Di Umdas ti Panagbalin a Bituen iti Rock
SANGAPULO ket walo a tawenen a napalabas maysaak a bituen iti musika a rock ket ti kinalatakko kasta unay. “Anian a naggasatka, Bruce!” kuna dagiti gagayyemko bayat ti panangmatmatda kadagiti bambanag nga adda kaniak a mabalin nga arapaapenda laeng. “Pagay-ayatko ti adda iti kasasaadmo. Guapoka; nalatakka kadagiti babbai; addaanka ti kuarta; agwaywayaska ken siwayawaya! Ngangngani isuamin a papanam mabigbigdaka dagiti tattao. Mabigbigmo kadi no kasano a nakagasgasatka?”
‘No dagitoy amin a bambanag a tagtagiragsakek isuda ti pangibatayan iti kinaragsakko,’ pampanunotek, ‘ngarud apay nga awananak iti makin-uneg a talna ken pannakapnek?’ Kamaudiananna naammuak a dagidiay nga agsapsapul iti pudno a ragsak babaen iti pananggun-odda iti dayta a kita iti panagbiag addada iti di umiso a dalan.
Palubosandak a mangilawlawag iti napasamak.
Ti karerak a panagkanta nangrugi idi 1960’s. Ages-eskuelaak idiay Pranses-Canadian a probinsia iti Quebec ken agkankantaak kadagiti konsierto iti eskuelaan idi a nasabetko ti managtokar iti guitara nga estudiante. Nangpormakami iti maysa a bassit a musikal a grupo a saan laeng a nakagun-od iti lokal a kinalatak no di ket ti pannakaipablaak.
Maysa a manangorganisar iti panagsasala iti eskuelaan ti nakagun-od iti impormasion maipapan iti laingko ket tinukonannak ti lima a doliar para iti maysa a kanta no agkantaak a kadua ti maysa a nalatak a banda iti pagsasalaanna. Immanamongak. Idi nakagtengak iti pagsasalaan, nasarakak ti napnapno a balay, a napno kadagiti magagaran nga agsala. Ngem idi nangrugi a nagtokar ti banda ket rinugiak ti nagkanta, ti bunggoy dagiti agtutubo nalipatanda ti nagsala ket rinugianda ti nagaribungbong iti sanguanan ti intablado. Ti sala nagbalin a maysa a a pabuya!
Dagiti musiko tarigagayandak a makikadua iti grupoda kas managkanta. Immanamongak ket nangrugin a naammuankami a kas “The Sultans.” Idi 1965 ti manedyermi ti nangiserrek kadakami iti naipablaak a naimbag a salisal iti banda iti rock. Ti umuna a premio isu ti linawas a pabuya iti maysa kadagiti kadadakkelan a telebision idiay Quebec. Kadagiti 28 a banda iti isuamin a probinsia, dakami ti nangabak iti umuna a premio! Dayta ti nangrugian ti pasinayami iti TV.
Ti musikami iti 45 rpm a plaka ti nagpangato agingga iti umuna a lugar iti tsart iti listaan dagiti kanta, ket dagiti programami iti telebision ti pilien dagiti dadduma nga estasion. Di nagbayag nagbalinkamin a numero uno a grupo idiay Quebec, a ti pagilakuan kadagiti plakami agdagup iti nasurok a kagudua a milion. Kamaudiananna binaybay-ak ti “The Sultans” ket nagsoloak. Sakbay ti isisinak, nupay kasta, naaddaankami iti panagpasiar a pammakada. Idiay Montreal idi 1968 isu ti eksena ti maudi a konsiertomi. Maysa a bunggoy dagiti 8,000 a tattao ti nangipaay kadakami iti pammakada. Naawiskami. Ti bunggoy dakdakkel ngem ti bunggoy a nangbuya iti Rolling Stones, Johnny Hallyday, ken Adamo (dagiti internasional a bituen) isu a matiptipon iti dayta a tiempo.
