Saludsod
● Ania ti umiso a wagas a panangbilang iti timmabuno ti gimong?
Ipakita ti Deuteronomio 31:12, 13 no siasino dagiti masapul a tumabuno kadagiti gimong: “Ummongemto dagiti tattao, dagiti lallaki ken babbai ken dagiti ubbing . . . tapno mangngeganda ken makasursuroda.” No agbilangtayo iti timmabuno, nabatad a ti bilangentayo ket dagiti adulto. Nupay kasta, ti panagimdeng ken panagsursuro kadagiti gimong ket maipaalagad kadagiti amin, uray “[ka]dagiti ubbing.” Idi tiempo ni Nehemias, “amin a nakabalin a dumngeg a makaawat” nagtakderda “manipud iti agsapa agingga iti matuon” a dimngeg iti pannakabasa ti Linteg. (Neh. 8:1-8) Nabatad a dagiti nagimdeng ket inramanna dagiti adu nga ubbing. Nupay saanda a natarusan ti tunggal banag, maawatanda a masapul nga ayaten, dayawen, ken pagtulnoganda ni Jehova a Dios. Wen, dagiti babassit nga ubbing a magunggonaan kadagiti gimong ket masapul a maibilangda a kas paset dagiti timmabuno.
Nabatad a ti maysa a maladaga nga ub-ubbaen ti ina a saan pay a makaawat no ania ti maar-aramid ket di kasapulan a maibilang. Malaksid iti daytoy, ti pannakairaman iti bilang ket agpannuray iti panagimdeng. Siempre, saan a realistiko a namnamaen a makapagdengngeg a sipapasnek ti maysa nga ubing a bassit bayat iti intero a gimong. Nupay kasta, no ti ubing ket ammona ti maar-aramid, nga ipakitana ti panagraem iti banag a maibagbaga, masapul a maibilang uray no ti atensionna ket maiyaw-awan sagpaminsan.
Masapul a sanayen dagiti nagannak ti annakda a mangipateg kadagiti gimong babaen ti panangisuro kadakuada nga agtugaw a siuulimek ken agimdeng bayat ti sangapamiliaan a diskusion iti Biblia. Ibasaan dagiti dadduma ti annakda tapno mapatanor ti panangipategda iti espiritual a bambanag. (Kitaenyo ti Agosto 1, 1988 a Pagwanawanan, panid 13, parapo 13.) Dadduma, tudinganda dagiti annakda nga aginotar iti sumagmamano a nagan wenno punto a mausar kadagiti gimong a mabalin a maestoriadanto iti pamilia kalpasanna. Saan a nainsiriban ti mangitugot iti gimong kadagiti ay-ayam, pagkoloran a libro, wenno umasping a bambanag tapno adda obraen ti ubing.
Dagiti agbilang nga attendant masapul a kitaenda dagiti kasilias ken dadduma pay a lugar tapno mairamanda dagidiay temporario a pimmanaw kadagiti pagtugawanda. Maisingasing a maaramid ti panagbilang bayat ti maudi a kagudua ti gimong.