay a ti maysa a tao a naipamaysa ti biagna iti panagmotorsiklo, panagdroga, ken isport inkeddengna ti agbalin nga amin-tiempo a ministro? Ania ti nangtignay iti napeklan a sugador a mangisardeng iti bisiona ken mangsuportar iti pamiliana babaen ti nadayaw a panggedan? Ania ti nanggutugot iti maysa a balasang a mangilinteg iti biagna kalpasan a linaksidna dagiti pagalagadan ti Biblia agpapan pay napadakkel kas Saksi ni Jehova? Usigenyo ti salaysay dagitoy nga indibidual maipapan iti kapadasanda.

PERSONAL NGA IMPORMASION

NAGAN: TERRENCE J. O’BRIEN

EDAD: 57

NAKAYANAKANNA: AUSTRALIA

PAKASARITAANNA: NAIGAMER ITI DROGA, PAGAAYATNA TI AGMOTORSIKLO

TI NAPALABASKO: Dimmakkelak iti okupado a siudad ti Brisbane, a kabesera ti Queensland. Katoliko ti pamiliak, ngem idi agtawenakon iti walo, saankamin a makimismisa ken saanmin a pagsarsaritaan ti relihion. Idi agtawenak iti sangapulo, immakar ti pamiliami idiay Gold Coast, Australia. Nagnaedkami iti asideg ti aplaya, isu a bayat ti kinabaritok, masansan nga ag-surfing ken aglangoyak.

Nupay kasta, saanak a naragsak idi ubingak. Pinanawan ni tatangko ti pamiliami idi agtawenak iti walo. Nakiasawa manen ni nanangko, ket iti balaymi, kanayon ti panaginum iti arak ken panagsusupiat. Naminsan a rabii, kalpasan ti nakaro a panagsubang dagiti nagannakko, nakatugawak idi iti iddak ket inkarik a no mangasawaak man, diakto pulos makisubang ken baketko. Iti laksid dagiti parikutmi, saan a nagsisina ti pamiliami a buklen ti innem nga annak, ni nanang, ken ti agsiuman kaniak.

Idi maudi a tawtawen ti kinatin-edyerko, adu kadagiti kapatadak ti nagrebelde iti autoridad. Naigamerda iti marijuana, tabako, ken dadduma pay a droga, ken kanayonda nga agbartek. Kas kadagiti kapatadak, nagbiagak met a saan a responsable. Pagaayatko ti agmotorsiklo. Nupay nakaro ti pannakaaksidentek iti naminduan a daras, pagay-ayatko latta ti agmotorsiklo ken inkeddengko a lawlawen ti Australia.

Nupay nakawaywayaak, masansan a maldaangak no mapanunotko ti kasasaad ti lubong ken ti di pannakaseknan ti adu a tattao maipapan kadagiti parikut ti sangatauan. Sinapsapulko ti kinapudno maipapan iti Dios, relihion, ken kasasaad ti lubong. Ngem idi nagsaludsodak iti dua a padi a Katoliko, naupayak kadagiti sungbatda. Inyumanko dagita met laeng a topiko iti nadumaduma a ministro a Protestante ngem kaskasdi a makapaupay dagiti sungbatda. Kalpasanna, maysa a gayyem ti nakitulag tapno maam-ammok ni Eddie, a maysa a Saksi ni Jehova. Namimpat a nagsaritakami ken Eddie, ket iti tunggal panagsaritami, inusarna ti Biblia a nangsungbat kadagiti saludsodko. Iti damo pay laeng a panagsaritami, ammok nga adda naisangsangayan a nasarakak. Kaskasdi, diak pay idi naamiris a masapul nga agbalbaliwak.

NO KASANO A BINALBALIWAN TI BIBLIA TI BIAGKO: Idi nagmotorsikloak a nanglawlaw iti Australia, adda sabali a Saksi a nakasaritak iti dalan. Ngem idi nagsubliak idiay Queensland, innem a bulan nga awan ti nakasaritak a Saksi.

Kalpasanna, iti naminsan a panagawidko manipud iti trabaho, nakitak ti dua a lallaki a nakaportpolio a magmagna iti kalsada, ket impagarupko a Saksi ni Jehova dagitoy. Idi inasitgak ida, napaneknekak a Saksida. Kiniddawko nga iyadalandak iti Biblia. Dagus a timmabunoak kadagiti gimong dagiti Saksi ken nakatabunoak pay iti dakkel a kombension a naangay idiay Sydney idi 1973. Nupay kasta, nagdanag ti pamiliak, nangruna ni Nanang, idi maammuanda a makitimtimpuyogak kadagiti Saksi. Gapu iti dayta ken dadduma pay a makagapu, insardengko ti makitimpuyog kadagiti Saksi. Iti makatawen, impamaysak ti pagaayatko unay a panagay-ayam iti cricket.