Ti panagbalinko a soloista nangipaay kaniak ti ad-adu a wayawaya, ket kakuyogna dayta ti ad-adu a kuarta. Daytoy kabbaro a nasarakan a wayawaya ti nangipalubos kaniak a maaddaan iti sangapulo-lawas a bakasion idiay Europa, isu a nangipaay kaniak iti gundaway a mangusig iti biagko kas maysa a bituen iti rock manipud iti ad-adda pay a napudno a panangmatmat. Ti nakitak ti nangriribuk kaniak. Agtawenakon iti 21, agbalin nga ad-adda pay nga ambisioso bayat ti panaglabas ti aldaw, ket ti panagsasalisal gagangay tapno makauna.
Idi nagsubliak idiay Quebec, di nagbayag addaanakon iti dua a plaka a nakagteng iti umuna a lugar iti listaan dagiti kankanta. Kalpasanna, idiay La Gala des Artistes idi 1969, napanagananak ti “Male Artist of the Year.” Nupay adda iti sidong dagiti silsilaw ken ti rimat iti rabii, kaskasdi nga iti uneg diak pay laeng mapnek. Ti kinadakes iti sistema ken ti pamay-an ti pannakatrato dagiti agtutubo iti negosio ti musika ti nangupay kaniak. Nupay kasta, nasallamaanak a mismo iti daytoy. Dadduma a salsaludsod ti kankanayon a pampanunotek, kas iti: ‘Sadino ti pagturongan ti biagko?’ ‘Apay nga itultuloyko daytoy a propesion?’
Idi 1969 ti idolo iti rock a ni Brian Jones iti “Rolling Stones,” ti nasarakan a natay iti edad a 26, iti paglanguyanna. Idi naladawen a 1970 ti nalatak a managkanta iti blues ken rock a ni Jimi Hendrix ken ti kangrunaan a kumakanta iti rock a babai iti America, ni Janis Joplin, agpada a natayda iti edad a 27 gapu iti droga wenno dagiti mainaig iti droga a makagapu. Sangapulo a bulbulan kalpasanna ti sabali pay a nalatak a bituen iti rock, ni Jim Morrison, kangrunaan a managkanta iti “The Doors,” ti natay iti edad a 27. Dagitoy amin natayda iti kangitingitan iti karerada! Nakitak ti bagik a mairaman met iti immoral nga estilo ti panagbiag ken ti panagusar kadagiti droga. Makumbinsirakon a ti panangsurot iti dalan a sinurot dagitoy a nalalatak a bannuar iti rock ket saan a maipaay kaniak.
Ngem nagtalinaed pay laeng ti saludsod: ‘Ania ti pudno a panggep iti biag?’
Makitak ni nanangko, nga addaan iti paset iti parparikut iti panangpadakkel iti dua nga ubbing a lallaki nga awan iti amana a bumakbaketen. Situtured nga inaywananna ti rebbengenna ngem gapu iti ania a panggep? Tapno agtultuloy nga agin-inot a bumakbaket, kumapkapuy, agsakit, ken matayen? Daytoy kadi ti panggep iti biag? Dagitoy a saan a nasungbatan a salsaludsod ti nangupay kaniak.
Bayat dagitoy a tawen, napukawko ti amin a pammati ken panagraem iti iglesiak ken kadagiti sursurona. Kasta unay ti panagduaduak iti kaada iti Dios. Nageksperimentoak kadagiti kabbaro ken nagduduma a droga, ngem dagitoy ti nangibati kaniak a naupay ken no dadduma mariribukan pay iti panunotna.
