Dagiti Pakaammo

◼ Literatura a tukon iti Enero: Nagkaykaysa iti Panagdayaw iti Maymaysa a Pudno a Dios wenno ti bassit a libro nga Agbiag nga Agnanayon iti ₱20.00. Pebrero: Life—How Did It Get Here? By Evolution or by Creation?, dakkel nga edision iti ₱60.00, bassit nga edision iti ₱30.00. Nupay kasta, kadagiti teritoria a di makapagsao iti Ingles, itukon koma ti bassit a libro nga Agbiag nga Agnanayon iti ₱20.00. Marso: Maitukon ti libro a Kinaragsak iti Pamilia. No awanankayo iti kastoy a libro mabalinyo nga itukon ti libro a Pannakaammo. PALAGIP: Dagiti kongregasion a saan pay a nagpedido kadagiti maikampania a publikasion a nadakamat masapul nga agpedidodan iti sumaruno a binulan a Literature Order Form (S-AB-14).

◼ Mangaramid koma dagiti kongregasion kadagiti kombeniente nga urnos iti pannakarambak ti Memorial iti daytoy a tawen inton Sabado, Abril 11, kalpasan ti ilelennek ti init. Nupay mabalin a mairugi a nasapsapa ti palawag, saan koma a maipasa dagiti emblema ti Memorial no saan pay a limnek ti init. Kitaenyo dagiti lokal a gubuayan tapno maammuanyo no kaano a lumnek ti init iti lugaryo. Nupay tarigagayan ti kada kongregasion a rambakanda ti Memorial a bukbukodda, mabalin a saan a kanayon a posible daytoy. No adu a kongregasion ti agus-usar iti maymaysa a Kingdom Hall, nalabit mangala ti maysa wenno ad-adu pay a kongregasion iti sabali a pasilidad nga usarenda iti dayta a rabii. Saan koma a nakaladladaw ti pannakairugi ti Memorial tapno di masulit a tumabuno dagiti kabbaro nga interesado. Saan met koma nga assideg unay ti eskediul nga awanen ti tiempo sakbay wenno kalpasan ti selebrasion a mangkablaaw kadagiti sangaili, mangyurnos iti agtultuloy a pannakaasikaso ti naespirituan a kasapulan dagiti interesado, wenno mangtagiragsak iti panagpipinnaregta. Kalpasan ti naan-anay a panangusig iti amin a bambanag, rumbeng nga ikeddeng dagiti panglakayen no ania dagiti urnos a makatulong unay kadagidiay tumabuno iti Memorial tapno magunggonaanda a naan-anay iti okasion.

◼ Ti espesial a palawag publiko para iti tiempo ti Memorial iti 1998 ket maipaayto inton Domingo, Marso 29. Addanto maited a balabala. Kadagiti kongregasion a maranaan ti bisita ti manangaywan iti sirkito, asamblea sirkito, wenno aldaw ti espesial nga asamblea iti dayta a ngudo ti lawas, maipaay ti espesial a palawag iti sumaruno a lawas. Awan ti kongregasion a maaddaan iti espesial a palawag sakbay ti Marso 29, 1998.

◼ Sipapanunot koma dagiti panglakayen a kasapulan dagiti sumaganad a panagbalbaliw no tumabuno dagiti kongregasion kadagiti lokal nga asamblea. No mayeskediul ti programa iti aldaw ti espesial nga asamblea, maangay koma amin dagiti gagangay a gimong iti dayta a lawas, malaksid iti pannakakanselar ti Miting Publiko ken Panagadal iti Pagwanawanan. No nakaeskediul a tumabuno iti asamblea sirkito, kanselaren met ti kongregasion ti Teokratiko nga Eskuelaan ti Panagministro ken ti Gimong ti Serbisio; ti laeng Panagadal iti Libro ti Kongregasion ti maangay iti dayta a lawas.

◼ Yantangay segseggaantayo ti Abril kas naisangsangayan a bulan ti serbisio, tiempon nga usigenyo dagiti kasapulan ti kongregasionyo a kas kadagiti kanayonan a magasin a mausar iti dayta a bulan. Pangngaasiyo ta sapaenyo ti agpedido tapno maasikaso dagiti kasapulanyo.

◼ Adda pay bassit a nabatbati nga abastotayo a Kingdom News #35 iti Bicol, Cebuano, Ingles, Hiligaynon, Iloko, Pangasinan ken Samar-Leyte. Dagiti kongregasion a dida nawarasan ti intero a teritoriada iti daytoy a tract mabalinda ti agpedido iti kanayonan a suplay tapno maaramidanda daytoy. Ipaay ti Sosiedad dagiti pedidoyo agingga a maibus ti suplay.

◼ Baro nga Audiocassette a Magun-odan:

Ti Sekreto ti Kinaragsak iti Pamilia (4-cassette nga album a naglaon iti intero a libro. Agibumbunannag ken Publiko: ₱250.00; Payunir: ₱180.00.)