Ngem idi agangay, nabigbigko a saak la pudpudno a naragsak no makipagad-adalak iti Biblia kadagiti Saksi ni Jehova. Gapuna, binirokko ida ken intuloyko manen ti nakigimong. Insardengko metten ti makitimpuyog kadagiti agdrogdroga a gagayyemko.

Dagiti naammuak iti Biblia maipapan ken Job ti talaga a nakatignayak nga agbalbaliw. Maysa a naanus ken nataengan a Saksi nga agnagan iti Bill ti kanayon a makisarsarita kaniak maipapan iti Biblia. Kalpasan ti panangadalmi iti pakasaritaan ni Job, dinamag ni Bill kaniak no asino pay ti ak-akusaran ni Satanas a di naimpusuan ti panagserbina iti Dios. (Job 2:3-5) Imbagak amin dagiti ammok a tattao a nainaganan iti Biblia, ket siaasi a kinuna ni Bill, “Wen, uray met dagita.” Kalpasanna, kinitanak sana kinuna, “Uray sika, ak-akusarannaka met ni Satanas!” Naklaatak. Sakbay dayta a panagadalmi, ammok a pudno dagiti nasursurok. Ngem ita ammokon no apay a nasken nga iyaplikarko dagiti maad-adalko. Uppat a bulan kalpasanna, nabautisaranak kas maysa a Saksi ni Jehova.

NO KASANO A NAGUNGGONAANAK: Agkintayegak a mangpanunot no ania koma ti nagbanagak itan no diak nasursuro ti agbiag maitunos kadagiti pagalagadan ti Biblia. Mabalin a natayak ngatan. Adu a dati a gagayyemko ti natayen gapu iti droga ken arak. Saan met a naragsak ti panagasawada ket mabalin a kasta met koma ti nagbanagak.

Addaanak itan iti asawa, ket agserserbikami ken baketko a Margaret iti sanga nga opisina dagiti Saksi ni Jehova iti Australia. Awan ti kameng ti pamiliak a nakikadua kaniak nga agdayaw ken Jehova. Kaskasdi, iti panaglabas ti adu a tawen, maragsakankami ken Margaret ta addada indibidual ken agassawa nga inyadalanmi iti Biblia ket binalbaliwanda met ti biagda a kas kaniak. Kabayatanna, naaddaankami iti adu a nagsasayaat a gagayyem. Malaksid iti dayta, gapu ta napadakkel ni Margaret kas maysa a Saksi, tinulongannak a mangtaginayon iti inkarik iti bagik dandani 40 a tawen ti napalabasen. Iti nasurok a 25 a tawenen, naragsak ti panagkaduami kas agassawa. Adda dagiti saanmi a pagtunosan, ngem dikami pulos nagsubsubang. Bigbigenmi a dakkel ti naitulong kadakami ti Biblia.

PERSONAL NGA IMPORMASION

NAGAN: MASAHIRO OKABAYASHI

EDAD: 39

NAKAYANAKANNA: JAPAN

PAKASARITAANNA: SUGADOR

TI NAPALABASKO: Dimmakkelak idiay Iwakura, maysa a bassit nga ili nga agarup kagudua nga oras a daliasaten manipud Nagoya babaen ti tren. Malagipko a nakasingsingpet idi da nanang ken tatangko. Ngem naduktalak idi agangay a ni tatangko ket maysa a yakuza, wenno butangero, nga addaan iti ilegal nga aramid tapno mabiagna ti pamiliami a buklen ti lima. Idi agtawenak iti 20, pimmusay ni tatangko gapu iti cirrhosis iti dalem a resulta ti inaldaw a panagbartekna.

Koreano ni tatangko, isu a masansan a mairurumen ti pamiliami iti komunidad. Gapu iti dayta ken iti dadduma pay a parikut, nagbalin a miserable ti kinatin-edyerko. Nagpasalistaak iti haiskul ngem manmano a sumrekak iti klase ket simmardengak kalpasan ti makatawen. Gapu ta adda saan a nasayaat a rekordko iti polisia, ken gapu ta mestisoak a Koreano, marigatanak nga agsapul iti trabaho. Idi agangay, nakabirokak met laeng iti pagtrabahuan ngem nadangran dagiti tumengko isu a saanakon a makatrabaho iti nadagsen.

