Tuladenyo Dagiti Propeta—Jonas

1. Ania dagiti nasayaat a kualidad ni Jonas?

¹ Ania ti mapanunotmo no malagipmo ni propeta Jonas? Adda dagiti agkuna nga isu ket takrot wenno awanan asi. Nupay kasta, nalawag nga imparangarangna ti kinapakumbaba, kinatured, ken kinamanagsakripisio. Kasanotayo a matulad dagitoy a nasayaat a kualidad ni Jonas?—Sant. 5:10.

2. Kasanotayo a matulad ti kinapakumbaba ni Jonas?

² Kinapakumbaba: Idi damo, nagturong ni Jonas iti sabali a lugar imbes a mapan iti naituding a teritoriana. Saan a nakaskasdaaw daytoy gapu ta pagaammo a naranggas unay dagiti Asirio, ken naawagan ti Nineve kas “siudad ti panagibukbok iti dara.” (Nah. 3:1-3) Nupay kasta, dinisiplina ni Jehova ni Jonas, ket impakitana ti kinapakumbaba idi inawatna ti annongen a naited kenkuana iti maikadua a gundaway. (Prov. 24:32; Jon. 3:1-3) Nupay nagkedked idi damo, inaramidna ti pagayatan ni Jehova. (Mat. 21:28-31) Determinadotayo kadi met a mangikasaba iti naimbag a damag, uray no nadisiplinatayo wenno naikkantayo iti narigat a teritoria?

3. Ania dagiti aspeto ti ministerio nga agkasapulan iti tured ken panagsakripisio?

³ Kinatured ken Kinamanagsakripisio: Idi naamiris ni Jonas a nagpeggad ti biag dagiti tripulante gapu iti di umiso a desisionna, sisasagana ni Jonas a mangisakripisio iti biagna. (Jonas 1:3, 4, 12) Di nagbayag, idi intungpalna ti annongenna idiay Nineve, isu ket nagnagna agingga iti sentro ti siudad, a nalabit nangbirok iti maitutop a lugar a pangiwaragawaganna iti panangukom ni Jehova. Saan a maaramid dayta ti takrot, no di ket ti natured a propeta ti Dios! (Jonas 3:3, 4) Datayo met ngay? Kasapulantayo ti tured manipud iti Dios tapno saantayo nga agbuteng a mangasaba uray no busorendatayo. (Ara. 4:29, 31) Kasapulan nga isakripisiotayo ti panawen ken sanikuatayo agpaay iti ministerio.—Ara. 20:24.

4. Apay nga iwayaantayo nga utoben ti nasayaat nga ulidan nga imbati dagiti propeta ni Jehova?

⁴ Tunggal agbasaka iti salaysay maipapan iti maysa kadagiti propeta ni Jehova, magunggonaanka no panunotem a karamanka iti eksena. Isaludsodmo iti bagim: ‘No siak ti adda iti kasasaadna, ania ngata ti aramidek? Kasanok a matulad dagiti nasayaat a kualidadna?’ (Heb. 6:11, 12) Kadagiti sumarsaruno nga artikulo Ti Ministeriotayo iti Pagarian, usigentayto dagiti kanayonan a napapateg a leksion a masursurotayo kadagiti dadduma pay a matalek a propeta ni Jehova.