Agtultuloykayo a Rumang-ay Kas Ministro
1. Ania dagiti ulidan idi umuna a siglo a mangipakita a rumbeng a rumang-aytayo kas ministro?
1 Dagiti Kristiano ket rumbeng a rumang-ay kas ministro. Dayta ti gapuna a sinanay ni Jesus dagiti pasurotna tapno lumaingda iti trabaho a panangasaba. (Luc. 9:1-5; 10:1-11) Dayta met laeng ti rason no apay nga inkuyog da Aquila ken Priscila ni Apolos ket “ad-adda a siuumiso nga imbinsabinsada kenkuana ti dalan ti Dios.” (Ara. 18:24-26) Uray ni Pablo, pinaregtana ti aduan kapadasan nga ebanghelisador a ni Timoteo nga itultuloyna nga igaed ti mangisuro tapno ti panagrang-ayna “maiparangarang iti amin a tattao.” (1 Tim. 4:13-15) Kasanoman ti kabayagtayon nga agpapaadipen iti Apo kas agibumbunannag iti naimbag a damag, nasken nga itultuloytayo a parang-ayen ti abilidadtayo a mangasaba.
2. Kasanotayo a makasursuro kadagiti dadduma?
2 Agsursuroka Kadagiti Dadduma: Ti maysa a pamay-an tapno rumang-ay ti abilidadtayo ket ti panagsursuro kadagiti dadduma. (Prov. 27:17) Gapuna, dumngegka a naimbag no mangaskasaba ti kaduam. Dumawatka kadagiti espesipiko a singasing manipud kadagiti nalaing a mangasaba sa denggem a naimbag ti ibagada. (Prov. 1:5) Saanmo kadi nga ammo no kasano ti agsarungkar, mangirugi iti panangyadal iti Biblia, wenno makiraman iti dadduma pay nga aspeto ti ministerio? Agpaisuroka iti manangaywan iti grupo wenno iti aduan kapadasan nga agibumbunannag. Laglagipem met a matulongannaka ti nasantuan nga espiritu ni Jehova a mangparang-ay kadagiti abilidadmo, isu a regular nga ikararagmo dayta.—Luc. 11:13.
3. Ania ti rumbeng a reaksiontayo no adda mangisingasing iti aramidentayo, uray no saantayo met nga agsalsaludsod?
3 No adda mangisingasing iti aramidem tapno rumang-ayka, uray no saanka met nga agsalsaludsod, saanka koma a masaksaktan. (Ecl. 7:9) Kas ken Apolos, sipapakumbaba nga awatem ken agyamanka iti dayta. Masiribka no aramidem dayta.—Prov. 12:15.
4. Ania ti imbaga ni Jesus a nabileg a rason a rumang-aytayo kas ebanghelisador?
4 Pakaidayawan ti Dios ti Panagrang-ay: Babaen ti pangngarig, pinaregta ni Jesus dagiti pasurotna a rumang-ay kas ministro. Inyarigna ti bagina iti puon ti ubas ken dagiti napulotan a pasurotna kadagiti sanga. Imbagana a ti Ama daldalusanna ti tunggal sanga nga agbungbunga tapno “mangpataud iti ad-adu pay a bunga.” (Juan 15:2) Kas iti makinkukua iti kaubasan a kayatna a nabunga dagiti sanga dagiti ubasna, kayat met ni Jehova nga agtultuloy a rumang-ay ti abilidadtayo a mangpataud iti ‘bunga dagiti bibigtayo.’ (Heb. 13:15) Ania ti makapnek a resultana no rumang-aytayo kas ebanghelisador? Kinuna ni Jesus: “Ni Amak maipadayag iti daytoy, nga agtultuloykayo a mangpataud iti adu a bunga.”—Juan 15:8.