Agtultuloykayo a Magna a Sirarang-ay iti Naurnos a Rutina
1 Addaan ni apostol Pablo ti nagpaiduma a rikna iti kongregasion ti Filipos, isu a natulonganna a naipasdek. Nagyaman unay iti material a paraburda ken nagsao maipapan iti naimbag nga ehemploda.—2 Cor. 8:1-6.
2 Ti surat ni Pablo kadagiti taga Filipos ket natignay babaen iti napasnek nga ayat. Iti Insight a libro, Tomo 2, panid 631, nagreport: “Iti intero a surat imparegtana iti kongregasion ti Filipos nga agtultuloyda iti naimbag a kurso—a sapulenda ti dakdakkel a pannakaawat ken petpetanda a naimbag iti Sao ti biag, ti nabilbileg a pammati, ken ti namnama iti mapasungad a gunggona.” Nangipangagda a sibabara, a nasementoda iti singgalut ni ayat agraman ti apostol. Dagiti sasao ni Pablo ti nagpaiduma ti kaipapananna ita kadatayo, ken addaantayo ti naimbag a rason nga agimdeng nangruna iti pammagbagana idiay Filipos 3:15-17.
3 Nasken ti Nataengan a Kababalin ti Isip: Iti Filipos 3:15, nagsurat ni Pablo kas maysa a tao a natawenan iti kapadasan. Immararaw kadakuada kas nataengan a Kristiano no maipapan iti kababalin ti isip wenno panunot. Bayat a ti kababalinda iti panunot ket maisilnag iti kinapakumbaba ken panangipateg kas indemostra ni Jesus, agtultuloy nga “awan pakababalawanyo ken natarnawkay koma, annak ti Dios nga awan pakapilawanna . . . a taginayonenyo ti nairut a panangpetpet iti sao ti biag.” (Fil. 2:15, 16) No basaen dagitoy a sasao mariknatayo a makisasao ni Pablo kadatayo. Iti kasta sigagagartayo a maadda met dayta a kababalin ti isip a kas ken Jesus, nga iparangarang ti panangipateg iti pribilehiotayo. Agtultuloytayo nga umasog ken Jehova iti kararag, a kiddawen ti tulongna iti daytoy ken dagiti dadduma a bambanag.—Fil. 4:6, 7.
4 Kas ipasimudaag ti Filipos 3:16, ikagumaantayo amin ti agprogreso wenno rumang-ay. Ti sao a “panagrang-ay” kaipapananna ti “agtignay nga umaddang, umabante.” Dagiti tattao a naprogreso ket “interesadoda kadagiti baro nga ideya, panangsarak, wenno oportunidad.” Kayat ni Pablo dagiti taga Filipos a maawatanda a ti Kristianidad ket saan a nasugnad ken dagidiay agkuna a Kristiano masapul nga umabanteda. Ti narang-ay nga espiritu ti maipakita babaen ti natulok a panangusig iti bagbagida, a bigbigenda dagiti pagkapuyanda, ken ragpatenda dagiti oportunidad a mangaramid pay ti ad-adu. Ita ti naindagaan nga organisasion ni Jehova ket agtultuloy nga agprogreso. Tunggal maysa kadatayo ti masapul a makidanggay kenkuana, a gundawayan dagiti amin a paraburna ken makiraman a naan-anay iti trabahona.
5 Ti Panagrang-ay Kasapulanna ti Naurnos a Rutina: Nagtultuloy ni Pablo a namaregta kadagiti kakabsatna nga “itultuloytayo koma ti magna a siuurnos iti daytoy met laeng a rutina.” (Fil. 3:16) Kiddawen kadatayo ti kinaurnos nga isaad dagiti bambanag iti umiso a lugarda maipapan ti relasion iti tunggal maysa. Dagiti mismo a Kristiano idiay Filipos ti nagsaad iti umiso a lugarda, a nadekketda a sangsangkamaysa iti organisasion ni Jehova. Dagiti biagda ti naiturayan babaen iti linteg ti ayat. (Juan 15:17; Fil. 2:1, 2) Dinawat ni Pablo kadakuada nga “agtignaykayo iti pamay-an a maikari iti naimbag a damag.” (Fil. 1:27) Ti kinaurnos ken naimbag a kababalin ket nasken met ita kadagiti Kristiano.
6 Ti maysa a rutina isut’ nairuam nga aramid ti maysa a tao babaen iti naiwayat a pamay-an. Ti kaadda ti rutina ket pagimbagan agsipud ta saantayon nga agsarimadeng tapno panunoten no ania ti sumaruno nga aramiden—ta nalpasen a naipasdek ti maysa a padron a masapul a suroten babaen iti puersa a nairuamen.
7 Ti naurnos a teokratiko a rutina isut’ buklen dagiti naimbag a nakairuaman—agraman ranta a mamabileg kadatayo iti espiritual, tumulong iti dadduma, ken mangaramid ti ad-adu pay iti serbisio ni Jehova. Tapno maragpat dagitoy kasapulanna nga ipasdek iti rutina ti personal a panagadal, regular a pannakigimong, ken pannakipaset iti panangasaba a trabaho.
