Panangmatmat iti Lubong

Vicario a Homoseksual

Ti agturay a synod iti Iglesia ti Inglatera ti nabiit pay a nangbotos a “maibusor iti pannakaisubli ti ‘pagalagadan ti Biblia’ iti moralidad” babaen ti panangipalubosna iti panagtalinaed dagiti miembro ti klero a homoseksual iti iglesia, kuna ti Daily Express iti Londres. Ti pangngeddeng ket agpaay a sungbat iti kalikagum ni Tony Higton, rector iti Hawkwell, Essex, a maikkatda. Sigun iti pagiwarnak, kinuna ni Higton a ti “homoseksualidad nagbalin a ‘nakaiyugalianen’ ti maysa a kolehio nga Anglicano ta dagiti estudiante manipud iti sabali a teolohikal a kolehio ti masapul a maparitan a bumisita.” Imbaga met ni Higton dagiti kaso “a sadiay ti klero ti masapul a maiyakar iti sabali a paruko kalpasan ti panangmolestiana iti ubing.” Ti synod, nupay kasta, “dina dinawat ti pannakaikkat dagiti bakla a vicario.” Imbes ketdi, dagiti klero naparegtada a mangtaginayon iti seksual a moralidad.

Agpabpababan ti Interes iti Relihion

“Umad-adu a taga Canada ti agkunkuna a didan ipangpangruna ti relihion,” kuna ti The Toronto Star. “Ket mammanon kadagidiay a kaykayatda ti tumabuno, ti kanayon a tumabuno iti simbaan.” Sigun iti maysa a report nga inruar ti maysa nga ahensia pederal, ti Statistics Canada, 10 porsiento kadagiti amin nga agsusueldo nga agtawen iti 15 wenno natataengan pay ti agkuna nga itan saandan nga ipangpangruna ti relihion, no idilig iti nakurang pay a 1 porsiento idi 1961. Ket 21 porsiento kadagidiay nga agkuna a nainaigda iti maysa a relihion ti mangamin a pulos a dida tumabuno kadagiti serbisio wenno gimgimong iti simbaanda.

Panamagbalin kadagiti Napuros a Sabong nga Agpaut

Anian a makapaupay no ti maysa a nagpintasan a bokey iti sabong malaylay ket magangon iti uneg laeng ti maysa wenno dua nga aldaw! Ti maysa a makagapu iti nasapa a pannakalaylay a ta dagiti ungkay dida agagsep a naimbag iti danum gapu iti callus, maysa a nalukneng a tisyu a maporma iti nakaputedan ti sabong. Ti inaldaw a pagiwarnak a Pranses a Le Figaro ipaayna ti sumaganad a balakad nga intukon dagiti dua a Pranses a managlako ti sabong: “Basta . . . putdenyo ti bassit a paset ti ungkay ti sabong iti murdong ti ungkay ket sukatanyo ti danum nga inaldaw.” Kasta met, isingasingda a ti “pananginayon iti sumagmamano a tedted iti Javelle a danum [maysa a solusion a pagkulada] ket mabalin a maaddaan iti makagunggona nga epekto a manglapped ti pannakalaylay” dagiti sabong.

Makarikna Pay Laeng ti Pannakabasol

Idi Mayo 5, 1945, bayat nga addada iti piknik ti maysa a Sunday-school idiay Bantay Gearhart idiay makin-abagatan nga Oregon, maysa a masikog a babai ken lima nga ubbing ti napapatay babaen iti maysa a bomba a balloon a Hapones. Dagitoy laeng dagiti tattao a natay bayat ti Gubat Sangalubongan II babaen ti panangatake iti kontinental nga Estados Unidos. Dagitoy nasarakanda ti nasileng a bomba a naikabit iti maysa a balloon a hydrogen a naaramid iti rice paper, ket bayat ti pananglikmutda iti dayta, daytat’ bimtak. Nupay no ti pasamak ket napasamak nasurok a 42 a tawtawenen ti napalabas, pito a Hapones a babbai a nakipaset iti panangaramid iti balloon ti nabiit pay a nangsapul iti panangagasda iti sakit ti nakemda babaen ti panangipatulodda kadagiti sursurat ti pannakipagrikna kadagiti pampamilia dagiti biktima. Nairaman kas simbolo iti kappia ken ti pannakaagas isu ti 1,000 a nakupkupin a papel a martinete. “Pulos a diak nagpungtot,” kuna ni Nyle Gifford, a natay ti anakna a lalaki iti panagbettak. “Kristianokami, ket manangpakawankami.”