Iti panangpanunot a ti kasta unay a panagbalbaliw iti biagko ti mabalin a mangipaay kaniak iti pagimbagan, nagsapulak iti trabahok iti ruar ti trabaho iti musika. Tinangdanannak ti maysa a kompania iti steel iti pito-bulan a kontrata idi 1975. Bayat dagidiay a bulbulan iti panagibangon iti steel, naallukoyak iti maysa a nataenganen a trabahador a, maisupadi kadagiti dadduma, isut’ kasla nakakalkalma ken natalna. Imbagana kaniak a basaek ti Biblia, gapuna inkeddengko ti gumatang iti maysa tapno kitaek no daytat’ makatulong kaniak a makasarak iti makin-uneg a talna.
Idi nagngudo ti kontrata ket naikkatakon iti trabaho, napanunotko a makasapulak iti pagbiagko iti nadayaw a pamay-an kas maysa nga autor-kompositor. Iti daytoy a pamay-an naadaywak ti panagbalin a nalatak unay ket kaskasdi a maaddaanak iti pannakapnek iti panagtrabahok iti musika, ta ti panagayatko iti panagkanta kaskasdi a nabileg pay laeng. Mangbasaak met iti maysa a kapitulo iti Biblia iti tunggal agsapa.
Kanayon nga addaak iti apartmentko bayat ti aldaw, gapuna panapanawen a bisitaendak dagiti Mormons, maysa a padi ti paruko, ken dagiti Saksi ni Jehova. Kankanayon a makisaritaak kadakuada maipapan iti panggep iti biag. Ket dagus a nabigbigko a dagiti Saksi ni Jehova naidumada. Napakumbabada ken mangipakitada iti napasnek nga interes kaniak ken, kangrunaan ngem amin, ibatayda dagiti sungbatda a siiinget iti Biblia, maysa a banag a saan nga aramiden dagiti pannakabagi ti dadduma a relihion.
Nupay managduaduaak, immanamongak a makipagadal iti Biblia ken Roger, maysa a Saksi a kaedadko. Masansan agpambarak tapno malisiak ti leksion iti panagadal ti Biblia iti lawas, ngem nagtultuloy ni Roger—isu a pagyamanak unay. Tinulongannak a mangsapul iti sungbat dagiti salsaludsodko isu a nangupay kaniak iti nakabaybayagen.
Ti damo a gimong nga inatenderak idiay Kingdom Hall ti pudno a nangsair iti pusok. Ditoy manen nasarakak dagiti napakumbaba a tattao nga addaan iti pudno a pannakaseknan kadagiti kaarrubada. Ket direkta dagiti impormasion a naiparang ken manipud iti Biblia. Iti damdamo unay, naawatak ti panggep ti Dios a maipaay iti tao. Saanak unayen a maapektaran iti saan a kinahustisia daytoy daan a sistema, gaput’ ammok a din agbayag ti Dios agtignayton, a mangiyeg iti maysa a paraiso iti talna iti daytoy a daga iti sidong ti turay ti Pagarian ni Kristo kas naikari idiay Salmo 37:29 ken Daniel 2:44.
Nanipud idin ti praktikal a balakad ti Biblia ti nangtulong kaniak a ‘nanglinteg kadagiti bambanag’ iti biagko. (2 Timoteo 3:16, 17) Inkallaysak ti babai nga inay-ayatko isu a kabkabbalayko, ni Danièle. Ket di nagbayag kalpasanna, indedikarkon ti biagko nga agserbi ken Jehova. Ti asawak immanamong nga agadal iti Biblia, ket bayat ti panaglabas ti tiempo indedikarna met ti biagina ken Jehova.
“Saan a nalaka ti panangaramid iti panagbalbaliw iti biagko,” impudno ni Danièle. “Ngem babaen iti tulong ni Jehova ken ti panangsuportar ken ulidan ni Bruce, nasarakak ti pudno a kinaragsak kadagiti nalinteg a prinsipio iti Biblia.” Agpadakami a nabautisaran idi 1978.
