“Kanennak No Maituredmo!”

Uray pay ti managsida iti padada nga ikan maituredna, saan a nalaka para iti dayta. No maparurod, ti pufferfish pabussogenda ti bagida a pagbalinen a bola. Daytat’ mamagbalin a saan a nalaka ti mangalimon. Nupay kasta, no pabussogenda ti bagbagida, rinibribo a natatadem a naglungog a siit ti rummuar manipud iti abut ti kudilda. Ti panangalimon iti kasta a pagitudokan iti aspile ti mangipaay iti nakagatgatel a karabukob.

No amin daytoy saan a mangpasardeng iti managsida iti padana ket dayta ti agballigi a mangalimon iti puffer, mangrugin dagiti pakarigatanna. Ti pufferfish napunno iti tetrodotoxin. Ti tetrodotoxin isut’ maysa kadagiti kasasayaatan a sabidong iti danum.

Nupay kastoy, ti lasagna ti ipatpateg dagiti taga Dumaya a nalaing a mangilasin ti naimas a taraon. Awagan dagiti Hapones a fugu, dayta ti makilaw pay kas ti sashimi. Dayta papatayenna ti adu a tattao iti tinawen. Ti libro nga Undersea Life kunaenna:

“Nupay adda peggad, dagiti panatiko iti fugu nanamenda ti naamo a makapabileg a rikna, a napudot ken nalamiis a rikna, ken ti agariyamyam a rikna gapu iti ‘natimbeng’ nga isasamay ti sabidong, agraman ti di gagangay a raman ti karne. Ken uray pay no dagiti sintomas iti nakaro a pannakasabidong iti tetrodotoxin ramanenna ti panagling-et, sakit ti ulo, panagbakuar, pannakaparalisado ti pagangsan, panaglabaga ti kudil, panagpadara, ti nakaro a pannakapukaw ti puot, ken no dadduma ti pannakaparalisado ti piskel, makapasiddaaw a dagiti managayat iti sashimi dida agtalinaed laeng iti tuna ken ti sea bass.”​—Panid 180.