8 Dagiti Nasken a Mairaman iti Naurnos a Rutina: Ti maysa a nasken isu “ti umiso a pannakaammo ken naan-anay a panangilasin.” (Fil. 1:9) Ti personal a panagadal ti mangpauneg iti pammatitayo, pabilgenna ti ayat iti kinapudno, ken gutugotennatayo iti naimbag nga ar-aramid. Nupay kasta, marigatan dagiti dadduma a mangiruam iti panagadal. Maysa kadagiti rason isut’ kinakurang ti tiempo.
9 Ti panagbasa ti Biblia iti inaldaw ket “makagunggona” iti amin a wagas. (2 Tim. 3:16, 17) Kasanotayo a maitiempo ti panagadal ti Biblia iti inaldaw a rutina? Maaramid dayta dagiti dadduma babaen ti sumagmamano a minutos a kinasapa iti kada bigat, bayat a naalibtak ti panunotda. Dagiti dadduma ti agbasa iti sumagmamano a minutos sakbay a maturogda. Dagiti assawa a babbai iti pagtaengan ti makausar ti bassit a tiempo iti malem sakbay a makaawid dagiti kabbalay manipud ti trabaho wenno pagadalan. Mainayon iti panagbasa ti Biblia, iraman dagiti dadduma ti agbasa iti Manangiwaragawag a libro iti linawas a rutina ti panagadalda.
10 No ipasdektayo ti baro a kababalin, nalabit a maisupadi iti dati nga ugalitayo. Iti napalabas impalubostayo dagiti saan a nasken nga aktibidad a mangibus ti tiempotayo. Saan a nalaka ti lumuk-at iti dayta a kababalin. Awan koma ti mangidiktar iti kababalin nga agadal; ni saantayo met a kasapulan ti makirinnisut no ania ti aramiden iti daytoy a banag. Ti regular nga ugali iti panagadal ti agpannuray iti panangipateg kadagidiay “napatpateg a bambanag” ken ti kinatulok “a gatangenyo ti nainggundawayan a tiempo.”—Fil. 1:10; Efe. 5:16.
11 Alaen iti Kristiano a gimgimong ti nasken a papel iti espiritual a panagrang-aytayo, a mangted iti panangiwanwan ken pammaregta. Ngarud, ti itatabuno kadagiti gimong isut’ sabali a nasken a paset ti naurnos a rutinatayo. Inggunamgunam ni Pablo a dayta ket saan a maysa a banag nga ikeddeng laeng no kayat nga aramiden.—Heb. 10:24, 25.
12 Kasanotayo a maipakita ti kinaurnos no agplanotayo iti iskediol? Iyurnos dagiti dadduma ti masinunuo a tiempo a mangsango iti personal nga ar-aramid kalpasanna iballaetda dagiti gimong no adda pay lugarda, ngem masapul koma a dagitoy ti mailugar nga umuna. Dagiti linawas a gimongtayo ti unaen, bayat a maiplano dagiti dadduma nga aktibidad a mailugar no awan iti gimong.
13 Kasapulan ti regular a pannakigimong babaen iti naimbag a plano ken napamiliaan a kooperasion. Kaaduan kadatayo ti kupado iti iskediolna kadagiti ngalay ti lawas. Kaipapanan daytoy a ti pangrabii ket masapul a maisapa tapno adda tiempo ti pamilia a mangan, agrubbuat, ken sumangpet iti gimong sakbay a mangrugi. Iti daytoy a panggep masapul a makidanggay dagiti miembro ti pamilia iti nagduduma a wagas.
14 Ti regular a serbisio iti tay-ak ti saan koma a maliwayan no kayattayo ti agrang-ay iti naurnos a rutina. Mabigbigtayo amin ti rebbengen a mangikasaba iti damag ti Pagarian. Dayta ti nakaaramidantayo a Saksi ni Jehova. (Isa. 43:10) Idinto ta isu ti kaganatan a trabaho a maaramid ita nga aldaw, saantayo koma a matmatan a kas maysa a sanguen no adda tiempo a paset iti inaldaw a rutinatayo. Imballaag ni Pablo: “Baeten kenkuana kankanayon koma nga idatontayo iti Dios ti sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti naganna.”—Heb. 13:15.
15 No iplanotayo ti aktibidadtayo iti kada lawas, masapul a maipuera iti masnup a tiempo a maipaay iti tay-ak ti serbisio. Nasayaat no padasen ti makiraman iti amin a benneg ti serbisio, kas ti panagbalaybalay a trabaho, panagsarungkar, ken mangidaulo iti panagadal ti Biblia. Mabalin nga sakbayan nga iplano iti impormal a panangasaba babaen ti panangawit iti literatura ken naalibtak kadagiti gundaway a mangiruangan ti saritaan. Idinto ta masansantayo a rummuar a kakuyog dagiti dadduma, masapul a saludsoden maipapan ti iskediolda tapno pagtulagan iti urnos ti kumbeniente a panagkuyog.
