Kinadua ti Polis ni Joseph
No maysaka a Saksi ni Jehova, mapanunotmo kadi nga adda kaduam a polis a mangaskasaba iti binalaybalay? Kasta ti napadasan ni Joseph idiay Micronesia idi 2017. Kaduana ti tallo a Saksi a nakiraman iti espesial a kampania a panangasaba kadagiti tattao kadagiti adayo nga isla.
Idi tumengngan ti aldaw, simmangpet ti uppat a Saksi iti bassit nga isla a ti populasionna ket agarup 600. Pinasangbay ida ti mayor ti isla iti igid ti baybay. Inlawlawag ni Joseph ti simmaruno a napasamak: “Imbaga ti mayor a mabalindakami nga itulod iti amin a balay babaen ti lugan dagiti polis. Nasdaawkami iti tukonna, ngem sidadayaw a nagkedkedkami. Kayatmi a bisitaen dagiti tattao iti gagangay a pamay-an ti panagbalaybalay.”
Nagnagna ngarud dagiti agibumbunannag, ket determinadoda a mangasaba iti adu a tattao agingga a posible. Kinuna dagiti Saksi: “Manangpasangbay dagiti tattao ken interesadoda iti mensahetayo. Isu a napapaut ti ibibisitami iti tunggal balay ngem iti ninamnamami.”
Idi mumalmalemen, namindua a linabsan ti lugan dagiti polis ni Joseph ket iti maikatlo a gundaway, simmardeng dagiti polis. Dinamagda ken Joseph no kayatna nga itulodda kadagiti balay a bisitaenna pay. Kuna ni Joseph: “Imbagak a saan. Ngem iti daytoy a gundaway, impapilitda ket kunada, ‘Dandanikayo agawiden, isu nga ituloddakan kadagiti balay a saanmo pay a napanan.’ Saanakon a nakapagsaan ta adda pay sumagmamano a balay a bisitaek. Bayat nga umas-asidegkami iti tunggal balay, ibaga dagiti polis ti apelyido ti bumalay ken kunada a no awan ti rummuar no agtuktokak, agbusinada tapno mapakaammuan ti bumalay.
“Gapu iti dayta a tulongda, nabisitami ti amin a balay iti dayta nga aldaw. Adu ti naipaimami a publikasion ken nangaramidkami iti urnos no kasano a masarungkaran dagiti interesado.”
Imbaga dagiti polis ken ni Joseph a “natagiragsakda ti nangiwaras iti naimbag a damag.” Idi lumneken ti init, pimmanawen dagiti Saksi. Adda iti igid ti baybay dagiti polis a nakaisem nga agpaypayapay a nakaiggem iti literatura a naibatay iti Biblia.