Awanen!

Ni Maria Benita Olivera, 49, asawa ti maysa a mannalon iti San Juan, Argentina, nangipasngay iti maika-32 nga anakna nga awan ti napasamak, kuna ti pagiwarnak iti Brazil nga O Estado de S.Paulo. Dagiti umuna nga annakna, triplets, naipasngayda idi 13 pay laeng ti edadna. Kalpasanna, isut’ naaddaan kadagiti singin. Dupulo ket lima kadagiti annakna ti anakna iti umuna nga asawana ket ti pito kadagiti annakna ti anakna iti maikadua nga asawana. Ti maika-25 a kasangayna ti malaglagipna unay. “Agtartrabahoak iti talon, idi nariknak ti sakit ti panagpasikal,” linagipna. “Bukbukodko. Napanak iti maysa a kalapaw, naipasngay ti ubing, ket pinutedko ti sintas ti puseg babaen iti labaha.” Nupay kasta naikeddengen ni Maria nga isut’ addaan umdasen nga annak. Idi pumanawen iti ospital idi Agosto 20, 1987, kinunana: “Maysa pay ket matayakon. Bumaketakon.”

Umuna nga Elektroniko a Libro

Maysa a kompania nga Australiano ti nakapataud iti umuna nga elektroniko a libro. Basbassit ngem ti gagangay a credit card, dayta ti maiserrek iti maysa nga screen unit a kas iti kadakkel iti maysa a libro ti nobela a papel ti akkubna. Tunggal kard makalaon iti impormasion a kas iti kaadu ti malaon ti maysa a bassit nga enciklopedia. Maawagan iti Nalaing a Libro, dayta ti mamagbalin iti managbasa a makaawit iti kalalainganna a libraria bayat ti panagpasiarna babaen iti maysa a bag ket dayta ti nadisenio tapno nalaka nga usaren. Dagiti innem a buton iti screen unit ti mangipaay iti gundaway iti mangusar a mangbaliw iti kadakkel ti tipo, mangsapul kadagiti partikular a sasao, wenno mangmarka ti lugarna iti teksto. Ti report iti Sun-Herald iti Sydney kunaenna a ti alikamen ti mangpababa koma iti kasta unay a gastos iti panangipatulod kadagiti libro, makatulong iti panangitalimeng kadagiti bumasbassiten a kabakiran iti lubong, ken “balbaliwanna ti panaglako kadagiti liblibro iti aglawlaw ti lubong kadagiti umay a tawtawen.” Ipalplano ti kompania ti mangpataud ti Biblia nga umuna, agraman ti kumbinasion a diksionario/thesaurus.

Pumigpigsa ti Panangibturda iti Antibiotiko

Dagiti mangpatpataud iti sakit a bakteria pumigpigsa ti panagibturda kadagiti antibiotiko a mausar a manglaban kadakuada, kuna ti magasin nga Insight. Agarup 100 nga eksperto manipud kadagiti 30 a pagpagilian ti nairaman iti 1983-86 a panagadal. Nasarakanda a kadagiti adu a pagpagilian, manipud 20 agingga iti 30 porsiento “kadagiti nasaknap a klase ti bakteria a mangpatpataud iti diarrhea ken pneumonia ti naibturen kadagiti gagangay nga antibiotiko a kas ti penicillin ken tetracycline.” Kadagiti dadduma a kaso, dagiti kita a naibtur iti droga ti naiyakaren manipud iti maysa a pagilian a napan iti sabali. Inrekomendar ti grupo a nagadal a dagiti mangngagas mabalakadanda koma maipapan iti kabassitan nga epektibo a panangusar iti antibiotiko ket mapalagipanda a dagiti antibiotiko ket saanda nga agasan dagiti amin a saksakit.

