Makiramankayo Kadi iti Impormal a Panangasaba iti Disiembre?
1 Ti regular a rikos iti biagtayo ramanenna ti masinnunuo a periodo iti pannakisao kadagiti tattao maipapan ken Jehova. Mangitaningtayo iti tiempo a mangasaba a pormal iti balaybalay, agsarungkar, ken mangidaulo iti panagadal ti Biblia. Nupay kasta, adu dagiti impormal nga okasion a makisaotayo kadagiti tattao maipapan iti kinapudno. Awagantayo daytoy iti impormal a panangasaba.
2 Dadduma kadagiti agibumbunannag ti makasarak iti oportunidad a makipaset iti daytoy a porma ti ministerio. Mabalintayo amin ti agalerto kadagitoy nga okasion iti Disiembre bayat nga agbiahe a mapan ken agawid manipud iti kombension, panagbakasion, ken panangsarungkar iti kakabagian. Gundawayanyo aya dagiti oportunidad ti impormal a panangasaba iti daytoy a bulan?
3 Agaramidkayo iti Nasakbay a Plano: Ti panagsagana isut’ mangkabael kadatayo a mangasaba nga epektibo iti impormal a wagas. Tapno matulongan a mangaramid iti daytoy, naarmasantayo ti nagduduma a publikasion. Mainayon iti Ti Pagwanawanan ken Agriingkayo!, addaantayo ti nawadwad a tract a naglaon iti suheto a mangriing ti interes. Adda dagiti broshur a makaallukoy kadagiti tattao iti nagduduma a nalikudan ken relihion. Addaantayo met kadagiti maibulsa a libro iti nagduduma a suheto a makapainteres. Ania a publikasion ti pagragsakanyo unay nga usaren? Panunotenyo daytoy kas maysa a pamilia. Kalpasanna aginsayokayo no ania ti sawenyo no dumteng iti maitutop nga okasion.
4 No Addakayo iti Bakasion: Maysa nga ekselente a tiempo iti impormal a panangasaba isut’ bayat ti bakasion. Nakaplanokayo aya nga agbakasion babaen iti tren wenno bus? No kasta mangitugotkayo ti Biblia ken publikasion a nadakamat iti ngato. Ti panagbasa kadagita a publikasion iti transportasion ti publiko isut’ masansan a mangpasged iti saritaan. No agbiahekayo babaen iti kotse, panunotenyo no ania ti sawenyo no sumardengkayo iti gasolinaan wenno restauran. Kadagita nga okasion, adda latta kadakayo ti bassit nga abasto dagiti tract nga ited kadagiti interesado a tattao. No nakasardengkayo iti maysa a mabuya a lugar wenno parke ken maysa nga igid ti baybay, nalabit a mairugiyo iti saritaan babaen ti panagkunayo: “Saan ngata a nagpintas no ti intero a daga ket kastoy iti langana?”
5 Idiay Kombension ti Distrito: Makasaraktayo met ti okasion a mangasaba iti impormal idiay pagkombensionan ti distrito. Adu ti nagballigi a nakisao kadagiti empleado iti hotel ken restauran wenno kadagiti tattao ti lansangan wenno agur-uray iti lugan. Siguruenyo nga ikapet iti maysa a lapel card bayat ti kombension. Nalabit a mapankayo iti maysa a paggatangan ket saludsoden dagiti tattao no ania ti itakderan dayta a lapel card. Mangiturong daytoy iti pannangtedyo ti pammaneknek.
6 Dagiti bakasion ken kombension ket itukonda kadatayo ti represko ken panagaliwaksay, ngem ditay koma malab-awan iti gundaway a mangted ti impormal a panangasaba. Daytoy a metodo ti panangasaba ket nabunga, gapuna a dagiti adipen ni Jehova ket makiramanda iti dayta. Kas idi ken Jesus, ti koma ayattayo iti pada a tao ti mangtignay kadatayo nga agsao iti tunggal maiparbeng nga okasion!—Mat. 5:14-16.