SUNGBAT DAGITI SALUDSOD MAIPAPAN ITI BIBLIA

Posible kadi a matarusan ti Biblia?

Ti Biblia ket Sao ti Dios. Nayarig dayta iti surat a naggapu iti naayat nga Ama. (2 Timoteo 3:16) Nailawlawag iti Biblia no kasanotayo a maay-ayo ti Dios, no apay nga ipalpalubosna ti kinadakes, ken ania ti aramidenna iti masanguanan para kadagiti tattao. Ngem dagiti mannursuro iti relihion, binallikugda dagiti pannursuro ti Biblia, isu nga adu a tattao ti agkuna a dida maawatan ti Biblia.​—Aramid 20:29, 30.

Kayat ni Jehova a Dios a maammuantayo ti kinapudno maipapan kenkuana. Dayta ti rason nga intedna ti maysa a libro a matarusantayo.​—Basaem ti 1 Timoteo 2:3, 4.

Kasanom a matarusan ti Biblia?

Malaksid iti panangtedna iti Biblia, nangipaay met ni Jehova iti tulong tapno matarusantayo dayta. Imbaonna ni Jesus a mangisuro kadatayo. (Lucas 4:16-21) Tinulongan ni Jesus dagiti dumdumngeg kenkuana a mangtarus iti Kasuratan ta sinaggaysa nga insalaysayna ti kada bersikulo.​—Basaem ti Lucas 24:27, 32, 45.

Binuangay ni Jesus ti kongregasion Kristiano tapno maitultuloy ti trabaho nga inrugina. (Mateo 28:19, 20) Ita, dagiti tattao ket tultulongan dagiti pudno a pasurot ni Jesus a mangtarus iti isursuro ti Biblia maipapan iti Dios. No kayatmo a matarusan ti Biblia, maragsakan dagiti Saksi ni Jehova a tumulong kenka.​—Basaem ti Aramid 8:30, 31.