Panangmatmat ti Biblia
Horoscopes—Makatulong wenno Makadangran?
MAYSA nga agtagibalay rugianna ti inaldaw a trabahona babaen iti panagbasa iti benneg ti pagiwarnak a “Your Stars.” Ti maysa a broker awaganna ti astrologona sakbay ti panaglakona. Maysa a sugador ti karera ti nakapetpet iti adu a kuarta iti maysa nga imana ket iti sabali, ti libro a How to Play the Horses Horoscopically. Dagiti bituen iti ay-ayam, politiko, ken adu a sabsabali ti sipapasnek nga agkonsulta kadagiti horoscopes sakbay ti panangaramidda iti pangngeddeng.
Dagiti kadi posision dagiti bituen, planeta, bulan, ken init iti pannakaipasngay ti maysa a tao kas naiplano babaen kadagiti tsart nga inaramid dagiti astrologo apektaranna ti panagbiagyo? Minilion ita ti mamati a kasta. Gapuna mabalin a panunotenyo:
Dagiti Kadi Horoscopes Pudno a Makatulongda?
Wen, sumungbat dagiti napasnek a paspasurot iti dayta. Apay a kastoy ti panagriknada? Inlawlawag ti maysa a tao: “Basaek ti horoscopeko iti inaldaw . . . ket kunaek nga agarup 80 porsiento iti tiempo umiso a napasamak dagiti bambanag.” Wen, mariknada a dagiti sungbat, wenno dagiti panangiwanwan iti panangsungbat kadagiti parparikutda, ti masarakan iti horoscope.
Nupay kasta, dagiti kadi benneg iti horoscope kadagiti pagiwarnak ken magasin pudno a makatulongda? Paliiwenyo ti insurat ti mabigbigbig nga astrologo a ni Alexandra Mark iti librona nga Astrology for the Aquarian Age: “Dagitoy a mabasa . . . ngangngani awan gundawayda nga agaplikar iti indibidual malaksid no maibatay iti pannakaiparna. Ngem ti pannakabalin iti singasing saan a mabalin a laksiden.” Agsardengkayo ken agpanunot, tarigagayanyo kadi a ti biagyo ti basta maiturong iti pannakaiparna wenno ti laeng pannakabalin iti singasing?
‘Nupay kasta,’ mabalin nga imtuodenyo, ‘ti kadi panangipadto iti personal a horoscope a naibatay iti umiso a tiempo ken lugar a nakaipasngayan ti maysa ad-adda nga umiso?’ Ti kasta a pammati nalawag a naibatay iti kapanunotan a mabalin a dagiti nailangitan a bambanag nangipaayda iti nakabilbileg nga impluensia iti panagbiag dagiti tattao. Ngem kasano a pudno daytoy no nakawatwatiwat ti nagbabaetan dagiti planeta ken ti daga? Dagiti sientista impakitada a ti epekto no addaman dagiti nailangitan a bambanag kadagiti indibidual ket saan a pulos a madlaw. Kinapudnona, ti pangibatayan isu a nagtaudan ti astrolohia, a ti daga isu ti sentro ti uniberso ket ti init ken dagiti planeta agrikosda iti dayta, ket ulbod.
Bayat a ti kinapateg dagiti horoscope ket mapagduaduaan, naimbag no imtuodentayo ti napatpateg pay a saludsod:
Pakadangran Kadi ti Horoscopes?
Wen, mabalin a pakadangran. No basaenyo ti benneg ti horoscope, adda ti peggad ti pannakapukawyo ti abilidadyo a mangaramid kadagiti napapateg a pangngeddeng, wenno kas panangikuna ti astronomo a ni Roger Culver: “Ti peggad a ta ipabiangyo iti sabali ti pangngeddeng—dagiti bituen ti namagbalin kaniak a mangaramid iti kasta.” Pudno, ti maysa a tao mabalin a basaenna ti benneg gapu laeng ti makalinglingay a pategda, ngem kas pangarigan ti maysa a pasamak iti biagyo naiparna a maipada iti nabasayo iti horoscope. Mabalin kadi a nasikap a maiturongkayo a mamati nga adda kinapudno iti impadto ti horoscope? Mabalin kadi a maallukoykayo nga agbalin nga ad-adda pay a mairaman iti astrolohia?
No kasta, ti ad-adda pay a serioso a banag ti mabalin a mapasamak. Ti nangrugi a saan a makadangran a panagusiuso ti mabalin nga agtungpal iti ar-aramid a manglabsing iti kinuna ti Mannakabalin-amin a Dios. Imbaga ni Jehova a Dios kadagiti Israelita idi ugma a kabusorna ti aniaman a porma iti panagpadpadles, agraman ti panagpannuray kadagiti nailangitan a bambanag.
