Maysa a Modelo a Sisisinged a Suroten
1 Perpekto idi a modelo ni Jesus kadagiti adalanna. Nupay ditay magaw-at ti pagrukodanna iti kinaperpekto, maidagadag kadatayo a ‘suroten a sisisinged dagiti addangna.’ (1 Ped. 2:21) Kas ken Jesus, tarigagayantay koma a sireregta nga iburay ti kinapudno iti sabsabali.
2 Saan laeng a manangaskasaba ni Jesus; isu idi ti kalaingan a mannursuro. “Nagsiddaaw unay dagiti bunggoy iti wagas ti panangisurona.” (Mat. 7:28) Apay nga isu ket epektibo unay? Intay kitaen a naimbag ti ‘wagas ti panangisurona.’
3 No Kasanotay a Masurot ni Jesus: Ti motibo ni Jesus idi ket tapno maidayaw ni Jehova ken tapno maipadayag ti Naganna. (Juan 17:4, 26) Kasta met no mangisurotayo, ti koma motibotayo ket mangidayaw ken Jehova a saan ket nga iturong ti atension iti bagbagitayo.
4 Amin nga insuro ni Jesus ket naibatay iti Saot’ Dios ken kanayon nga inusarna ti naipaltiing a Kasuratan. (Mat. 4:4, 7; 19:4; 22:31) Kayattay nga iturong dagiti agdengdengngeg iti Biblia; tapno maipakitatay kadakuada a ti ikaskasaba ken isursurotayo ket naibatay iti kangatuan nga autoridad.
5 Nagaramat ni Jesus kadagiti praktikal, simple nga argumento. Kas pagarigan, iti panangilawlawagna no kasanotay a magun-odan ti pammakawan ti Dios, pinaregtanatay a mamakawan iti sabsabali. (Mat. 6:14, 15) Ikagumaantay koma nga ilawlawag ti mensahe ti Pagarian iti simple, praktikal a wagas.
6 Nagusar ni Jesus kadagiti pangngarig ken salsaludsod a mangtignay iti panunot ti dadduma. (Mat. 13:34, 35; 22:20-22) Dagiti pangngarig a mainaig iti inaldaw a bambanag matulonganna ti tattao a mangawat kadagiti komplikado a doktrina ti Biblia. Agaramattay koma iti salsaludsod a mangparegta kadagiti agdengdengngeg kadatayo a mangusig iti mangngegda. Tumulong kadakuada a maaddaan iti umiso a konklusion dagiti mangiturong a saludsod.
7 Tinutor nga inlawlawag ni Jesus ti narikut a bambanag kadagiti napasnek a tattao a nagimtuod iti ad-adu pay nga impormasion. (Mat. 13:36) Tumulongtay met koma no adda sipapasnek nga agsaludsod. No ditay ammo dagiti sungbat, mabalintay a pagadalan ti tema satayto sublian a sungbatan iti sabali a tiempo.
8 Inaramat ni Jesus dagiti pasamak a mangisuro. Ti pagarigan iti daytoy isut’ panangbuggona iti saka dagiti adalanna. (Juan 13:2-16) No mangipakitatay iti napakumbaba nga espiritu, matignayto dagidiay mayad-adalan a mangyaplikar iti maad-adalda.
9 Inallukoy ni Jesus ti puso ti tao ken ti ayatna iti kinalinteg. Kayattay met a danonen ti puspuso. Ikagumaantay a tignayen ti nakayanakan a tarigagay ti amin nga agdayaw ken agbiag a sitatalna a kadua ti dadduma.
10 Itukontayo kabayatan ti Disiembre ti libro a Ti Katan-okan a Tao a Nagbiag Pay Laeng. Ti panangtuladtay kadagiti kualidad ti panangisuro ni Jesus mabalinna a tignayen dagiti napasnek a tao nga agimdeng bayat nga ilawlawagtay dagiti insurona.—Mat. 10:40.