SIDS—Inaldaw a Pagam-amkan ti Naganak
“Ti kellaat, di namnamaen nga ipapatay iti nalawag a nasalun-at nga ubing nalabit isut’ kasasaeman ken makadadael a pasamak a mabalin a mangringbaw kadagiti agtutubo pay nga agasawa—kaskasdi kadagiti kagimongan iti Laud dayta met ti gagangay unay a kita ti ipapatay ti maladaga kalpasan ti umuna a lawas iti panagbiag.”—Propesor Bernard Knight, “Sudden Death in Infancy—The ‘Cot Death’ Syndrome.”
ALAS 4 t.b. idi iti Disiembre 22, 1984. Ni Ken Eberline simmirip iti kuarto tapno kitaenna no kasano ti kasasaad ti pito-bulan a ni Katie. Ti bassit a ni Katie isu ti inauna a pagpannakkel ken ragsak da Ken ken Tottie, nga addan kadagiti nasapa pay a 30’s. Ti ubing sitatalna a matmaturog. Pimmanaw ni Ken iti balay. Isut’ agbiahe iti nawatiwat a mapan idiay Las Cruces, New Mexico, a mangisuro iti maysa a seminar.
Bimmangon ni Tottie iti alas 7:30 t.b. ket napanna kinita no kasano ti kasasaad ni Katie. Nakaskasdaaw ti kinaulimek ni Katie. Kimmita manen ni Tottie, inarikapna, ket ammonan a dagus ti kadadaksan. Natayen ni Katie. Isut’ natay iti ipapatay iti kuna, wenno SIDS (Sudden Infant Death Syndrome). Daytoy a kellaat, naulimek nga ipapatay agsaksaknap kadagiti rinibribo a pampamilia iti tinawen.
Naasi a Medikal a Manangsukimat
Kasano ti panagtignay ni Tottie ken ni Ken iti pukawda? Imbaga ni Tottie iti Agriingkayo!: “Idi nabigbigkon ti napasamak, inawagak ti 911, ti serbisio ti emerhensia. Simmangpet dagiti paramedics ken ti polis a nagdardaras a kaduada ti maysa a medikal a manangsukimat. Nakaan-anusda unay ken naasi. Siempre, adda ti panagduaduak—ania ti naaramidko wenno naliwayak nga inaramid a nangpataud iti daytoy?
“Ti medikal a manangsukimat pinakalmana ti panagamakko. Inlawlawagna nga isu napukawna ti anakna iti kasta met laeng a kasasaad siam a tawenen ti napalabas. ‘Awan ti mabalin a maaramidam a manglapped iti dayta’ impanamnamana. ‘Uray pay no nakatakderka iti sibay ti kuna nga addaan iti monitor, mabalin nga isut’ saanmo a naisalakan.’ Innayonna: ‘Dika namnamaen dayta ket dika met malapdan dayta. Kadagiti dadduma a kaso, ti isuamin ti basta dagus nga agsardeng, ket ita awan pay ti pamay-an iti panangammo ti makagapu iti dayta.’ Siguradoak a dagiti komentona ti nangisalakan kaniak manipud iti adu a pammabasol ken ti panangpabasol iti bagik met laeng.”
Kasano a napagballigian ni Ken ken ni Tottie ti pukawda? Ti maud-udi nga artikulo ipakitananto ti sungbat dayta. Ngem addada dagiti dadduma a salsaludsod a tarigagayan ti tunggal naganak iti agtutubo nga ubing dagiti sungbat: Ania ti mangpataud iti SIDS? Addada kadi dagiti pagilasinan a pakdaar? Malapdan kadi dayta?