Dagiti Dadduma Agpampannurayda Kadakayo
1 “Ti mata saanna a mabalin a kunaen iti ima: ‘Awan pakasapulak kenka.’” Ta no kasta, ania koma ti mangsalaknib iti mata iti peggad? Inusar ni apostol Pablo ti natauan a bagi agraman ti nagduduma a kamengna tapno iyilustrar nga amintayo ket agpampannuray iti maysa ken maysa iti kongregasion. Insuratna pay a “nasken dagiti kameng ti bagi a kasla nakapkapuy.” Wen, agpannuraytayo iti sabsabali ket agpannurayda met kadatayo, nga addaantayo “iti isu met laeng a panangisakit iti maysa ken maysa” agsipud ta “datayo ket kamkameng nga agpaay iti maysa ken maysa.” (1 Cor. 12:21-27; Efe. 4:25) Usigenyo ti sumagmamano kadagiti pamay-an a makaapektar iti sabsabali ti aramidyo.
2 Iti Pamilia: Makapagpinnabileg dagiti agassawa babaen ti panangiparangarangda iti pammati, determinasion, ken regta, nga iyun-unada dagiti naespirituan a kalatda. Kasta met, ti kababalin ken ulidan dagiti nagannak impluensiaanna ti panangmatmat ken pannakipaset ti annakda iti ministerio ken kadagiti Nakristianuan a gimong.—Jos. 24:15.
3 Iti Ministerio: Ti gagaryo a mangikasaba iti naimbag a damag ti Pagarian paregtaenna dagiti padayo nga agibumbunannag nga agpingetda iti ministerio. Napateg ti ulidanyo, a kas met ti personal a panangtulongyo iti sabsabali a makipaset iti serbisio. (2 Tes. 3:9) Apresiaren la ketdi dagiti payunir ti pannakikaduayo kadakuada iti ministerioda. Siempre, mangnamnama dagiti interesado a nasarakanyo iti tay-ak nga agsublikayo ket tulonganyo ida a mangsapul iti dalan nga agturong iti biag. Diyo kayat a paayen ida.
4 Iti Kongregasion: Gubuayan ti pudpudno a pammaregta iti kakabsatyo ti itatabuno ken pannakipasetyo kadagiti gimong ti kongregasion. No dikay tumabuno, saan la a dakayo ti lugi. Di magun-odan dagiti sabsabali ti pagimbagan ti kaaddayo koma iti gimong. Awan duadua nga agpampannuray kadakayo dagiti panglakayen, kas met iti panagpannurayyo kadakuada. Maparayray ti panangipastorda iti arban gapu iti positibo a kababalinyo ken madadaan a suportayo.
5 Iti sao ken aramid, ‘agpipinnaregtatayo koma iti ayat ken nasayaat nga ar-aramid.’ (Heb. 10:24) Bendisionannatayo ni Jehova gapu iti kinamapangnamnamaan ken kinamatalektayo.