Surat Manipud Norway
Panangbisita iti Nalawa a Kaniebean
ITI maysa nga agsapa iti tiempo ti lam-ek, simmiripkami iti kortina tapno kitaenmi no ania ti paniempo. Makaparagsak a makita ti naariwanas nga asul a tangatang! Tallo nga aldaw a mangasabakami idiay Finnmarksvidda—ti nalawa a tanap iti makin-amianan a Norway.
Nakalamlamiis ditoy Norway no tiempo ti lam-ek, isu a medio agduaduakami a mapan iti amianan. Naimbag laengen ta kaduami ti tallo a Saksi ni Jehova iti dayta a lugar. Ammoda ti kasasaad sadiay ket imbagada no ania ti aramidenmi.
Manmano ti kalsada ditoy. Masapul ti lugan nga snowmobile tapno madanon dagiti tattao iti nasulinek a luglugar. Nagbalonkami iti kawes, taraon, ken ekstra a gasolina ket inluganmi dagita iti snowmobile ken pasagad. Nagpintas ti sumilapsilap a kasla diamante a niebe a masilnagan ti init!
Adu ti atap nga animal iti Finnmarksvidda kas iti kuneho, sora, ugsa, ken dadduma pay, sa adda met sumagmamano nga oso. Ngem magagarankami a makisarita kadagiti tattao ditoy nasulinek a lugar, nangruna kadagiti Sami nga empleado iti pagdagusan wenno agtartaraken iti ugsa.
Iti damo a nagdagusanmi, nasabatmi ti sumagmamano nga agtutubo ken dagiti kaklaseda a mapan ag-ski sadiay. Simmardengda ket dinamagda no ania ti panggepmi. Naragsakankami a nangilawlawag iti dayta. Idi agsisinakamin, maysa kadakuada ti nagkuna, “Sapay koma ta naballigi ti panangidanonyo iti linaon ti Biblia!” Naglugankami manen ket linasatmi dagiti timmangkenen a nalawa a danaw ken kaniebean. Adda ngata pangen ti ugsa a makitami?
Idi sumungadkami iti maysa a kalapaw, kinablaawannakami ti maysa a lalaki a maysa kadagiti sumagmamano a permanente a residente ditoy. Nadlawna a nadadael ti pasagadmi, isu nga intukonna a tarimaanen. Saan a nagap-apura a nangtarimaan iti pasagad ta saan nga ugali dagiti lumugar ditoy ti agapura. Saankami a nagdanag gapu ta nasingpet. Idi natarimaanen ti pasagad, nagyamankami ken impakitami ti kunaen ti Biblia no apay a palpalubosan ti Dios ti panagsagaba. Nagimdeng a naimbag. Inawatna ti intedmi a libro nga Ania a Talaga ti Isursuro ti Biblia? ken dagiti magasin a Pagwanawanan ken Agriingkayo! Idi pumanawkamin, immisem sa nagyaman iti ibibisitami.
Kalpasan ti sumagmamano pay a sinarungkaranmi, rumabiin isu a nagturongkamin iti dagusmi. Kellaat a nakakitakami iti sora (fox). Sumileng ti nalabaga a dutdotna iti nakapudpudaw a niebe. Nagsarimadeng biit, minatmatannakami, sa pimmanaw. Agtudo manen iti niebe isu a dandani saanmin a makita ti turongenmi. Ngem nabang-arankami idi nakitamin ti dagusmi! Sinindianmi ti paglutuan, ket in-inut a pimmudot ti siled. Naragsakkami uray nabannogkami iti natagtag a panagluganmi iti snowmobile iti nagmalmalem.
Apagdarikmat a limmabas ti rabii. Kabigatanna, inluganmi manen dagiti garetmi sakami simmalog. Sinurotmi ti timmangkenen a karayan ket nakadanonkami iti sabali a pagdagusan. Adda naam-ammomi nga agtutubo a lalaki ket inranudmi kenkuana ti sumagmamano a makapabileg a mensahe ti Biblia. Kalpasanna, insurona ti panglinteganmi a mangtunton iti dalanmi.
Maudin nga aldaw ti ibibisitami. Nagpintas ti nakitami a buya idi simrekkami iti Stabbursdalen National Park. Nasirpatmi dagiti naabbongan iti niebe a bantay a sumilsilap a maraniagan ti init. Nakakitakami iti dakkel a pangen ti ugsa! Sitatalna nga agkutkutkotda iti kaniebean iti kanenda a rettab ken lumot. Nasaripatpatanmi met ti maysa a Sami a nakatugaw iti snowmobile ken siuulimek a mangbambantay kadagiti ugsana. Kaduana ti asona a mangay-aywan kadagiti tarakenna. Sinay-up ti aso ti direksion nga ayanmi sa nagsubli met laeng iti obrana. Kinasabaanmi ti mannakigayyem a makintaraken iti arban, ket dimngeg met kadakami.
Idi agawidkamin, mapampanunotmi ti amin a nakasaritami iti 300 kilometro a dinaliasatmi. Naragsakkami ta nakipasetkami iti panangdanon kadagiti tattao iti naglawa a kaniebean.
[Picture Credit Line iti panid 15]
© Norway Post