Tapno ipakita no kasano kaserioso ti banag, kunaen ti Biblia: “No addanto matumpongan iti tengngam iti uneg iti uray ania kadagiti ruruanganmo a ni Jehova a Diosmo intedna kenka lalaki wenno babai a mangaramid iti dakes iti sango ni Jehova a Diosmo iti panagsalungasing iti tulagna, ket mapan ket nagserbi kadagiti sabali a didios ket nagdayaw kadakuada wenno iti init wenno iti bulan wenno iti uray ania a buyot ti langit isu a diak imbilin kenka, ket maibaga kenka ken mangngegam palutpotemto ngarud a naimbag, ket, adtoy! no pudno ket nalawlawagan, a dayta a makarurod naaramid iti Israel, iti kasta, alaemto dayta a lalaki wenno dayta a babai a nangaramid iti daytoy a dakes a banag kadagiti ruruanganmo, agpada ti lalaki wenno ti babai, ket sika uboremto ida tapno matayda iti batbato.”—Deuteronomio 17:2-5.
Apay a ti Dios kagurana ti panangusar ti init, bulan, ken bitbituen kas partaan? Umuna, daytat’ maibusor iti panggep a nangparsuaanna kadakuada. (Genesis 1:14-18) Masapul nga agpannuraytayo iti Namarsua, saan a ti pinarsua, a maipaay iti panangiwanwan. (Roma 1:25) Maikadua, ti Dios ti addaan iti naisangsangayan a lugar iti biagtayo. Ti panagdayaw kenkuana saan koma a maipaay kadagiti sabsabali a tattao wenno bambanag. (Deuteronomio 4:24) Ti maysa a tao mabalin nga agpannuray a naimbag iti horoscope ta ti panagpannurayna iti dayta ti mabalin nga agbang iti panangdayawna iti dayta. Maikatlo, daytat’ mabalin nga agturong iti okultismo. Ket ti pannakinamin iti okulto ti mamagbalin iti maysa a di mangipagpagarup a tao a nalaka a puntiria iti nabilbileg ngem tao a puersa iti likudan iti okultismo—dagiti demonio. (Idiligyo iti Deuteronomio 18:9-12; Isaias 47:12-14; Aramid 16:16-18.) Tapno malapdan ti napeggad a pannakairaman kadagiti horoscope, nangipaay ti Dios iti nasaysayaat pay kadatayo:
Natantan-ok a Giya
Ni Jehova a Dios impaayna ti Saona, ti Biblia, isu a kanayon a mapagtalkan. Ipanamnamana kadatayo: “Kastanto met ti saok a rummuar iti ngiwatko. . . . Tungpalennanto ti pagayatak ken rumang-ayto iti banag a pangipanak kenkuana.”—Isaias 55:11.
Nupay kasta, kasapulanna ti panangikagumaan iti biangtayo ti panangsukimat iti Sao ti Dios tapno gun-odentayo ti espisipiko a balakadna. Dayta ti inaramid ni masirib nga Ari Salomon. Isut’ nagsurat: “Ta amin dagitoy impapusok, tapno sukimatek amin daytoy, a ti nalinteg ken ti masirib ken dagiti ar-aramidda addada iti ima ti Dios.” (Eclesiastes 9:1) Gapuna, imbes nga agpaiturongtayo iti saan a natalged a panangiwanwan ti horoscope dagiti astrologo, ikabilyo ti panagtalekyo iti natibker a panangiwanwan ni Jehova a Dios.
[Kahon iti panid 18]
“Dagiti tattao mariribukanda. Tarigagayanda ti tulong iti panangaramid kadagiti pangngeddeng a ramanenna ti gastosen, personal a relasion ken ti pagtrabahuan. Ti relihion saanna a masabet ti kasapulan a kas idi ket ti sikiatria addaan kadagiti limitasion. Gapuna . . . iti panangikagumaan a mangipamaysa kadagiti bagbagida iti maysa a banag nga agparang a sientipiko [dagitoy] nagturongda iti nakaad-adu a bilang iti astrolohia.”— Dr. Alan Rosenburg, psychiatrist, Nature/Science Annual.
[Kahon iti panid 19]
Ti Committee for the Scientific Investigation of Claims of the Paranormal, idi Nobiembre 16, 1984, insingasingna ti pannakaipablaak daytoy a di panangamin kadagiti amin a benneg ti horoscope: “Ti sumaganad nga astrolohikal a padles masapul a basaen koma a maipaay laeng a paglinglingayan. Dagiti kakasta a padto awan ti natalged a nakaibatayanda iti sientipiko a kinapudno.”