Protestante Kadi Dagiti Saksi ni Jehova?
Saan. Dagiti Saksi ni Jehova ket Kristiano, ngem saanmi nga ibilang ti bagimi kas Protestante. Apay?
Ti Protestantismo ket nadepinar kas “maysa a relihion a maibusor iti Romano Katoliko.” Nupay agpayso a saankami nga umanamong kadagiti pannursuro ti Romano Katoliko, saanmi nga ibilang ti bagbagimi kas Protestante gapu kadagiti sumaganad a rason:
Ti adu kadagiti patpatien dagiti Protestante ket saan a maitunos iti isursuro ti Biblia. Kas pagarigan, isursuro ti Biblia a ‘maymaysa ti Dios,’ saan ket a Trinidad. (1 Timoteo 2:5; Juan 14:28) Ken nalawag nga isursuro ti Biblia a ti Dios dusaenna dagiti nadangkes, saan nga iti umap-apuy nga impierno, no di ket iti agnanayon a pannakadadael.—Salmo 37:9; 2 Tesalonica 1:9.
Saankami nga agprotprotesta wenno saanmi a ganggandaten a balbaliwan ti Romano Katoliko wenno ti aniaman a dadduma pay a relihion. Imbes ketdi, ikaskasabami laeng ti naimbag a damag maipapan iti Pagarian ti Dios ken ikagkagumaanmi a tulongan dagiti sabsabali a mangpatanor iti pammati iti dayta a naimbag a damag. (Mateo 24:14; 28:19, 20) Saanmi a ganggandaten a balbaliwan ti dadduma a relihion no di ket interesadokami a mangisuro kadagiti napasnek a tattao iti kinapudno maipapan iti Dios ken iti Saona, ti Biblia.—Colosas 1:9, 10; 2 Timoteo 2:24, 25.