Siasino ti Kaarrubak?

’SALUDSODANDAK, “Siasino ti kaarrubak?” Ket, dayta ti siasinoman nga agnaed iti sumaganad a ruangan, siempre! Ken kasta met dagidiay nga agnaed iti dayta a kalye, dagidiay adda iti sangakaarrubaan. Dagitoy dagiti kaarrubak.’

Saan sigun kadagiti dadduma a nagbiag idi kaaldawan ni Kristo Jesus. Uray pay idi adda nagduduma a kapanunotan. Daytoy agbalin a nalawag no usigentayo ti panagsarita ni Jesus ken ti maysa a lalaki a nalaing iti Linteg a Judio, a nailanad iti Lucas 10:25-37.

“Mannursuro, anianto ti aramidek tapno matawidko ti biag nga agnanayon?” insaludsod ti abogado.

“Ania ti adda a naisurat iti Linteg? Kasano ti panangbasam?” inyimtuod ni Jesus.

“‘Ayatem ni Jehova a Diosmo iti isuamin a pusom ken iti isuamin a kararuam ken iti isuamin a pigsam ken iti isuamin nga isipmo,’ ken, ‘ti kaarrubam a kas iti bagim,’” insungbat ti abogado.

“Nalinteg ti isusungbatmo,” kinuna ni Jesus. “Itultuloymo nga aramiden daytoy ket agbiagkanto.”

Ngem ti abogado saan a napnek agingga iti dayta. Gapuna insaludsodna: “Siasino ti kaarrubak?”

Dagiti eskriba a Judio, maisupadi iti bukodda a Linteg Mosaiko, kunaenda iti di naisurat a tradisionda: “Ayatem ti kaarrubam ket guraem ti kabusormo.” Dagiti eskribas ken dagiti Pariseo isuroda a dagidiay laeng mangsurot iti di naisurat a linteg dagiti agkaarruba. Dagiti Judio a saan a mangsurot iti dayta, ken dagiti amin a Gentil, saanda a mamatmatan kas kaarruba no di ket kabusor. Dagiti kakasta a di makituntunos a Judio ken dagiti Gentil saan a masapul a matulongan uray pay no agpeggad ti biagda. Babaen ti panangpanunot iti kastoy, ken tapno ikalinteganna ti bagina met laeng iti dina panangayat kadagiti amin a tao, inimtuod ti abogado: “Siasino ti pudno a kaarrubak?”

Kas sungbat iti saludsod, nangted ni Jesus ti maysa a pangngarig iti Naimbag a Samaritano (Dagiti Samaritano mamatmatanda kas ganggannaet ket busoren dagiti Judio).

“Maysa a tao,” kinuna ni Jesus, “simmalog a naggapu iti Jerusalem a napan idiay Jerico ket natulisan ket sinamsamda ti amin nga adda kenkuana ken ginagarada ti sugat ket pinanawanda a ngangngani matay.” Ket nakita ti maysa a padi ti tao ket limmabas a liniklikanna. Maysa a Levita ti nakakita kenkuana, ket liniklikanna met. “Ngem ti maysa a Samaritano idinto a magmagna, napan iti yanna ket, idi nakitana, natignay ti asina.” Inagasanna dagiti sugsugatna, ket impanna iti pagdagusan, ket binayadanna ti pannakatarakenna, ket imbagana iti bumalay a bayadannanto ti isuamin a magastona pay inton sumubli.

“Asino ngarud kadagitoy a tallo,” insaludsod ni Jesus iti abogado, “ti pagarupem a kaarruba ti lalaki a natulisan?” Simmungbat ti abogado: “Daydi nangaramat kenkuana ti asi.” Idin kinuna ni Jesus kenkuana: “Inkan ket aramidem met ti kasta.”

Maipagarup a ti padi ket maysa a managdaydayaw ni Jehova. Kasta met ti Levita. Ngem dagitoy dua agpadada a nangliklik iti sabali a dalan. Awan asinoman kadakuada ti naimbag a kaarruba ti lalaki nga agkasapulan. Ti Samaritano, a kagura ken di awaten ti padi ken ti Levita ken ti relihionda, isu ti nangipaay iti asi. Natignay ti asina iti kasasaad ti lalaki, ket tinulonganna. Isut’ nagbalin a kaarruba ti lalaki. Nagtignay a kaarrubana.

