Saludsod Dagiti Agbasbasa

Rumbeng Kadi a Makimiembroak iti Maysa a Relihion?

▪ Agpangpangaduaka kadi a makimiembro iti maysa a relihion gapu iti kinamanaginsisingpet ken di panagtutunos dagiti makimismisa ken uray dagiti klero? No kasta ti riknam, mabalin nga umanamongka iti pagsasao dagiti Pranses nga, “Asinoman nga asideg iti simbaan ket adayo iti Dios.”

Nalabit a raraemem ti Biblia ken matmatam a dagiti gobierno ken dagiti indibidual rumbeng a respetuenda ti karbengan ti maysa a tao a mangpili iti bukodna a relihion. Ngem nalabit maisaludsodmo, ‘Talaga kadi nga ibagbaga ti Dios a nasken a maikameng iti maysa nga organisado a relihion ti siasinoman a mayat nga agdayaw Kenkuana?’

Wen. Kasano a masiguradotayo dayta? Maysa pay, mabalin kadi ti uray ania a relihion?

Usigem ti ehemplo ni Jesus. Kameng kadi iti maysa nga organisado a relihion? Idi ubing pay ni Jesus, simmurot iti Judio a pamiliana ken iti dadduma a Judio a kanayon a mapan iti templo ti Jerusalem tapno makiraman iti organisado a panagdayaw. (Lucas 2:41-43) Idi nataenganen, nakikadua ni Jesus kadagiti padana a Judio iti panagdayaw iti Dios iti sinagoga iti lugarda. (Lucas 4:14-16) Idi nakisao iti maysa a babai a sabali ti relihionna, kinuna ni Jesus: “Agdaydayawkami iti am-ammomi.” (Juan 4:22) Nabatad a tinukoy ni Jesus ti bagina kas kameng ti relihion dagiti Judio.

Idi agangay, gapu iti panangilaksid kenkuana ti nasion dagiti Judio, kinuna ni Jesus a laksiden met ti Dios ti namulitan a panagdayawda. (Mateo 23:33–24:2) Nupay kasta, impasimudaagna a dagidiay agtarigagay a maanamongan ti panagdayawda iti Dios, nasken a kamengda ti maysa nga organisado a grupo. Imbagana kadagiti pasurotna: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Ti maysa nga adalan ni Kristo masapul a makitimpuyog kadagiti kapammatianna tapno maipakitana kadakuada ti ayat. Kinapudnona, imbatad ni Jesus nga adda laeng dua a dalan a sursuroten dagiti relihion. Dineskribirna ti maysa kas “akaba ken nalawa” a dalan a mangiturong “iti pannakadadael.” Iti sabali a bangir, kinunana: “Akikid ti ruangan ken nailet ti dalan nga agturong iti biag, ket bassit dagidiay makasarak iti dayta.”​—Mateo 7:13, 14.

Nabatad ngarud a saan a mabalin a komporme a relihion ti pakitimpuyogam. Namallaag ti Biblia maibusor iti pannakitimpuyog kadagidiay agparang a “relihioso ngem saan met a makita iti biagda ti pudno a bileg ti relihion.” Innayon pay ti Sao ti Dios nga “adaywam dagitoy a tattao.” (2 Timoteo 3:5, Ti Baro a Naimbag a Damag Biblia) Iti kasumbabangirna, dakkel a pakagunggonaantayo ti panangilasin ken pannakitimpuyog kadagidiay adda iti dalan nga agturong iti biag. Ipapaay dayta a grupo ti pammaregta ken tulong kadagiti agkasapulan, agraman ti naraniag a namnama iti masanguanan.​—Hebreo 10:24, 25.

Kasano a mailasinmo no ania a relihion ti adda iti akikid a dalan? Apay a dimo usigen dagiti naibatay-Biblia a sungbat a masarakan iti kapitulo 15 ti libro nga Ania a Talaga ti Isursuro ti Biblia?a Makatulong dayta a libro tapno mapilim a siuumiso no ania a relihion ti pakitimpuyogam.

[Footnote]