Panangmatmat iti Lubong
Sangalubongan a Panangabuso iti Droga
Pattapattaen ti WHO (World Health Organization) nga adda agarup 48 milion a tattao iti sangalubongan a mangabuso ken di umiso a mangusar iti droga. Iti dayta a bilang, aganay a 1.7 milion ti adikto iti opium, 30 milion ti agsigarilio iti cannabis, ken 700,000 ti agusar iti heroin. Napattapatta a dagidiay a nasiluan iti cocaine, isu a mamatmatan a kakaruan a makaadikto a droga a magun-odan, ti aggatad iti sumagmamano a milion. Sigun kadagiti opisiales iti WHO, dagitoy a bilang iparangarangna laeng ti sangkabassit a pasetna, ta ti magun-odan nga impormasion manipud adu a pagpagilian ket limitado.
AIDS kas Armas?
Dagiti kriminal a korte idiay Estados Unidos ti tirtiruenen dagiti mainaig iti AIDS a kaso. Dagiti abogado agdardarumda kadagiti darum a maibusor kadagiti “naidarum a maipagarup nga addaan iti sakit no tumuprada wenno kumagatda kadagiti opisiales ti polis,” kuna ti The National Law Journal. Kadagiti tallo a nasinasina a kaso, dagiti nagdarum, inkalinteganda ti kasta a panangpardaya gapu iti peggad iti panagsaknap ti makapapatay a sakit. Patienda a ti “AIDS ti mabalin a naiyakar babaen iti katay no dayta ti makastrek iti nakanganga a sugat, ti mata wenno iti dara.” Maysa nga abogado ti nagkuna: “Saantay a rummuar a mangsapsapul kadagiti idarum a tattao. Ngem no adda mangus-usar iti sakit kas maysa nga armas a pangsalaknib, ditay palubosan dayta.”
Krisis ti Utot iti Makintengnga a Daya
Adda maysa a parikut idiay lugar ti Israeli-Syrian cease-fire. Saan a kadagiti tattao—ti lugar ket mammano ti agnanaed—no di ket kadagiti utot iti talon. Ti napattapatta a 250 milion nga utot ti agnanaed ditoy. Dagiti utot ti mangpatpatay kadagiti bagbagida met laeng a nakaad-aduda babaen ti itatappuakda iti waig ken kadagiti rangkis iti Golan Heights. Sigun kadagiti sientista a nakapaliiw kadakuada, dagiti utot agtigtignayda a nainkasigudan tapno risotenda ti parikut ti nalabes a populasionda.
Bulkan Pataudenna ti Baro nga Isla
Idi Lunes, Enero 20, naipasngay ti maysa nga isla 750 milias (1,200 km) iti abagatan ti Tokyo. Ti adda iti uneg ti baybay a bulkan bimtak idiay Makinlaud a Pacipico ket nangporma iti baro a kasla kaguduat’ bulan ti itsurana nga isla. Iti Biernes ti isla “dimmakelen” a nagbalin nga agarup 2,300 pie (700 m) ti kaatiddogna manipud daya nga agpalaud ken 650 pie (200 m) ti kalawana iti kalawaan a pasetna, ket “dumakdakkel” pay, imbaga ti Maritime Safety Agency iti Japan iti Agriingkayo! Ti kappasngay nga isla ti mabalin nga agpukaw, nupay kasta. “Dagiti kabbaro nga isla nagparangda kalpasan ti panagbettak ti bulkan iti dayta met laeng a lugar idi 1907-1908 ken idi 1914, ngem di nagbayag nagpukawda,” kuna ti Mainichi Daily News.
Nangatot’ Teknolohiana a Panagipuslit
Ti kinabuklis isu ti kangrunaan a gapu iti likudan ti panagipuslit dagiti Americano iti nangato ti teknolohiana nga alikamen a mairuar idiay Estados Unidos, ipadamag ti The New York Times. Dadduma kadagita ti mausar a pangsubok iti nuklear nga armas. Dagiti ganggannaet a gobgobierno didan usaren dagiti bukodda a secret service workers tapno makagun-odda kadagiti nangingina a teknolohia ti E.U. iti saan a legal a pamay-an, kuna ni Richard Roberts, maysa nga ahente iti U.S. Customs Service. Basta ipakaammoda laeng a ti pagilianda tarigagayanna ti maysa a produkto ket situtulokda a mangbayad iti kasayaatan a presio iti dayta. “Ket magun-odanda dayta,” kinunana, agsipud ta ti “kinabuklis simrek.” Sino ti mangaramid ti panangipuslit? “Kaaduanna dagiti lehetimo a negosiante a nanggundaway iti dakkel a kuarta,” kuna ti katulongan nga abogado iti E.U., ket kinunana pay a dagitoy ti “nasisingpet a tattao a makimismisa.”
Sadino ti Ayan dagiti Animal?
Dagiti turista a bumisbisita idiay paganopan a parke iti Africa no dadduma ti maupay iti saanda a pannakakita iti umdas nga animal. “Ti maysa a paset saan a napno kadagiti nadumaduma nga animal,” kuna ti magasin iti Sud Africa a Fauna & Flora, “a mabalin a mangipamatmat iti nasayaat a panagtimbeng iti panaganop ken ti karuotan.” Ti adu unay nga animal dadaelenda ti ruot a nangabbong iti daga ket pataudenna ti panagreggaay. Idi, dagiti maanopan nga animal addaanda iti naan-anay a wayawaya nga agpasiar, a dayta ti proteksion iti animal ken ti karuotan. Itan, ta limitadon ti panagpasiarda, dagiti manangaywan naskenen ti panangpili iti arban tapno dagiti animal saanda a matay iti nakalkaldaang nga ipapatay gapu iti pannakabisin ken pannakawaw.
Nangina a Tultulang
Ti nabiit pay a pannakaiparit ti panangilako iti sabali a pagilian kadagiti skeleton ti tao manipud India ti nakaapektar a naimbag iti suplay ti Europa, Estados Unidos, ken Japan, kuna ti India Today. Ti kasta a limitado a suplay iti skeleton ti tao ti nagbanag iti nangingngina a gastos kadagiti estudiante ti medisina, a masapul nga agbayaden iti $140 a maipaay iti paset laeng ti skeleton nga idi ket aggatad laeng iti $100. Nupay no ti India ti mangipapaay iti suplay iti tultulang ti tao iti nasuroken a 50 a tawtawen, naipaay ti pannakalapped gapu iti “panagagaw kadagiti bangkay” ken dadduma pay a nakaam-amak nga ar-aramid dagidiay mangsapul a magunggonaan manipud iti natay.
Kinapudno ti Panangsubok iti “Allergy”
Ti $350 a panangsubok iti dara nga intukon ti Bio Health Centers ikarina ti mangsukimat iti kinasensitibo ti indibidual iti nasurok a 187 a nagduduma a sustansia. Ti magasin nga Omni ipadamagna a ni Frank Golden, ti imbestigador iti FDA nga agduadua maipapan iti balligi ti kasta a tukon, ti mangipatulod iti sample iti dara ti baka iti sentro ti pangusigan. Makapainteres, ti kompania saanna laeng a di nailasin ti dara a kas saan a dara ti tao no di ket impakaammona iti imbestigador a ti nagidonar ket addaan iti “allergy” iti cottage cheese, yogurt, ken gatas iti baka!