Rinugiak ti mangged babaen ti panagay-ayam iti pachinko a maysa a kita ti sugal. Adda idin ikabkabbalayko ngem kayatna a maaddaanak iti nasayaat a panggedan sakami agkasar. Nupay kasta, gapu ta dakkel ti mabirokak iti panagsugal, diak kayat a baliwan ti estilo ti panagbiagko.

NO KASANO A BINALBALIWAN TI BIBLIA TI BIAGKO: Naminsan, adda maysa a Saksi ni Jehova a nagtuktok iti ruanganmi ket nangipaima kaniak iti libro a Life​—How Did It Get Here? By Evolution or by Creation? Iti daydi laeng a kanito a napanunotko dayta a saludsod. Kalpasan a nabasak ti libro, immannugotak nga agadal iti ad-adu pay maipapan iti Biblia. Nabayagen a pinampanunotko no ania ngata ti mapasamak no matay ti tao. Dagiti naammuak a nabatad a sungbat ti Biblia maipapan iti dayta ken iti dadduma pay a topiko ti nanglawlawag iti nakullaapan nga isipko.

Naamirisko a kasapulan nga iyaplikarko dagiti maad-adalko iti Biblia. Gapuna, inkasarko ti ikabkabbalayko, insardengko ti agsigarilio, impapukisko ti atiddog ken natinaan iti kolor-olandes a buokko, ken inaramidko a desente ti langak. Insardengko metten ti agsugal.

Narigatanak nga agbalbaliw. Kas pagarigan, diak kaskarina a maisardeng ti agsigarilio. Ngem naaramidko dayta babaen ti napasnek a panagkararag ken panagpannurayko ken Jehova. Kasta met, talaga a makakarit ti damo a trabahok kalpasan nga insardengko ti pachinko. Malaksid a makabannog ti trabahok, kagudua laeng ti mategteggedak no idilig iti birokko iti sugal. Ti maysa kadagiti teksto iti Biblia a nakatulong kaniak bayat dayta a narigat a kasasaad ket ti Filipos 4:6, 7. Kunana: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” Namin-adu a napaneknekak ti kinapudno dayta.

NO KASANO A NAGUNGGONAANAK: Idi damok ti makipagadal iti Biblia kadagiti Saksi ni Jehova, saan a naragsakan ni baketko. Ngem idi nakitana a dakkel ti nagbalbaliwan ti kababalinko, nakikadua kaniak iti panagadalko sa nangrugi a tumabuno a kaduak kadagiti gimong dagiti Saksi ni Jehova. Ita, agpadakamin a Saksi ni Jehova. Talaga a bendision ti makapagdanggay nga agserbi iti Dios!

Idi saanak pay nga agad-adal iti Biblia, impagarupko a naragsakak. Ngem ita, ammokon no ania ti pudpudno a kinaragsak. Saan a nalaka ti agbiag maitunos kadagiti pagalagadan ti Biblia, ngem siguradoak a dayta ti kasayaatan a wagas ti panagbiag.

PERSONAL NGA IMPORMASION

NAGAN: ELIZABETH JANE SCHOFIELD

EDAD: 35

NAKAYANAKANNA: UNITED KINGDOM

PAKASARITAANNA: PAGAY-AYATNA TI AGRAGRAGSAK NO NGUDO TI LAWAS

TI NAPALABASKO: Dimmakkelak idiay Hardgate, maysa a bassit nga ili iti ruar ti Glasgow, Scotland. Idi agtawenak iti pito, ni nanangko a maysa idin a Saksi ni Jehova, rinugiannak a suruan maipapan iti Biblia. Nupay kasta, idi agtawenakon iti 17, ad-adda a pagay-ayatko ti makikadua kadagiti gagayyemko iti eskuelaan ket mapankami kadagiti nightclub, agdengngegkami kadagiti musika a heavy metal, ken agiinumkami. Diak pagan-ano dagiti naespirituan a bambanag. Pagay-ayatko ti agragragsak kada ngudo ti lawas. Ngem nagbaliw ti amin idi agtawenakon iti 21.