16 Ti rutina ti panangasaba isut’ masapul a salimetmetan uray pay iti sidong ti kinaaleng-aleng idiay teritoria. Sigud nga ammotayon a sumagmamano laeng ti mangipangag. (Mat. 13:15; 24:9) Nadutokan ni Ezekiel a mangasaba kadagiti tattao a ‘rebelioso, nasabrak, ken natangken ti panagpuspusoda.’ Inkari ni Jehova a tulonganna ni Ezekiel a mangaramid a “natangken ti mugingna a kas iti katangken ti mugingda,” kayatna a sawen “kas diamante, ken bato a pamulinawen.” (Ezek. 2:3, 4; 3:7-9) Kasapulan ngarud ti panagibtur iti regular a rutina ti serbisio.
17 Dagiti Naimbag nga Ehemplo a Pagtuladan: Kaaduan kadatayo ti makaaramid iti nasaysayaat idiay tay-ak ti serbisio no adda mangidaulo. Ni Pablo ken dagiti kaduana ti nangituyang iti naimbag nga ulidan, ket kiniddawna kadagiti dadduma a tumuladda kenkuana.—Fil. 3:17.
18 Kadagitoy nga aldaw, kasapulantayo met dagiti naimbag a pagulidanan. Iti Hebreo 13:7, kiniddaw ni Pablo: “Lagipenyo dagidiay mangidadaulo kadakayo, . . . ket bayat nga ut-utobenyo ti pagbanagan ti kababalinda tuladenyo ti pammatida.” Siempre, ni Kristo ti Ehemplotayo, ngem matuladtayo met ti pammati dagidiay a mangidaulo kadatayo. Kas ken Pablo, kasapulan dagiti panglakayen ti agbalin a naimbag a paguadan dagiti sabsabali. Tunggal maysa ti maaddaan ti naurnos a rutina a manguna iti intereses ti Pagarian. Uray pay adda sekular ken napamilian nga obligasion, dagiti panglakayen ket addaanda iti naipasdek a naimbag a kababalin iti personal a panagadal, makigimong, ken mangidaulo iti tay-ak ti serbisio. No dagiti panglakayen ket ‘mangidauloda iti sangakabbalayanda iti naimbag a wagas,’ maparegta dagiti amin iti kongregasion a makipagtrabo iti naurnos a rutina.—1 Tim. 3:4, 5.
19 Dagiti Kalat iti Baro a Tawen ti Serbisio: Ti rugi iti baro a tawen a serbisio isut’ maitutop a tiempo a mangisilnag iti personal a rutina. Ania ti ipakita ti panangrepaso iti aktibidadtayo iti napalabas a tawen? Mabalintayo kadi a parang-ayen iti rukod ti aktibidadtayo? Nalabit a simmayaat iti personal a panagadaltayo. Amangan no regulartayon a makigimgimong wenno nalabit a naparang-aytayon ti serbisiotayo iti tay-ak babaen ti panagpalistatayo nga auxiliary payunir. Mabalin a nakaaramidtayo iti masinunuo a tignay iti Kristiano a kinaanus a maipaay a pagimbagan ti kongregasion ken pamilia. No kasta, adda gapu nga agrag-otayo ta nagnatayo iti wagas a pagayatan ti Dios, ken addaantayo ti rason “nga itultuloyyo nga aramiden dayta nga ad-adda pay a naan-anay.”—1 Tes. 4:1.
20 Kasano ngay no ti andar iti rutinatayo ket kasla nasimparat ken aggansal? Kasanotayo nga apektado iti naespirituan? Malapdan aya ti panagrang-aytayo gapu iti maysa a rason? Mangrugi ti panagrang-ay babaen ti panagdawat iti tulong ken Jehova. (Fil. 4:6, 13) Palawagenyo ti kasapulanyo iti sangapamiliaan, a kiddawen ti tulongda a mangritubar iti rutinayo. No adda problemayo, dumawatkayo ti badang dagiti panglakayen. No igaed ken ipangagtayo iti panangiturong ni Jehova, masigurotayo a maliklikan “ti panagbalinyo a di aktibo wenno di nabunga.”—2 Ped. 1:5-8.
21 Ti pannagna iti naurnos a rutina isut’ mangiturong iti bendision a maiparbeng iti panagbannogyo. Bayat nga ikeddengyo ti magna a sirarang-ay iti naurnos a rutina, “dikay agpalpallailang iti aramidyo. Nasgedkayo koma iti espiritu. Agpaadipenkayo ken Jehova.” (Roma 12:11)—Maipaay iti mas detaliado a panangusig iti daytoy a suheto, kitaenyo ti The Watchtower iti Mayo 1, 1985, pinanid 13-17 (Nobiembre 1, 1985, iti Iloko).