Adu nga Apit!

IMPADTO ni Jesus a dakkel ti anien dagiti pasurotna iti daytoy a tiempo ti panungpalan. (Mat. 9:37; 24:14) Kitaentayo no kasano a naisangsangayan ti pannakatungpal dayta iti rehion ti Transcarpathia, Ukraine. Iti laeng tallo nga agaassideg nga ilina, adda 50 a kongregasion ken nasurok a 5,400 nga agibumbunannag.a Kinapudnona, Saksi ni Jehova ti 1 iti kada 4 iti napagtitipon a populasion dagitoy tallo nga ili!

Ania ti kasasaad ti teritoriada? “Respetuen dagiti umili ti Biblia, ipatpategda ti hustisia, nadekket dagiti agkakapamilia, ken naimpusuan nga agtitinnulongda,” kuna ti brother a ni Vasile. Innayonna: “Saan a kanayon nga umanamongda iti patpatientayo. Ngem no adda ipakitami manipud iti Biblia, dumngegda a naimbag.”

Siempre, adda dagiti saan a gagangay a karit no mangasaba dagiti kakabsattayo iti lugar nga adu ti bilang dagiti Saksi. Kas pagarigan, adda 134 nga agibumbunannag iti maysa a kongregasion ngem 50 laeng a balay ti adda iti teritoriana! Ania ti aramiden dagiti kakabsat iti dayta a situasion?

Adu a kakabsat ti agsaksakripisio tapno makapangasabada iti lugar a dakkel ti panagkasapulan. “Dua a balay ti kasabaan ti tunggal agibumbunannag iti teritoria ti kongregasionmi,” kuna ti 90 ti tawenna a brother nga agnagan Ionash. “Ditoy laengen purokmi ti pangaskasabaak ta nakapsutakon. Iti nabiit pay, kabaelak ti mapan iti di maas-asak a teritoria nga agarup 100 a milia (160 a kilometro) ti kaadayona, ket mangasabaak iti lengguahe a Hungarian.” Masapul nga agsakripisio dagiti agibumbunannag tapno makatulongda iti dadduma a teritoria. “Agriingak iti 4:00 ti parbangon tapno makaluganak iti tren, ket mangasabaak agingga iti 6:00 ti malem inton agsublin ti tren. Mamindua wenno mamitlo idi nga aramidek dayta iti makalawas,” kuna ni Ionash. Ania ti makunana iti panagsakripisiona? “Nakaragragsakak iti dayta a kita ti ministerio,” kunana. “Maragsakanak ta adda natulongak a pamilia a mangammo iti kinapudno iti lugar nga awan ti kongregasion.”

Siempre, saan nga amin a miembro dagiti kongregasion iti daytoy a lugar ket makapagbiahe iti adayo. Ngem ikagkagumaan ti amin, agraman dagiti nataengan, a naan-anay a wanasen ti teritoriada. Kas resultana, idi 2017, ti napagtitipon a timmabuno iti Memorial kadagitoy tallo nga ili ket gistay doble iti bilang dagiti agibumbunannag​—wenno kagudua ti populasion. Awan duadua a sadinoman ti pagserbiantayo, kaskasdi nga ‘adu ti aramiden iti trabaho ti Apo.’​—1 Cor. 15:58.