Panagsarungkar nga Addaan Kalat a Mairugi iti Panagadal ti Biblia
1 Kalpasan a masarakan iti maysa nga interesado a tao, kayattayo a mataginayon ti interesna. Mabalin a ti panagsarungkar ket maiturong iti panagadal ti Biblia. Usigenyo dagitoy sumaruno a singasing a maipaay iti epektibo a panagsarungkar.
Iti ngudo ti umuna a sarungkar, mabalinyo nga ipasdek iti pundasion a maipaay ti sabali panagsarungkar babaen iti panagsaludsodyo:
◼ “Masdaawkayo kadi no apay a nagadu ti relihion?” Inton agsublikayo mabalinyo a kunaen: “Idi naudi a sarungkarko, napagsaritaantayo no apay a nagadu ti relihion. Kayatko nga ibasa kadakayo ita iti maysa a banag a makapainteres a nasarakak iti daytoy a saludsod.” Iturong iti panid 361 ti Panakirinnason a libro ken basaen iti benneg idiay baba ti subtema nga “Apay a nagadu dagiti relihion?”
2 Masarakan aya ti Dios iti amin a relihion? Tapno ti Dios ket adda iti maysa a relihion, masapul nga agpataud kadagiti nasayaat a bunga.
Tapno mairugi ti panagsarungkar, mabalinyo nga isaludsod:
◼ “Kasano nga apektaran ti relihion iti kondukta ti maysa a tao? Ti nakuna ni Jesus iti Mateo 7:17-20 isut’ mangted kadatayo ti pagalagadan a masapul a suroten iti pudno a relihion.” Basaen a diretso ti kasuratan manipud iti ngudo ti parapo 19 iti panid 12 daytoy libro a Ti Panangbiruk ti Sangatauan iti Dios. Kalpasanna saludsoden iti bumalay no ania ti makitana iti ladawan idiay panid 13. Sumaruno, basaen dagiti umuna a dua a sentensia idiay parapo 20. “Dagitoy a naranggas nga aramid ti mangipabigbig kadagiti relihion a saanda a sumursurot iti panangidalan ni Kristo maipapan ti panagayat iti maysa ken maysa, uray pay kadagiti kabusor. Iti sumaruno a sarungkarko, nalabit a pagsaritaantayo dagiti naimbag a bunga a patauden ti pudno a relihion.”
3 Ania ti masanguanan dagidiay a mangbiruk iti pudno a Dios? Ti diskusion iti daytoy a saludsod manipud Ti Panangbiruk ti Sangatauan iti Dios a libro ti mabalin a mangiturong iti maysa a panagadal ti Biblia.
Kas pangirugi iti saritaan, mabalinyo a kunaen:
◼ “Gapu iti problema ti ekonomia wenno rigat iti panagbiag, adu a tattao ti agduadua no adda pay laeng positibo a panangmatmatda iti masanguanan. Ngem ti Biblia ket makaparegta unay iti daytoy. Palubosandak a mangipakita kadakayo iti kari ti Dios iti Isaias 65:21, 22, 25. [Mabasa ken makomentuan ti ababa.] Ti libro a Ti Panangbiruk ti Sangatauan iti Dios sungbatanna dagiti makapainteres a saludsod maipapan daytoy, a mangrugi ditoy parapo 17 iti panid 372.” Kalpasanna maidemostra iti panagadal ti Biblia, a mausar iti parapo 17-20. “Iti sumaruno a lawas kayatko a mausig iti saludsod nga, Ania ti pamuon a maipaay iti baro a lubong a naikari ti Biblia?”
4 Nainsiriban koma nga usarenyo ti natda a tiempo a mangted iti naan-anay a pammaneknek. (Maidilig iti Aramid 20:21.) Ti panagsarungkar nga addaan iti kalat a mairugi ti panagadal iti Biblia ti nalabit a kaipapananna iti biag nga agnanayon kadagidiay a makasabaantayo.