Makaregular Payunirkayo Kadi Manipud iti Setiembre?
1 Addaankayo kadi iti espiritu ti panagpayunir? Mabalin a madepinar daytoy iti kaadda ti positibo a rikna a mangitungpal iti bilin a mangasaba ken agaramid iti adalan, babaen ti panagsakripisio, nga ipakita ti ayat ken pannakaseknan kadagiti tattao.
2 Dagiti tattao ni Jehova ket buklenda dagiti tattao a mangipakpakita ti kasta nga espiritu kadagitoy nga aldaw. Nupay kasta, ti panaggarasugas ken panagsikor iti inaldaw a panagbiag ti mabalin a mangpabaaw iti regta a maipaay iti espiritual a bambanag. Kada tao ti masapul a mangisaludsod iti bagina, ‘Addaanak kadi iti espiritu ti payunir? Palpalubosak aya daytoy a sistema dagiti bambanag a mangagaw kaniak iti dayta? Itantandudok kadi iti espiritu ti panagpayunir iti kongregasion? Ania ti maaramidak tapno maparukmak iti negatibo a rikna ti panagpayunir?’
3 Apay a dikay rugian itan nga usigen a serioso iti posibilidad a rugianyo ti agregular payunir iti Setiembre, nga isu ti rugi iti 1992 a tawen ti serbisio? Adu kadakayo ti nagserbin a kas auxiliary payunir iti kallabes a kalgaw. Naragpatyo kadi dagiti kalatyo a 60 nga oras? No kasta, no nakairugikayo iti adu a panagadal ti Biblia, awan duadua a kayatyo ti agtultuloy a payunir. Babaen ti panangnayon iti sabali a maysa nga oras iti kada aldaw, mabaelanyo ti agaplikar a kas maysa a regular payunir a mangrugi iti Setiembre. Itan ti tiempo nga ipaayyo iti nainkararagan a panangusig iti daytoy.
4 Bayat a ti espiritu iti payunir ket rumayray iti kongregasion, rumangrang met iti bara ken espiritualidad dagiti kakabsat. Gapuna, bayat nga umadani iti 1992 a tawen ti serbisio, aramidenyo a pangeddeng a tumulongkayo a mangkultibar iti espiritu ti kinapayunir iti kongregasionyo. Agbalinkayo a regular wenno auxiliary payunir no kabaelanyo. Ngem maysakayo man a payunir wenno agibumbunannag, itultuloyyo nga ipakita iti espiritu ti payunir bayat iti sumaruno a tawen ti serbisio.