Paset 2—Panangikondukta Kadagiti Progresibo a Panagadal iti Biblia
Panagsagana a Mangikondukta iti Panagadal
1 Saan laeng a panangusig iti material ken panangkita kadagiti nadakamat a teksto ti ramanen ti epektibo a panangisuro no mangyadaltayo iti Biblia. Nasken nga idatagtayo ti impormasion iti wagas a manggutugot iti puso ti iyad-adalantayo. Kasapulan ti naan-anay a panagsagana tapno mabenepisiaran ti iyad-adalantayo iti Biblia.—Prov. 15:28.
2 No Kasano ti Agsagana: Irugim babaen ti panagkararag ken ni Jehova maipapan iti iyad-adalam ken dagiti kasapulanna. Idawatmo ken ni Jehova a tulongannaka a mangdanon iti puso ti iyad-adalam. (Col. 1:9, 10) Tapno nalawag iti panunotmo ti tema, imutektekam ti paulo ti kapitulo wenno leksion, dagiti subtitulo, ken aniaman a ladawan. Isaludsodmo iti bagim, ‘Ania ti kangrunaan a panggep daytoy a material?’ Tulongannaka daytoy a mangipaganetget kadagiti kangrunaan a punto bayat ti panagadalyo.
3 Repasuem a naimbag ti tunggal parapo. Kitaem ti sungbat dagiti saludsod, a markaam dagiti laeng kangrunaan a sasao ken grupo dagiti sasao. Anagem no kasano a nainaig dagiti nadakamat a teksto iti kangrunaan a punto ti parapo, ket ikeddengmo no ania dagiti teksto a basaenyo bayat ti panagadal. Mabalin a makatulong no isuratmo iti ababa dagiti napateg a punto iti pingir ti publikasion. Nalawag koma iti panunot ti iyad-adalam a naggapu iti Sao ti Dios dagiti maad-adalna.—1 Tes. 2:13.
4 Ibagaymo ti Leksion iti Kasasaad ti Iyad-adalam: Kalpasanna, panunotem ti iyad-adalam bayat nga us-usigem ti leksion. Panunotem no ania dagiti posible nga isaludsodna ken dagiti punto a nalabit narigatna a tarusan wenno akseptaren. Isaludsodmo iti bagim: ‘Ania ti nasken a tarusan wenno aramidenna tapno rumang-ay iti naespirituan? Kasanok a madanon ti pusona?’ Sa ibagaymo ti panangisurom iti kasasaadna. No dadduma, mabalin a kasapulan a mangisaganaka iti ilustrasion, panunotem no kasano nga ilawlawag dagiti bambanag, wenno mangibangonka kadagiti saludsod a tumulong iti iyad-adalam a mangtarus iti kaipapanan ti maysa a punto wenno teksto. (Neh. 8:8) Ngem dika manginayon iti impormasion nga awan pakainaiganna iti tema. Ti ababa a repaso iti ngudo ti panagadal ket makatulong tapno matandaananna dagiti kangrunaan a punto.
5 Anian a ragsaktayo no mangpataud dagiti iyad-adalantayo iti nalinteg a bunga a pakaidayawan ni Jehova! (Fil. 1:11) Tapno matulongan ida a mangragpat iti dayta a kalat, agsaganaka a naimbag tunggal mangyadalka iti Biblia.