Awan ti Natalged a Panagbilag

“Awan ti makuna a natalged a panagbilag,” kuna ni Dr. Darrell S. Rigel, iti New York University School of Medicine. Tinawen, idiay Estados Unidos, nasurok a 500,000 a kaso iti kanser ti kudil ti maipadamag. Kadagitoy, 90 porsiento ti makuna a patauden ti di makita nga ultraviolet a raya ti init. Ipadamag ti The Mexico City News a nupay no “dagiti tattao a makset ti kudilda gapu iti pannakabilag ti ad-adda a makapataud iti kanser, . . . ti silnag ti init makadadael ti kudil uray pay no dayta saan a makset.” Kaskasdi, “patien dagiti tattao a dayta ti saan a mapasamak kadakuada,” kuna ni Dr. Richard Odom, presidente iti American Academy of Dermatology. Dagiti iskrin ti init, kas kadagiti lotion a kemikal nga addaan iti napigsa a pannalaknib iti init, ti mairekomendar. “Dikayto maisubli ti nadadaelen, ngem masalaknibanyo ti bagiyo a maibusor iti masanguanan a pannakadadael,” kuna ni Dr. Rigel.

“Ibebelleng a Sosiedad”

Dagiti estadistika nga inruar ti Office of Population Censuses and Surveys iti Britania ipalgakna ti umad-adu a saan a kinatalged ti panagasawa. Ti bilang dagiti damo a panagasawa bimmaba manipud 343,600 idi 1971 agingga iti 253,000 idi 1986, ket dagiti diborsio nagpangato manipud 74,400 agingga iti 153,900. Ti kaadu dagiti bastardo ngimmato met manipud 1 iti 18 a naipasngay idi 1971 agingga iti 1 iti 5 a naipasngay idi 1986. Maysa iti tunggal 50 a babbai nga agtawen iti 16 agingga iti 24 ti naaddaan iti aborsion, ket dua a kakatlo kadagiti amin a pasiente ti aborsion ti saan a naasawaan. Ni Propesor Richard Whitfield, tsirman iti National Campaign for Family, agsennaay: “Agbibiagtayo iti kita ti ibebelleng a sosiedad a sadiay dagiti relasion dagiti tattao ti ad-adda a makita a maibelleng a kas iti maysa a kotse wenno maysa nga alikamen iti balay.”

“Suites” iti Pagbaludan?

Ti maysa a rabii iti maysa a pagbaludan idiay Australia itan ket aggatad iti agarup kas met laeng ti gastos iti maysa a five-star nga otel, kuna ti The Courier-Mail, maysa a pagiwarnak nga Australiano. Ti inaldaw a pagdagusan iti pagbaludan itan aggataden iti agarup A$100 ($70, E.U.) ket mabalin nga agpangato agingga iti $400 a maipaay iti kadakkelan a kinatalged dagiti balud. Dagiti tallo a naluho nga otel idiay Melbourne addaandan iti ngina a $110, $120, ken $135 iti maysa a rabii. Maysa a pannakangiwat iti Institute of Criminology ti nagkuna a ti populasion dagiti balud idiay Australia ngimmato ti kasta unay idi napalabas a sumagmamano a tawen. Intudona a ti maysa a balud a mangikarkaro iti sentensia nga agingga iti tungpal-biag (iti promedio, a 15 a tawen) ti paggastuan ti managbayad ti buis iti nasurok a $500,000. Ti pannakaseknan kumarkaro maipapan iti “five-star” a presio maipaay kadagiti balud iti pagbaludan.