Makaparagsak Unay a Trabaho
1. Ania a naespirituan a pannakapaimbag ti mapaspasamak iti kaaldawantayo?
1 Kasta unay ti rag-o dagiti nakakita iti pisikal a pannakapaimbag idi umuna a siglo. (Luc. 5:24-26) Iti kaaldawantayo, maragsakantayo a makakita iti naespirituan a pannakapaimbag. (Apoc. 22:1, 2, 17) Anian a ragsaktayo a makabasa kadagiti kapadasan dagiti tattao a nagbalbaliw ti kabibiagna gapu iti Sao ni Jehova ken iti nasantuan nga espirituna! Ngem ad-adda pay a makagunggona ti makiraman iti daytoy a trabaho babaen ti panangikondukta iti progresibo a panangyadal iti Biblia.
2. Ania a rag-o ti masagraptayo no isurotayo ti kinapudno iti maysa a tao?
2 Ania ti nagan ti Dios? Apay nga impalubosna ti panagsagaba? Anianto ti aramiden ti Pagarian ti Dios iti sangatauan? Maragsakantayo saan laeng nga iti panangsungbat kadagiti kasta a saludsod no di ket iti pannakakita kadagiti iyad-adalantayo a maragragsakan gapu kadagiti maad-adalda a kinapudno. (Prov. 15:23; Luc. 24:32) Bayat a rumangrang-ay ti estudiante, mabalin nga usarennan ti nagan ni Jehova, balbaliwannan ti panaglanglanga ken panagkawkawesna, isardengnan dagiti dakes nga aramid, ken iruginan ti mangasaba. Isu ket agbalin a kabsat ken katrabahuantayo inton agdedikar ken agpabautisar. Amin dagitoy a positibo nga addang ket mangted kadatayo iti rason nga agragsak.—1 Tes. 2:19, 20.
3. Ania dagiti praktikal nga addang a mabalintayo nga aramiden tapno makairugitayo iti panangyadal iti Biblia?
3 Kabaelanyo Kadi ti Makiraman? No kayatyo ti makiraman iti daytoy makaparagsak unay a trabaho, kiddawenyo ken Jehova a tulongannakayo a maaddaan iti iyad-adalan iti Biblia sa ikagumaanyo nga aramiden no ania ti inkararagyo. (1 Juan 5:14) Kasabaanyo dagiti tattao iti oras ken lugar a pakasarakanyo kadakuada. Itukonyo ti panangyadal iti Biblia iti tunggal maitutop a gundaway. (Ecl. 11:6) No adda masarakanyo nga interesado ket naimulayo kenkuana ti bin-i ti kinapudno, agsublikayo tapno parayrayenyo ti interesna.—1 Cor. 3:6-9.
4. Apay a rumbeng a ganetgetantayo ti mangitukon iti panangyadal iti Biblia?
4 Adu pay ti mabisbisin ken mawaw iti kinalinteg. Siasino ti makatulong a mangpennek iti naespirituan a kasapulanda babaen ti panangyadal iti Biblia kadakuada? (Mat. 5:3, 6) Sidadaantayo koma a tumulong a mangiringpas iti trabaho a panangasaba ken panagaramid-adalan sakbay nga agpatingga ti panawen ti panagani.—Isa. 6:8.