Aramidenyo ti Isuamin a Bambanag a Pakaidayawan ti Dios
1 Anian a makapabang-ar ti makitimpuyog kadagiti kakabsattayo! (1 Cor. 16:17, 18) Aramidentayo daytoy kadagiti gimong, iti as-asamblea, ken iti ministerio. Aglalangentay met no adda sangaili a bumisita iti pagtaengantayo. No aramiden dayta, maipakita ti kinamanagpadagus ken makapagpipinnaregtatayo.—Roma 12:13; 1 Ped. 4:9.
2 Organisado a Sosial a Pasken: Uray no “mangmangan wenno umin-inum wenno agar-aramid[tayo] iti aniaman a banag,” masapul nga “aramiden[ta]yo ti isuamin a bambanag a maipaay iti dayag ti Dios.” (1 Cor. 10:31-33) Saan nga al-alagaden ti dadduma daytoy a balakad, isu a masansan a tumaud dagiti problema iti dadakkel a taripnong a sadiay maitampok ti nailubongan a panaglinglingay. Kadagitoy a kaasping unay dagiti nailubongan a pasken, a ti espirituna ket saan a mayataday kadagiti prinsipio ti Biblia.—Roma 13:13, 14; Efe. 5:15-20.
3 Naipadamag nga adda dadakkel a taripnong dagiti Saksi kadagiti naabangan a pasilidad a sadiay nasangailida babaen iti skating, sala, ken pannangan. Gapu ta narigat nga aywanan a siuumiso ti kakastat’ kadakkelna a grupo, timmaud dagiti problema. Masansan a nagresulta iti kinagulo, panaglablabes iti naingel nga inumen, ken kasta met iti imoralidad. (Efe. 5:3, 4) Ti kakasta a sosial a taripnong saanda nga idayaw ni Jehova. No di ket, pakaumsian ti kongregasion ken mangitibkol iti dadduma.—1 Cor. 10:23, 24, 29.
4 Maparegta dagiti Kristiano a mangipakita iti kinamanagpadagus, ngem maipangpangruna koma ti espiritual a panagpipinnaregta. (Roma 1:11, 12) Masansan a kasayaatan dagiti babassit a taripnong. Ti libro a Ti Ministeriotayo kunana iti pinanid 135-6: “No maminsan, mabalin a sumagmamano a pamilia ti maawis iti pagtaengan ti maysa nga agpaay iti Nakristianuan a panaglalangen . . . . Nainkalintegan laeng, a dagidiay mangsangaili kadagita a kaso ti personal a mariknada koma a responsableda iti aniaman a mapasamak. Silalagip iti daytoy, dagiti mannakaawat a Kristiano nakitada ti kinasirib ti pananglimitarda ti kadakkel ti kasta a grupo ken ti kabayag ti kasta a panagtataripnong.” Impamatmat ni Jesus a ditay kasapulan ti agsagana iti adu a bambanag no ti kalattayo ket isut’ panangparegta kadagiti gagayyemtayo iti naespirituan.—Luc. 10:40-42.
5 Naimbag a banag ti panangsangaili kadagiti pada a Kristiano. Nupay kasta, adda dakkel a nagdumaan ti natakneng a taripnong iti pagtaengantayo ken ti maysa a nalabor a pasken a mangyanninaw iti nailubongan nga espiritu iti naabangan a pasilidad. No mangsangailikayo, masapul nga aramidenyo laeng a bassit ti grupo tapno maaywananyo a naimbag ti aniaman a mapasamak.
6 No iparangarangtay ti kinatakneng ken kinatimbeng iti sosial nga ar-aramid, maidayawtay ti Diostayo ken makapabilegtayo iti sabsabali.—Roma 15:2.