Ni Jesu-Kristo​—Ti Bileg ti Mensahena

“Ti manayon a pammaneknek a talaga a nakasirsirib daytoy a tao manipud Capernaum ket ti agtultuloy a pananggutugotna iti puso ken panunot babaen ti naasi a pamay-anna.”a​—AUTHOR GREGG EASTERBROOK.

NABILEG ti sasao. Dagiti napili a nainsiriban a sasao tignayenna dagiti puso, mangted iti namnama, ken balbaliwanna ti biag. Awan pay ti tao a nakapagsao a kas iti kabileg ti panagsao ni Jesu-Kristo. Kastoy ti insurat ti maysa a nakangngeg iti nalatak ita a Sermon ni Jesus iti Bantay: “Idi nalpas ni Jesus dagitoy a sasao, ti imbungana ket nagsiddaaw unay dagiti bunggoy iti wagas ti panangisurona.”​—Mateo 7:28.

Adu a sasao ni Jesus ti pamiliar ita kadagiti tattao iti intero a lubong. Adtoy ti sumagmamano a pagarigan ti nabagas a sasaona.

“Saanyo a mabalin ti agpaadipen iti Dios ken iti Kinabaknang.”​—Mateo 6:24.

“Amin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.”​—Mateo 7:12.

“Ibayadyo ken Cesar ti bambanag ni Cesar, ngem iti Dios ti bambanag ti Dios.”​—Mateo 22:21.

“Ad-adu ti kinaragsak iti panangted ngem iti panangawat.”​—Aramid 20:35.

Ngem saan laeng a basta nangisawang ni Jesus iti nakallalagip a sasao. Nabileg ti mensahena gapu ta dayta ti nangyallatiw iti kinapudno maipapan iti Dios, mangisuro no kasano a masarakan ti pudpudno a makapnek a biag, ken mangibatad iti Pagarian ti Dios a mangrisut iti amin a panagsagaba dagiti tattao. Bayat nga usigentayo daytoy a mensahe kadagiti sumaganad a panid, makitatayo no apay nga agtultuloy ti pananggutugot ni Jesus iti minilmilion a “puspuso ken pampanunot iti naasi a pamay-anna.”

[Footnote]