Naan-anay a Suportaran iti Miting Publiko a Programa ti Kongregasionyo
1 Iti adun a tawtawen a napalabas maysa nga agtutubo a lalaki ti nakasarak iti handbill a nangipablaak ti gimong iti lokal a kongregasion. Idinto ta agsapsapul iti kinapudno, naikeddengna ti tumabuno iti Miting Publiko bayat dayta a Domingo, ket nasapa a simmangpet idiay pagtaripnongan. Maysa nga agibumbunannag ti sibabara a nangablaaw kenkuana ken intukonna iti panagadal ti Biblia. Daytoy nga agtutubo ti nadaras a nagprogreso ken nabautisaran kalpasan iti sumagmamano a bulan. Makaadaltayo ti tallo a makatulong a leksion manipud iti daytoy a kapadasan.
2 Umuna, ti Miting Publiko ket naipablaak. Us-usarenyo kadi dagiti handbill a mangipablaak iti Miting Publiko ti kongregasionyo? No iyanunsio ti tserman iti titulo ti palawag iti publiko a maisango ti sumuno a lawas, panunotenyo dagiti adda idiay teritoriayo a mabalin nga interesado iti dayta a suheto. Adda dadduma a tattao a dida kayat ti agbasa, ngem situtulokda a dumngeg iti maysa a Nainkasuratan a topiko.
3 Maikadua, ti agdadamo ket naipaayan iti nabara a panangabrasa. Iplanoyo ti nasapa a sumangpet iti paggigimongan tapno makablaawanyo dagiti kakabsat ken interesado a tattao. (Heb. 10:24) No ti agdadamo ket tumabuno iti umuna a daras, saanna nga ammo no ania dagiti padaananna. Mailawlawag kenkuana a dagiti gimongtayo ti mairugi babaen iti kanta ken kararag, ken maibaga kenkuana no kasano a maidaulo dagiti gimongtayo. No maitutop, awisenyo a makikatugaw kadakayo tapno makiraman iti Biblia ken pagkantaanyo. Awisenyo nga agsaludsod apaman nga agngudo iti gimong.
4 Maikatlo, ti palawag ket naisagana a naimbag. Dagidiay mangibagi ti kongregasion kas pumapalawag iti publiko ti mangusar iti adu a tiempo nga agsagana ti material tapno dagiti tumabuno ket matignayda iti ayat ken naimbag nga ar-aramid. Amintayo ita ti adda iti sidong ti pakakumikoman, ket ti makabang-ar a kinapudno manipud iti Sao ti Dios isut’ tumulong kadatayo nga agibtur. Siempre, ti palawag iti publiko ket saan a makagunggona kadatayo no saantayo nga agimdeng a naimbag iti maipalawag. Marigatantayo aya no dadduma a mangipamaysa iti maipalpalawag? Makatulong no mangalakayo iti ababa a nota, a kas no tiempo iti kombensiontayo. Iti panagsagana, utobenyo no ania dagiti ammoyon iti dayta a suheto ken dagiti tumanor a saludsod maipapan dayta. Sa siputanyo no kasano a masungbatan ti agpalawag dagiti saludsod. Siguruenyo a suroten iti Bibliayo ti kada Kasuratan a mabasa ken mailawlawag.
5 Impaay ti Sosiedad dagiti palawag ti publiko iti nagduduma suheto. Makitunos iti mangidaulo a manangaywan wenno ti kabsat a dinutokanna, ti bagi dagiti panglakayen iti makidanggay ti programa iti Miting Publiko ti kongregasion tapno dagiti suheto ket maidatag a maitunos iti lokal a kasapulan. Dikay paayen iti aniaman kadagitoy a nasken a pakaadalan, ket paregtaenyo dagiti agdadamo a magunggonaan a naan-anay manipud iti linawas a Miting Publiko ti kongregasionyo.