Ti Masursurotayo ken Jesus
Maipapan iti Pudno a Panagdayaw
Anamongan kadi ti Dios ti amin a kita ti panagdayaw?
▪ Naasian ni Jesus kadagiti tattao nga inallilaw ti ulbod a relihion. Namakdaar mainaig kadagiti “ulbod a mammadto nga umay . . . iti kawes ti karnero, ngem iti uneg loboda a narawet.” (Mateo 7:15) Nakitayo kadi no kasano nga us-usaren dagiti tattao ti relihion agpaay iti dakes a panggep?
Inkararag ni Jesus iti Dios: “Ti saom ket kinapudno.” (Juan 17:17) Isu a saan nga anamongan ti Dios ti panagdayaw a maisupadi iti kinapudno ti Biblia. Ngarud, inturong ni Jesus kadagiti dadduma a managinsisingpet iti relihion dagitoy a sasao ti Dios: “Kinaubbaw nga agtultuloyda nga agdayaw kaniak, agsipud ta isuroda ti bilbilin dagiti tattao kas doktrina.”—Mateo 15:9.
Adda kadi pudno a relihion?
▪ Idi nakasarita ni Jesus ti maysa a Samaritana nga inallilaw ti palso a relihion, kinunana kenkuana: “Agdaydayawkayo iti saanyo nga am-ammo . . . Dagiti pudno a managdaydayaw agdayawdanto iti Ama buyogen ti espiritu ken kinapudno, ta, pudno unay, ti Ama sapsapulenna dagiti kasta nga agdayaw kenkuana.” (Juan 4:22, 23) Nabatad a mabalin a masarakan ti pudno a panagdayaw.
Kinuna ni Jesus: “Awan ti aramidek iti bukodko a nakem; no di ket kas iti insuro kaniak ni Ama sawek dagitoy a banag.” Pagaammo ni Jesus nga awan ti sabali a pudno a relihion no di laeng ti insurona. (Juan 8:28) Maikanatad ngarud a kunaenna: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” (Juan 14:6) Yantangay dagiti pudno a managdaydayaw addaanda laeng iti maymaysa a manangibabaet iti Dios, nasken ngarud nga agkaykaysada iti maysa laeng a pudno a relihion.
Kasanom a mailasin dagiti pudno a managdaydayaw?
▪ Ti maysa a Kristiano ket pasurot ni Jesus Kristo. Usigem ti uppat a pamay-an no kasano a ti panangtulad iti ulidan ni Jesus ibatadna no siasino dagiti pasurotna.
1. Iti kararagna ken Jehova, kinuna ni Jesu-Kristo: “Impakaammok kadakuada ti naganmo.” (Juan 17:26) Kasta met laeng ti ar-aramiden dagiti pudno a Kristiano ita.
2. Inkasaba ni Jesus ti Pagarian ni Jehova ken imbaonna dagiti adalanna nga ikasabada met dayta iti binalaybalay. Imbilinna: “Iti aniaman a siudad wenno purok a serkanyo, birokenyo no siasino iti dayta ti maikari.” Idi agangay, kinunana kadagiti pasurotna: “Inkayo ngarud ket mangaramidkayo iti ad-adalan kadagiti tattao iti amin a nasion.” (Mateo 10:7, 11; 28:19) Nalaka a mailasin no siasino ita dagiti pudno a Kristiano gapu ta itultuloyda nga aramiden dayta a trabaho.
3. Saan a nakinamin ni Jesus iti politika. Isu a kinunana kadagiti pasurotna: “Saanda a paset ti lubong, a kas kaniak a saan a paset ti lubong.” (Juan 17:14) Rumbeng a nalatak dagiti pudno nga agdaydayaw gapu iti neutral a takderda iti politika.
4. Impakita ni Jesus ti managsakripisio nga ayat iti sabsabali. Kinunana: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Agiinnayat dagiti pudno a Kristiano ket saanda a makiraman iti gubat.
Kasanoka a magunggonaan iti pudno a panagdayaw?
▪ Tapno agbalinka a pudno nga agdaydayaw, masapul nga adu ti ammom maipapan ken Jehova. Ti pannakaammom iti Dios tulongannaka a maaddaan iti kasayaatan a wagas ti panagbiag ken gutugotennaka a mangayat iti Dios. Inkari ni Jehova nga ipaayna ti agnanayon a biag kadagidiay mangayat kenkuana. Gapuna, kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios.”—Juan 17:3.
Para iti kanayonan nga impormasion, kitaem ti kapitulo 15 iti daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.
[Ladawan iti panid 16]
“Siputanyo dagiti ulbod a mammadto nga umay kadakayo iti kawes ti karnero, ngem iti uneg loboda a narawet.”—Mateo 7:15