Saludsod

◼ Iti teokratiko a kasar, mano a saksi ti masapul nga adda sadiay nga agpirma iti kontrata ti panagasawa a kadua dagiti agpareha a makasar?

Manipud kadagiti naawatmi a korespondensia, agminar a daytoy a saludsod ket namataud ti pannakaseknan dagiti sumagmamano a kakabsat. Adda dadduma a nawadwad unay iti bilang dagiti saksi ti kasarda, nga isu ti namkuatan dagiti sabsabli a nagsurat iti Sosiedad. Tapno adda nagkaykaysa a panangmatmat iti daytoy a banag, ragsakenmi ita nga ituyang dagiti sumaruno a puntos.​—1 Cor. 1:10.

Daydiay The Watchtower a Hunio 15, 1952 iti panid 360 kunaenna: “Ti nobia ken nobio ket kasapulan a dumatagda ken maaddaanda ti rekord iti saklang dagiti saksi nga awatenda ti obligasion iti panagkallaysa; ket praktikal a kadagiti amin nga estado ken probinsia kasapulanda ti dua a saksi a mainayon iti mangimaton a ministro a mangpirma ti sertipiko iti panagasawa.” Igunamgunam met daytoy nga artikulo ti punto babaen iti kaadda ti maysa a bassit a ladawan a mangipakita laeng kadagiti agpareha a makasar, dua a saksi, ken ti mangimaton a ministro. Ditoy Pilipinas, dua laeng a legal a saksi ti kasapulan, kas ipakita iti kinapudno ti espasio idiay Marriage Contract a paglugaran dagiti dua laeng a saksi.

Idinto ta ti laeng panggep dagiti saksi ket pennekenda iti legal a kasapulan ti panagasawa, ngarud ti aniaman a surok daytoy ket saanen a kasapulan. Ngem, apay a dagiti kakabsat a lallaki ken babbai ket kayatda ti maaddaan iti nasursurok ngem ti dua a saksi nga agpirma iti dokumento ti panagasawada? Nalabit kadi a sursurotentayo pay laeng iti nailubongan a kustombre? Agpegpeggadtayo aya iti napammarang a kinaparammag iti saklang dagiti sabsabali?​—1 Juan 2:15-17.

Mariknami a ti nasao ditoy ngato a wagas nga adda laeng dua a saksi, maysa a lalaki ken maysa a babai, nga agpirma iti Marriage Contract ket isu koman ti suroten dagiti amin a maseknan kadagiti masanguanan a kaskasar nga idaulo dagiti dinutokan ti Sosiedad nga opisial a mangasar. Manamnama a daytoy a pakaammo ket tumulong kadagiti amin a mangala ti mas natimbeng a panangalagad iti daytoy a banag ngem ti kinapudno iti dadduma a kaso ti napalabas.