Saludsod Dagiti Agbasbasa
Ania ti Panangmatmat Dagiti Saksi ni Jehova iti Interfaith?
▪ Sigun iti World Christian Encyclopedia, adda agarup “10,000 a nagduduma a relihion iti sangalubongan.” Gapu iti nakaro a parikut ken pannakadangran a resulta ti panagdadangadang dagita a relihion, adu ti mangnamnama iti pagimbagan ti interfaith wenno panagkakadua ti nagduduma a relihion. Mamatida a dayta ti mamagtalna ken mamagkaykaysa iti nabingaybingay a lubong.
Iparparegta ti Biblia ti panagkaykaysa. Inyasping ni apostol Pablo ti kongregasion Kristiano iti bagi, a tunggal kamengna ket “natunos ti pannakasangalna ken naaramid nga agtitinnulong.” (Efeso 4:16) Kasta met, indagadag ni apostol Pedro kadagiti padana a manamati: “Agkakapanunotankay koma amin.”—1 Pedro 3:8.
Nagduduma ti kultura ken relihion idi panawen dagiti nagkauna a Kristiano. Ngem no maipapan iti interfaith, inyimtuod ni Pablo iti suratna: “Ania ti pakiramanan ti matalek a tao iti di manamati?” Kalpasanna, pinakdaaranna dagiti Kristiano a ‘rummuar iti nagtetengngaanda.’ (2 Corinto 6:15, 17) Nabatad a tubtubngaren ni Pablo ti interfaith. Apay?
Inlawlawag ti apostol a di maitutop wenno di agkaasmang ti panagtimpuyog ti pudno a Kristiano ken ti palso a Kristiano. (2 Corinto 6:14) Makadangran dayta iti pammati dagiti Kristiano. Ti pannakaseknan ni Pablo ket kas iti pannakaseknan ti maysa nga ama a makaammo iti dakes a kababalin ti dadduma nga ubbing iti sangakaarrubaanna. Kas maseknan a nagannak, nainsiriban nga ikeddengna no siasino laeng ti rumbeng a kaay-ayam ti anakna. Mabalin a saan a magustuan ti kaaduan ti kasta a kinainget. Ngem proteksion iti anak ti kasta a kasasaad ta mayadayo kadagiti dakes nga impluensia. Umasping iti dayta, ammo ni Pablo a dagiti Kristiano masapul a maisinada kadagiti sabali a relihion tapno saanda nga agpeggad.
Tultuladen ni Pablo ti ulidan ni Jesus. Nupay ni Jesus ti kangrunaan nga ulidan iti panangitandudo iti panagkakappia, saan a nakiraman iti interfaith. Bayat ti ministerio ni Jesus ditoy daga, aktibo idi ti adu a relihion a kas kadagiti grupo dagiti Fariseo ken Saduceo. Kinapudnona, nagkaykaysa dagitoy a sekta a bimmusor ken Jesus ken insikatda pay a papatayen. Imbes nga ibagana a makiraman dagiti pasurotna iti sabali a panagdayaw, imbilin ni Jesus nga “agaluadda . . . iti sursuro dagiti Fariseo ken Saduceo.”—Mateo 16:12, Ti Biblia.
Agaplikar met kadi ita dagiti pakdaar ti Biblia maibusor iti interfaith? Wen, yantangay talaga a saan a mabalin a pagkaykaysaen ti agduduma a narelihiosuan a patpatien no kasano a di mabalin a paglaoken ti lana ken danum. Kas pagarigan, no aguummong dagiti saan nga agkakarelihionan tapno agkararagda maipaay iti kappia, ania a dios ti awaganda? Ti Trinidad a dios ti Kakristianuan? Ni Brahma dagiti Hindu? Ni Buddha? Wenno ti sabali pay a dios?
Impadto ni propeta Mikias nga “iti kamaudianan a paset dagiti aldaw,” kunaento dagiti tattao manipud iti amin a nasion: “Umaykayo, ket sumang-attayo iti bantay ni Jehova ken iti balay ti Dios ni Jacob; ket isuronatayto maipapan kadagiti dalanna, ket magnatayto kadagiti danana.” (Mikias 4:1-4) Agresulta dayta iti talna ken panagkaykaysa iti sangalubongan, saan a gapu ta nagtitipon dagiti agduduma a relihion no di ket gapu ta amin a tattao inawatda ti maymaysa a pudno a pammati.
[Ladawan iti panid 27]
Dagiti kameng dagiti dadakkel a relihion iti lubong iti maysa nga interfaith a komperensia idi 2008
[Credit Line]
REUTERS/Andreas Manolis