Ti Yearbook—Maysa a Deposito ti Pammaregta
1 Dagiti report ken kapadasan maipapan iti nakaskasdaaw nga ar-aramid ni Jehova ti kanayon a makabang-ar iti ad-adipen ti Dios. (Job 38:4, 7; Prov. 25:25; Ara. 15:31) Dayta ti gapu no apay a daytoy Yearbook of Jehovah’s Witnesses ket maysa a deposito wenno pagbagasan iti pammaregta.
2 Tunggal Yearbook idatagna dagiti report iti aglawlaw ti lubong maipapan iti aktibidad dagiti Saksi ni Jehova. Dagiti makaparegta a kapadasan ti mangilawlawag iti panangidalan, panangsaluad ken panangbendision ni Jehova kadagiti tattaona. Ibaga ti Yearbook maipapan kadagiti natured a lallaki ken babbai a nangpanaw iti pamilia, gagayyem, ken ti pagilianda tapno maiyegda iti kinapudno ti Biblia kadagiti tattao iti amin a kontinente.
3 Ti Yearbook isut’ nangtignay kadagiti adu a managbasa a parang-ayenda iti serbisioda ti Dios. Maysa a managbasa ti nagsurat: “Saanko a mabasa a sipapardas. Ngem no ania ti nabasakon ket pudno a makaparegta unay. Mariknak nga ad-adu pay koma ti maaramidak a panangikasaba iti naimbag a damag no makitak ti naaramidan dagiti dadduma iti sidong ti adu a pakakumikoman.”
4 Kada tawen manipud idi 1927, ti Yearbook of Jehovah’s Witnesses isut’ nagbalin a pudno a deposito wenno pagbagasan iti makaparegta a report ken kapadasan. Naan-anay kadi a nagunggonaankayo iti daytoy nagpaiduma a taudan ti pammaregta? Tapno maaramid dayta, siguruenyo a basaen ti Yearbook apaman a maawatyo, nalabit nga iti Enero wenno nasapa a Pebrero. Iti kasta ti las-ud iti makatawen, repasuenyo dagiti masinunuo a pasetna a makaparegta kadakayo ken ti pamiliayo.