Adda Kadi Pammatim?

Tapno maparagsaktayo ni Jehova, masapul nga adda pammatitayo. Ngem ibagbaga ti Biblia a “saan nga amin a tattao ket addaan iti pammati.” (2 Tes. 3:2) Idi imbaga dayta ni apostol Pablo, ti tuktukoyenna ket dagiti “mangdangran ken dakes a tattao” a mangidaddadanes kenkuana. Ngem saan la a dagiti dakes a tattao ti tuktukoyenna idi imbagana ti maipapan iti pammati. Adda dagiti tattao a saanda a kayat a patien nga adda Dios a Namarsua iti amin a banag. (Roma 1:20) Dadduma met ti mamati nga adda persona a mas mannakabalin ngem kadakuada. Ngem saan a dayta ti pudno a pammati a mangparagsak ken Jehova.

Masapul a kombinsidotayo nga adda ni Jehova ken isu “ti manggunggona” kadagidiay nabileg ti pammatida. (Heb. 11:6) Ti pammati ket maysa nga aspeto ti bunga ti nasantuan nga espirituna. Maaddaantayo iti nasantuan nga espiritu no kiddawentayo dayta ken Jehova. (Luc. 11:​9, 10, 13) Ti maysa pay a napateg a pamay-an a maawattayo ti nasantuan nga espiritu ket no basaentayo ti Sao ti Dios, ti Biblia. Kalpasanna, panunotentayo dagiti mabasatayo ken ikagumaantayo nga iyaplikar dagiti masursurotayo. No aramidentayo dagita, tulongannatayo ti nasantuan nga espiritu ni Jehova a maaddaan iti pudno a pammati a mangparagsak kenkuana.