Isuroyo Dagiti Sabsabali Tapno Magunggonaanda
1 Kayat ni Jehova a magunggonaan amin a tattao. (Isa. 48:17) Ammona no ania ti pudpudno a mangparagsak kadatayo. Tarigagayanna unay a maliklikan dagiti tattao ti didigra ken tagiragsakenda ti biag babaen ti panangipangagda kadagiti bilinna. Magunggonaantayo unay babaen ti panagbiagtayo a maitunos iti dalan ti Dios. (Sal. 34:8) Kasanotay a maisuro dagiti sabsabali a mangaramid met iti kasta?
2 Aniat’ Kayat Dagiti Tattao? Aniat’ pakaseknan dagiti bumalay iti pagnanaedanyo? Saan aya a ti seguridad ti pagtaenganda, ti kinalagda ti panagasawada, ti masakbayan dagiti annakda, ken umasping kadagita? No agparikutda, sadino ti pagtaklinanda? Mabalin nga agpannurayda iti mismo a bagbagida, kadagiti praktikal ken makaisuro a programa, wenno iti panangiwanwan dagiti sabsabali. Kabayatanna, adu ti mariribukan gapu kadagiti di agtutunos ken saan a praktikal nga ideya no kasanoda a magunggonaan. Masapul a kombinsirentay ida a nasaysayaat nga amang ti panangiwanwan nga ididiaya ti Sao ti Dios. (Sal. 119:98) Maaramidantay daytoy babaen ti panangipakitatayo kadakuada no kasanoda a maparang-ay ti kalidad ti biagda uray pay itan no pagreggetanda nga adalen ti Biblia ken iyaplikarda ti kunaenna.—2 Tim. 3:16, 17.
3 Simmayaat a Biag ti Pamilia: Mabigbig ti sumagmamano a tattao nga epektibo unay ti naipaltiing a balakad iti Efeso 5:22–6:4 iti panangrisut kadagiti parikut iti pamilia. Kastoy ti napasamak iti agassawa a, kalpasan ti sangapulo a tawen a panagasawada, inkeddengda nga agsinada. Nupay kasta, nairugi a nayadalan iti Biblia ti asawa a babai, ket naadalna dagiti prinsipio ti Kasuratan maipapan iti biag ti agassawa. Di nagbayag nadlaw ti asawa a lalaki ti panagbalbaliw ni baketna bayat nga inyaplikarna dagiti prinsipio ti Biblia, ket nakipagadal met. Kinunana idi agangay: “Nasarakanmin ti pakaibatayan ti napaypayso a naragsak a biag ti pamilia.”
4 Pudpudno a Panggep iti Biag: Idi nagpatulong kadagiti Saksi ti maysa nga agtutubo a naadikto iti droga, naammuanna a personal a maseknan ni Jehova kenkuana. Kinunana: ‘Naammuak nga adda panggep ti Namarsua iti tao ket ipaayna ti biag nga agnanayon kadagidiay anamonganna. Diyo mailadawan ti napalaus a ragsakko iti daytoy. Ita tagtagiragsakek ti nasayaat a salun-at, talna ti panunot, ken nasinged a relasion iti Dios.’
5 Magunggonaantay amin manipud iti praktikal a tulong a masarakan iti Sao ti Dios. Babaen ti panangusartayo iti dayta a kas giyatayo, mapasingkedantayo a nasaysayaat nga amang ti dalan ni Jehova ngem iti daldalan ti lubong. (Sal. 116:12) Pribilehiotayo nga ipakaammo daytoy a mensahe kadagiti sabsabali, nga isurotay ida tapno magunggonaanda a mismo. Bayat nga aramidentay dayta, makitatayto ti adu a nagsasayaat a resulta.