Nupay no inapresiarko ti trabahok a maipaay iti customs broker idiay International Airport iti Montreal, ti pusok adda iti kangrunaan a trabahok kas ministro. Kinapudnona, maragsakanak unay a mangtulong kadagiti sabsabali babaen iti panagadal iti Biblia, kas met ti pannakatulongko. Iti daytoy a kita ti pannangted ti pannangted pudno nga adda ‘ad-adda a naragragsak ngem ti panangawat.’—Aramid 20:35.
Kas ministerial nga adipen iti lokal a kongregasion, napadasak ti adu a rag-o ken pannakapnek iti panangtulong kadagiti sabsabali. Okupado ti biagko ken naan-anay, ngem sipupudno a maikunak a mapadpadasakon ti kinatalna iti uneg a sapsapulek ken ti pudpudno a rag-o iti panagbiag. Nupay no ti karerak iti panagpabuya ti mabalin a nagpatinggan, pudno nga agyamanak ken Jehova a Dios a ti intero a kabbaro a “pudno a biagko” ti naluktan a maipaay kaniak.—1 Timoteo 6:19.
Wen, pagay-ayatko pay laeng ti musika! Nangnangruna a tagiragsakek ti klasikal, folk-rock, ken ti dadduma a jazz, ngem nagbalinakon a napili iti kita nga imdengak. Dadduma kadagiti moderno a kankanta addaanda iti imoral ken naipamaysa iti droga a mensahe. Dayta a kita ti musika dinak tulongan a mangiyeg iti panagbiagko ken pampanunotko a maitunos iti pagayatan ti Dios. Itan agkantaak a maipaay laeng iti pagragsakan. Dayta ti makagapu no apay nga ita makasarakak iti adu a rag-o iti pannakikadua iti asawak ken gagayyemko kadagiti babassit a sosial a panagtitipon a sadiay addaankam amin iti gundaway nga agkanta.
Bayat ti pananglagipko iti nalikudak iti karera a panagkanta, makitak no kasano a ti kinaragsakko ti bumassit bayat a kumaro ti kinalatakko. Ngem itan ta pinanawakon ti panagpabuya ket nagbalinakon a maysa kadagiti Saksi ni Jehova, ti kinalatakko bimmassit, ngem saan a nagsardeng ti irarang-ay ti ragsakko.
Dagiti tattao a saan a makaammo iti daytoy nga internasional nga organisasion dagiti Saksi ni Jehova pagarupenda a nalmesak iti pannakaupay wenno pagbalbalinek a sarukod ti Biblia. Maysa nga announcer iti radio, kalpasan ti panangpatokarna iti maysa kadagiti plakak, kinunana maipapan iti biagko: “Daksanggasat, saan a simmayaat dagiti bambanag a maipaay ken Bruce. Nagbalinen a maysa kadagiti Saksi ni Jehova.” Ti laeng maikunak iti daytoy ket: “Kitaenyo a mismo no ania ti maaramidan ti Biblia kadakayo. Para kaniak, dayta ti kasayaatan a banag a napasamak pay laeng.”
“Kinapudnona,” umanamong ni Danièle, “babaen ti pannakaammomi iti kinapudno iti Biblia, ni Bruce ken siak nanayonanmi ti pudpudno a panggep iti biagmi.”—Kas insalaysay ni Bruce Huard.
[Blurb iti panid 19]
Di nagbayag addaanakon iti dua a plaka a nakagteng iti umuna a lugar iti listaan dagiti kankanta
[Blurb iti panid 20]
Ti kinadakes iti sistema ti nangupay kaniak
[Blurb iti panid 21]
Ti praktikal a balakad ti Biblia ti nangtulong kaniak a ‘nanglinteg kadagiti bambanag’ iti biagko
[Blurb iti panid 21]
Ti pannangted, pudno a ‘naragragsak ngem ti panangawat’
[Ladawan iti panid 20]
Ti panangasaba ken panagadal adda pasetda a namagbalin ti biag ni Danièle ken ti biagko a naragsak ken makapnek