Saanen a Maiparit a Libro
TI KABABALIN ti Iglesia Katolika maipapan iti Biblia nagbaliwen iti kasta unay kadagiti dadduma a pagpagilian a Katoliko kadagiti napalabas a sumagmamano a dekada. Dagiti natataenganen a Katoliko malaglagipda pay laeng dagidi al-aldaw idi a ti panagbasa ti Biblia ti malalais, no saan a makondenar a mismo. Kadagiti pagpagilian a kaaduanna ti Katoliko, dagiti gagangay a tattao ti mangmatmat iti Biblia a kas Protestante a libro a masapul a maliklikan.
Maipapan iti kasasaad idiay Francia bayat ti maika-18 ken maika-19 a siglo, ni Georges Auzou, propesor iti Sagrado a Kasuratan idiay Great Seminary idiay Rouen, Francia, ti nagsurat iti inanamongan ti iglesia a librona a La Parole de Dieu (Ti Sao ti Dios): “Saan a maparegta ti panagbasa iti Biblia. . . . Kinapudnona, malaksid kadagiti klero ken dadduma a grupo dagiti mamasirib, ti nasantuan a Libro saanen a basbasaen dagiti Katoliko. Daytat’ nagpukawen kadagiti [Katoliko] a paglakuan ti libro. Nagtultuloy a nagsaknap ti kapanunotan a ti Biblia ket maysa a napeggad ken saan pay a nasalun-at a libro . . . Daytat’ pudno a naiparit kadagiti kumbento dagiti mamadre ken kadagiti [Katoliko] a Kristiano nga institusion ti pagadalan.”
Kalpasanna nagbaliwen dagiti bambanag. Ni Mignot, obispo a Katoliko iti Fréjus ken Toulon, Francia, nagsurat iti introduksion ti Dictionnaire de la Bible (1891-1912) ni Vigouroux: “Pudno a masaksaksiantayon ti pannakaisubli ti panagbasa ti Biblia idiay Francia. Duapulo a tawenen a napalabas [dagiti salsaludsod iti Biblia] . . . paginteresan laeng ti limitado unay a grupo dagiti agdadamo. . . . Bumassit a bumassit ti panangipateg iti panagbasa ken panagadal iti Biblia. Dagiti kakasta a bambanag pulos a di mapagsasaritaan, ket no, maiparna, dadduma a napasmek a pasurot ti mangadaw iti Isaias wenno Proverbio, dagiti tattao ti mangmatmat kenkuana a buyogen ti panagsiddaaw ket suspetsaenda nga addaan iti nalimed a panagkiling iti Protestantismo!”
Iti sidong iti umad-adu nga ar-aramid dagiti sosiedad ti Biblia a Protestante, dagiti sursurat ti papa maipapan iti panagadal ti Biblia ti impablaak ni Papa Leo XIII idi 1893, ni Papa Benedict XV idi 1920, ken ni Papa Pio XII idi 1943. Ngem dagitoy a sursurat ti papa ad-adda nga addaan iti epekto kadagiti teologo ngem kadagiti Katoliko iti publiko.
Ti pudno a panagbaliw dimteng idi Maikadua a Konsilio ti Vaticana (1962-65). Kinuna ti konsilio: “Ti sagrado a Synod sipapasnek met ken nangnangruna a paregtaenna dagiti amin a Kristiano a matalek, nangnangruna dagiti Relihiuso, nga agsuro babaen ti kanayon a panangbasa iti nasantuan a Kasuratan kadagiti ‘nagsayaatan a pannakaammo ken Jesu-Kristo’ (Fil 3,:8). ‘Ta ti kinaawan pannakaammo iti Kasuratan ket kinaawan pannakaammo ken Kristo’ [kinuna ni Jerome].”
Gapuna, idi 1966 dagiti autor iti libro nga A Guide to Catholic Reading nabaelanda ti nagsurat: “Bayat ti adu a siglon ti gagangay a Katoliko pinatpatina ti Biblia kas maysa a nadiosan ti pannakaipaltiingna a libro ken, maikadua iti tradision, dayta ti gubuayan ti amin a sursuro a Katoliko. Ngem isut’ mabagbagaan met nga agannad a naimbag iti pamay-an ti panagbasana iti Biblia ken maparegta a mangbasa iti dayta iti sidong ti nasinged a panangaywan dagiti klerigo wenno relihiuso a panangiwanwan. . . . Nakaragragsak nagbaliw ti kasasaad iti kasta unay ket ita dagiti Katoliko maparegtadan, mabalakadandan, ken maallukoydan iti amin a dasig a mangbasa iti Libro dagiti Liblibro.”—Kuami dagiti italiko.
Dagitoy a naawad, a naala amin kadagiti inanamongan ti iglesia a sursurat, ipakitana a ti Biblia ket saanen a maiparit a libro para kadagiti Katoliko. Nupay kasta, kas ti imbaga ti naudi a naadaw, dagiti Katoliko masapul met nga iramanda ti tradision iti iglesiada. Daytoy ti nangpataud iti kabbaro a parikut para kadagiti adu a napasnek a Katoliko ken uray pay ti iglesia a mismo, kas makitatayonto iti sumaganad nga artikulo.