‘Aramidenyo ti Naimbag Kadagiti Amin’
1 Iti Marso 2006 a ruar Ti Ministeriotayo iti Pagarian, naiparegta nga ad-adda a pagreggetantayo a tulongan dagiti interesado a tumabuno iti Memorial, nga usarentayo ti baro nga imbitasion iti Memorial. Kas resultana, awan duadua nga adu a kabbaro ken di aktibo ti timmabuno iti daytoy nga okasion. Ita, “bayat nga addaantayo iti mainugot a tiempo a maipaay iti dayta, [agtultuloy nga] aramidentayo koma ti naimbag kadagiti amin.”—Gal. 6:10.
2 Awisenyo Ida a Tumabuno Manen: Ditoy Pilipinas, nasurok a 300,000 a tattao a saan nga agibumbunannag iti naimbag a damag ti tinawen a tumabtabuno iti Memorial. Ania ti aramidentayo tapno magutugot nga agbalin a “manamati” dagidiay “siuumiso nga agannayas iti agnanayon a biag”? (Ara. 13:48) Iti kabiitan a panawen, paregtaentayo ida a tumabuno a regular kadagiti gimong iti kongregasion.
3 Apay a dimo awisen ti maysa nga interesado a tumabuno iti Panagadal iti Libro ti Kongregasion tapno matagiragsakna ti makapainteres a diskusion maipapan iti libro nga Apocalipsis? No kabagian wenno am-ammom ti maysa nga interesado ket natudinganka nga agpaset iti Teokratiko nga Eskuelaan ti Panagministro, mabalinmo nga awisen dayta a tao nga umay agdengngeg iti pasetmo. Ipakaammom kenkuana dagiti paulo ti palawag publiko kadagiti sumaganad a lawas. (Maipaskil koma iti information board ti napabaro nga eskediul.) Ken siempre, no isu ket saanen a makipagad-adal iti Biblia iti asinoman, siaayat nga itukonmo kenkuana ti panagadal.
4 Itultuloyyo a Paregtaen ti Di Aktibo: Adu kadagiti tumabtabuno iti Memorial ti nagdedikaren ken ni Jehova. Ngem adda tiempo nga insardengda ti aktibo a panangikasabada iti naimbag a damag. Indagadag kadatayo ni Pablo nga “aramidentayo koma ti naimbag . . . nangnangruna kadagidiay nainaig kadatayo iti pammati.” (Gal. 6:10) Gapuna, nangnangruna koma a maseknantayo kadagidiay di aktibo.
5 Nalabit nga addan dagiti nangipangag iti pammaregta dagiti panglakayen a makiramanda manen iti ministerio. No dinutokannakayo dagiti panglakayen a makipagtrabaho iti aktibo manen nga agibumbunannag, maaddaan iti kompiansa dayta a kabsat no makitana ti mismo a panagayatyo ken ni Jehova ken iti ministerio. Ipakitayo kenkuana no kasano ti pannakiramanyo iti nagduduma a benneg ti ministerio tapno matagiragsakna dayta. Iti kasta, itultuloyna met nga aramiden dayta ken adu a bendision ti masagrapna.
6 Tulonganyo Dagiti Kabbaro nga Agibumbunannag a Maaddaan iti Nasayaat a Pangrugian: Tulonganyo ti iyad-adalanyo iti Biblia a maaddaan iti nasayaat a pangrugian no isu ket naaprobaranen a makiraman iti panagserbi iti tay-ak. Tulonganyo pay a maaddaan iti rutina iti panagsagana ken iti regular a pannakiraman iti ministerio iti kada lawas.
7 No anakyo a mismo ti nagbalin a kabbaro a di bautisado nga agibumbunannag, tulonganyo a rumang-ay sigun iti edad ken kabaelanna. Babaen ti bassit a tulongyo, mabalin a masdaawkayo iti kinalaingna a makisarita iti maysa a tao, mangibasa iti Biblia, ken mangitukon iti literatura. No adda masarakanna nga interesado iti pangasabaan, sanayenyo nga agsarungkar ken mangsurnad iti interes.
8 Parang-ayenyo ti Mismo a Ministerioyo: Ipalubos kadi ti kasasaadyo nga ad-adu pay ti pannakiramanyo iti trabaho a panagebanghelio uray kalpasan ti bulan ti Abril ken Mayo? No auxiliary pioneer-kayo iti daytoy a bulan, pinampanunotyo kadin no mabalinyo nga aramiden daytoy a regular, wenno nalabit agserbikayon kas regular pioneer? Laglagipenyo nga ad-adu ti matulongantayo nga umawat iti kinapudno no ad-adu nga oras ti busbosentayo iti ministerio. (Ara. 8:26-39) Bayat a paspasungadantayo dagiti aldaw, ‘kankanayon koma a surotenyo ti naimbag maipaay iti maysa ken maysa ken iti amin a sabsabali pay.’—1 Tes. 5:15.