Aniat’ Baro Maipapan iti Kinaranggas iti Panaglinglingay?

Ti kadi sekso ken kinaranggas, a maipabpabuya kadagiti sine ken programa iti TV, mangipaay kadagiti managbuya iti kapanunotan ken mamagbalin kadakuada nga agtignay iti isu met laeng a pamay-an iti pudno a panagbiag? Daytoy a nabayagen a masupsuppiat a tema naikkan iti kabbaro a pagturongan iti nabiit pay.

“Gagangay dagitoy a kapanunotan ti matengngel babaen iti panagtignaytayo,” kuna ni Dr. Leonard Berkowitz, propesor iti sikolohia idiay Unibersidad iti Wisconsin. Ngem no dagiti kakasta a pelikula ken programa ti maitan-ok iti nagan ti naarte nga ebkas, ken anamongan dagiti dadduma a kritiko, kuna ni Berkowitz, “dayta ti tumulong a mamagbalin a legal saan laeng a ti sine no di ket ti kababalin, a mangikkat iti panagannad ti managbuya ken mamagbalin a nakaro ti pannakatignayna.” No mainayon ti banag maipapan iti sekso, kas masansan a mapasamak, daytoy “pataudenna ti ad-adda a pannakagargari isu a mamagbalin kadagiti tattao nga ad-adda nga agtignay a maitunos iti kapanunotanda.”

Ti konklusion ni Dr. Berkowitz, nga isu ti nagbanagan ti nasurok a 20 a tawtawen a panagsirarak, ti insitar ti The New York Times iti maysa nga artikulo ti sumagmamano a pelikula a kastoy a kita. Kadagiti adu a tattao, kuna ti artikulo, dagitoy a programa “ti partikular a saan a maawat gapu laeng ta daytoy ti mangipaay iti kapanunotan ti panangraem iti panangipabuya kadagiti naranggas unay a panangbugbog.”