Nakasagana Kadin Dagiti Annakyo?
1. Apay a masapul a nakasagana dagiti ages-eskuela nga ubbing?
1 Nangrugi manen ti klase. Awan duadua a maipaspasango manen dagiti annakyo kadagiti baro a karit ken pakasuotan. Addaanda met kadagiti baro nga oportunidad a ‘mangsaksi iti kinapudno.’ (Juan 18:37) Nakasaganada kadin?
2. Ania ti masapul nga ammo dagiti annakyo tapno nakasaganada?
2 Silalawag kadi a matarusan dagiti annakyo no ania ti nainaig iti pannakipaset kadagiti nasionalistiko a seremonia ken kadagiti pagano nga okasion ken no apay a maiparit ti makiraman kadagita? Nakasaganada kadin a mangsaranget iti pannakapilit a mangragpat iti nangatngato nga edukasion, makideyt, aginum iti arak wenno agdroga? Ibagbagada laeng kadi a maiparit iti relihionda dagiti saan a nasayaat nga aktibidad, wenno ammoda nga ilawlawag dagiti patpatienda?—1 Ped. 3:15.
3. Kasano nga usaren dagiti nagannak ti Panagdaydayaw ti Pamilia a mangisagana kadagiti annakda?
3 Usarenyo ti Panagdaydayaw ti Pamilia: Mabalin a pagtungtonganyo dagiti baro a parikut a pakaipasanguan ti anakyo iti intero a tawen ti panageskuela. No ikagumaanyo a pagtungtongan itan dagiti banag nga adda pakainaiganna iti eskuelaan, maaddaan iti kompiansa dagiti annakyo. Apay a saanyo nga usaren ti maysa wenno ad-adu pay nga eskediul ti panagdaydayaw ti pamiliayo para iti daytoy? Mabalinyo a saludsoden kadagiti annakyo no ania ti karirigatan a problemada iti eskuelaan. Dagiti problema a napagsaritaanyo idin ket mabalinyo a repasuen ita ta daddadakkeldan ken naun-unegen ti pannakaawatda. (Sal. 119:95) Mabalinyo met ti agensayo. Kas pagarigan, agakemkayo kas mannursuro, guidance counselor, wenno padana nga estudiante. Isuroyo kadagiti annakyo no kasanoda nga usaren ti Biblia ken dagiti libro a Pannakirinnason ken Agimtuod Dagiti Agtutubo no sumungbatda. Ti maysa a nagannak en-ensayuenna dagiti annakna no kasanoda nga umasideg kadagiti mannursuro tunggal mangrugi ti klase iti kada tawen tapno ibagada nga isuda ket Saksi ni Jehova.—Kitaenyo ti Disiembre 15, 2010 a ruar Ti Pagwanawanan, panid 3-5.
4. Ania ti aramiden dagiti masirib a nagannak?
4 Dagiti karit a pakaipasanguan dagiti agtutubo a Kristiano kabayatan ti maudi nga al-aldaw ket ad-adda a “narigat a pakilangenan.” (2 Tim. 3:1) Dagiti masirib a nagannak saganaanda dagita a karit. (Prov. 22:3) Kabayatan daytoy a baro a tawen ti panageskuela, aramidenyo ti amin a kabaelanyo a mangisagana kadagiti annakyo.