Siasino Ita ti Kaarrubayo?

Ita pagarupentayo a dagiti kaarrubatayo isu dagiti agnanaed iti asideg kadatayo. Ti Griego a sao a ple·siʹon, a naipatarus a “kaarruba,” kangrunaanna kaipapananna ti “asideg.” Ti Biblia, nupay kasta, iti agpada a Hebreo ken Griego a Kasuratan, matmatanda ti kaarruba iti nasaksaknap a kaipapanan.

Dagiti eskriba ken dagiti Pariseo idi kaaldawan ni Jesus limitaranda ti “kaarruba” kadagidiay a mangsalimetmet iti di naisurat a tradision iti relihionda. Gapuna, limitaranda ti panagayatda iti kaarrubada kadagiti padada a relihiunista. Nupay kasta, ti ayat ni Jehova ken ni Jesus maipaay iti isuamin. (Mateo 5:43-48) Kasta met ti ayat dagiti pudno a Kristiano ita. Tapno agbalin a Kristiano saan laeng nga iti nagan, masapul nga agbalinda a kaarruba dagiti isuamin a tattao ket ipakitada ti panagayat iti kaarruba kadagiti isuamin.

Idi a ti Samaritano pinagbalinna ti bagina a kaarruba ti biktima, tinignayna kadi ti ayat ti biktima iti Samaritano? Saan a naibaga kadatayo, ngem masapul a kasta. Kasta met, idi immay ni Jesus ditoy daga ket natay a maipaay iti sangatauan, isu, kasla inaramidna ti bagina a kaarrubada. Daytoy kadi ti nangtignay kadagiti tattao a mangayat kenkuana ken umadani kenkuana? Ti kadi ayat ni Jehova iti lubong ti sangatauan, a naipakita babaen ti panangibaonna iti Anakna ditoy daga kas subbot, ti mangtignay kadagiti tattao nga umadani iti Dios? Kadagiti adu pudno a kasta ken kaskasdi a kasta pay laeng ita. “Datayo agayattayo, agsipud ta inayatnatayo nga immuna.”​—1 Juan 4:19; Juan 3:16; Santiago 4:8.

Iti ania a pamay-an a maipakita daytoy nga ayat? Saan a babaen iti panagkuna “Apo, Apo,” no di ket babaen ti panagaramid iti pagayatan ti Dios, babaen iti panangasaba kadagiti sabsabali maipapan iti Pagarian ni Jehova. (Mateo 7:21; 1 Juan 5:3; Isaias 43:10-12; Aramid 1:8) Dayta ti kakaisuna ken agnanayon a tulong a maipaay kadagiti agsagsagaba a sangatauan ita. Dagidiay a, kas iti mannakikaarruba a Samaritano, matignay ti asida babaen iti nakalkaldaang ken agpegpeggad a kasasaad ti sangatauan, ken isu a mangiyeg kadakuada iti makaagas a naimbag a damag iti Pagarian ni Jehova​—dagitoy ti mangar-aramid iti bagbagida a kaarruba dagiti isuamin a tattao. Awan ti mailaklaksid​—lalaki wenno babai, agtutubo wenno nataengan, nabaknang wenno napanglaw, aniaman a nasionalidad, aniaman a rasa, aniaman a relihion, aniaman a kolor ti kudil​—amin mamatmatanda kas kakaarruba a masapul a tulongan babaen iti naimbag a damag ti Pagarian.

Gapu iti ayat iti kaarruba, dagiti Saksi ni Jehova impangagdan bayat ti adun a tawtawen ti bilin idiay Efeso 4:25: “Sawenyo ti pudno tunggal maysa iti padana a tao.” Minilion dagiti simmungbat ket inwaragawagda met daytoy a kinapudno. Dayta ti kinapudno maipapan iti Pagarian ni Jehova iti sidong ti Prinsipe ti Kappiana, ni Kristo Jesus. Dayta ti kinapudno a mangiyeg iti talna iti nagbabaetan dagiti agkakaaruba. Ti kasayaatan kadagiti isuamin, dayta ti kinapudno a mangiyeg “ti talna iti Dios a daeganna ti anim a pannakaawat.”​—Filipos 4:7.