Agmulakayo iti Nawadwad Ngem Buyogen ti Kinaannad
1 Ammo ti tunggal mannalon a no nawadwad ti imulana, nawadwad ti apitenna, ngem no bassit ti imulana, sigurado a bassit ti apitenna. (2 Cor. 9:6) Saan nga agmula dagiti mannalon iti natikag a daga tapno di masayang ti bin-i. Kasta met la a panagannad ti kasapulan no itukontayo dagiti literaturatayo idiay tay-ak. Kayattay nga ikkan ti literatura dagidiay interesado a mangbasa iti dayta.
2 Madlawyo kadi a maur-urnong dagiti magasin, broshur, ken dadduma pay a publikasion iti estante ti pagtaengan idinto ta mabalin met nga usaren dagitoy a pangisuro iti kinapudno kadagiti maikari a tattao iti teritoria? (Idiligyo ti Mateo 25:25.) Bumdengkayo kadi no dadduma a mangitukon kadagiti magasin wenno dadduma a literatura iti damo a pannakisaritayo gapu laeng ta alusiisenkayo a mangdakamat no kasano a masupsuportaran ti trabaho a panangikasaba iti Pagarian? Nakita dagiti aduan kapadasan nga agibumbunannag a mangted iti donasion dagiti manangapresiar a bumalay no simple ken direkta a mailawlawag kadakuada ti pakausaran ti donasion para iti trabaho ti Pagarian.
3 Mabalinyo a kunaen:
◼ “Mabalin a masdaawkayo no apay nga itukonmi nga awan bayadna ti literatura. Paset daytoy ti sangalubongan a trabaho a panangisuro a masupsuportaran babaen ti boluntario a donasion. No kayatyo ti mangted iti bassit a donasion para iti daytoy a trabaho, maragsakanak a mangawat iti donasionyo.”
4 Adu a bumalay ti agsaludsod no sagmamano ti literatura.
Mabalinyo nga isungbat:
◼ “Awan ti bayad ti literatura agsipud ta masupsuportaran ti trabahomi babaen dagiti boluntario a donasion. No kayatyo ti mangted ita iti bassit a donasion, maragsakankami a mangusar iti dayta iti sangalubongan a trabaho a panangasaba.”
5 Bayat ti panagmagasin, dagiti dadduma nga agibumbunannag ipakitada ti “publisher’s page” ti magasin (ti panid a mangipakita no siasino dagiti nagipablaak) sada kunaen:
◼ “Kas makitayo iti daytoy a panid, masupsuportaran ti trabahomi babaen dagiti boluntario a donasion. No kayatyo ti mangted iti bassit a donasion kas tulong iti daytoy a trabaho, siak ti makaammo a mangipatulod.”
6 Ditay koma pulos bumdeng nga agimula iti bin-i ti Pagarian gapu laeng ta alusiisentayo a mangibaga no kasano a masupsuportaran ti trabahotayo. Maigiddato iti dayta, masapul ti kinaannad tapno saan a masayang dagiti literaturatayo iti ‘nabato a daga.’ (Mar. 4:5, 6, 16, 17) Maragsakan a mangipaay iti material a tulong dagidiay mangapresiar iti naimbag a damag nga idandanontayo.—Idiligyo ti Mateo 10:42.