Napanak bimmisita kadagiti kabagiak idiay Makin-amianan nga Ireland. Iti kaaddak sadiay, nabuyak ti Orange Walk a parada dagiti Protestante. Nasdaawak iti nakitak a nakaro a gura ken kinapanatiko iti nagbaetan dagiti Protestante ken Katoliko. Kinapudnona, dayta ti namagpanunot kaniak. Nalagipko dagiti insuro ni Nanang manipud iti Biblia ket ammok a di pulos anamongan ti Dios dagidiay di mangikankano kadagiti naayat a pagalagadanna. Dagus a naamirisko a dagiti bukodko a pagayatan ti impamaysak iti biagko, a diak inkankano no ania ti kayat ti Dios a wagas ti panagbiagko. Inkeddengko nga inton makasubliak idiay Scotland, sukimatek a naimbag no ania ti isursuro ti Biblia.

NO KASANO A BINALBALIWAN TI BIBLIA TI BIAGKO: Idi damok ti makigimong manen kadagiti Saksi ni Jehova iti ilik, mababain ken maam-amakak. Nupay kasta, mannakigayyem ti isuamin. Bayat nga iyap-aplikarko dagiti maad-adalko iti Biblia, maysa a naasi a kameng ti kongregasion ti nangipakita kaniak iti naisangsangayan a pannakaseknan. Talaga a tinulongannak tapno mariknak a pasetak manen ti kongregasion. Dagiti dati a gagayyemko aw-awisendak manen nga agragragsak kadagiti nightclub, ngem imbagak kadakuada a determinadoakon nga agbiag maitunos kadagiti pagalagadan ti Biblia. Idi agangay, binaybay-andakon.

Saanko itan a matmatan ti Biblia kas libro laeng dagiti regulasion. Maawatakon a pudpudno a tattao dagiti nainaganan iti Biblia, nga addaanda met iti rikna ken pagkapuyan a kas kaniak. Nagbiddutda met, ngem pinakawan ida ni Jehova a Dios idi sipapasnek a nagbabawida. Gapu iti dayta, nagtalekak nga uray no tinallikudak ti Dios idi agtutuboak, pakawanen ken lipatenna dagiti basolko no ikagumaak a paragsaken ti pusona.

Magustuak met unay ti kababalin ni nanangko. Uray no tinallikudak ti Dios, di pulos timmalikud ni nanangko. Gapu iti di maisin a kinasungdona, naamirisko a makagunggona unay ti agserbi ken Jehova. Idi agtutuboak pay ken sumursurotak ken Nanang iti panangasabana iti binalaybalay, diak pulos tinagiragsak dayta ken iti panagkunak, diak kabaelan ti mangasaba iti adu nga oras. Ngem ita, inkeddengko a suboken ti kari ni Jesus iti Mateo 6:31-33. Kunana: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ . . . Ta ammo ti nailangitan nga Amayo nga amin dagitoy a banag ket kasapulanyo. Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.” Kalpasan la unay a nabautisaranak kas Saksi ni Jehova, nagikkatak iti amin-tiempo a trabahok ket nagbirokak iti paset-tiempo a panggedan sa nagserbiak kas amin-tiempo a ministro.

NO KASANO A NAGUNGGONAANAK: Idi agtutuboak pay ken pagay-ayatko ti agragragsak no ngudo ti lawas, diak pulos narikna ti pannakapnek. Saanak idi a naragsak. Ita ta okupadoakon nga agserserbi ken Jehova, addaanakon iti pannakapnek. Naragsak ken adda panggep itan ti biagko. Adda asawak itan, ket linawas a bumisitakami ken lakayko kadagiti kongregasion dagiti Saksi ni Jehova tapno paregtaenmi ida. Matmatak daytoy a trabaho kas kadakkelan a pribilehio iti biagko. Pagyamyamanak unay ni Jehova ta impaayannak iti maikadua a gundaway!

[Blurb iti panid 27]

“Iti damo pay laeng a panagsaritami, ammok nga adda naisangsangayan a nasarakak. Kaskasdi, diak idi naamiris a masapul nga agbalbaliwak”

[Blurb iti panid 29]

“Diak kaskarina a maisardeng ti agsigarilio. Ngem naaramidko dayta babaen ti napasnek a panagkararag ken panagpannurayko ken Jehova”

[Blurb iti panid 30]

“Saanko itan a matmatan ti Biblia kas libro laeng dagiti regulasion. Maawatakon a pudpudno a tattao dagiti nainaganan iti Biblia, nga addaanda met iti rikna ken pagkapuyan a kas kaniak”