Pribado! Maiparit umuneg! Maiparit Makipagna!
TI TAO aramidenna ti inggat’ kabaelanna a mangsalaknib ti panagsolsolona. No dadduma agibangon kadagiti nangangato a pader iti aglawlaw iti sanikuana tapno maipasigurado ti panagsolsoloda. Dadduma ipasdekda dagiti pagtaenganda kadagiti tuktok ti bantay wenno iti kaunggan dagiti kabakiran wenno minilmilia ti kaadayuna manipud kangrunaan a kalsada tapno makasolsoloda. Dagiti agnanaed iti siudad ket agabangda kadagiti apartments kadagiti kangatuan a grado, saanda a pailista ti numero ti teleponoda, ken ilimedda ti kinataoda babaen ti panagusar kadagiti sabali a nagnagan wenno agisuotda kadagiti panglimlimo.
Ti panagsolsolo kaipapananna ti nagduduma a bambanag iti nagduduma a tattao. Ti asawa a babai mabalin a tarigagayanna ti panawen nga agbukbukod nga adayu ken ni lakayna, a mapalubosan nga agmaymaysa. Uray met dagiti assawa a lallaki, no maminsan ipapilitda ti kabukbukodanda a “panawen ken espasio.” Uray dagiti babassit nga ubbing tarigagayanda ti panagmaymaysada. Masansan a ti kuarto a kabukbukodanda irepresentarna ti maysa a mapagkamangan iti panagsolsoloda.
Adda dagidiay mangikabit iti sabali nga alambre iti teleponoyo ket denggenda dagiti pribado unay ken nasinged a panagsasarita iti pagtaengan wenno opisinayo. Ti tunggal tignayyo ket mabalin a masiim kadagiti silsiledyo idiay eskuelaan, kadagiti pabrika, ken opisina ket mairekord iti video tape. Babaen iti panagusar kadagiti laser beams a naipaturong idiay ruar ti sarming ti tawayo, ti panagpapatang idiay uneg ket mabalin a piduten ken irekord iti panagallingag nga adda idiay lansangan. Dagiti kompiuter maus-usarda met itan a mangsiim iti ar-aramidyo kadagiti panggedanyo. No aniat’ isursuratyo iti makinilia ti opisinayo ket mabalinen a mabasa babaen iti maysa a pagsiim uray no adda iti sumagmamano a milia ti kaadayuna babaen kadagidiay adda ibubusorda kadakayo gapu kadagiti bambanag nga isursuratyo. Uray ti kinasipnget ket saanen a garantia iti panagsolsolo. Babaen iti kamera nga agtignay a sieepektibo uray iti kinasipnget, tunggal tignayyo matunton bayat ti panaggarawyo iti ruar iti rabii. No sakiten ti nakemyo a lukatan ti asawayo ti surat a naiturong kadakayo, ania ti riknayo kadagidiay salungasingenda ti panagsolsoloyo babaen ti panangbasada kadagiti sursuratyo uray no saanda a luklukatan dayta?
Mabalin a sakiten ti nakemyo ti lumasat babaen ti detektor ti panagulbod tapno maipaseguro ti panggedan. Ngem ti umas-asping a panangsuot ti mabalin a maited kadakayo idiay sabali a lamisaan babaen ti managinterbiu a dikayo pay mapupuotan dayta babaen ti panangusar iti paganalisar ti timek, a kunada a mabalin a makabigbig no ibagbagayo met laeng ti kinapudno.
Dagiti negosio ken dadakkel a korporasion mapukpukawda dagiti kangrunaan a palimedda babaen ti pannakaraut iti panagsolsoloda babaen kadagiti kakompetensiada nga awanan prinsipio. Kas resulta iti nangato ti teknolohiana a sistema ti panagsiput a napatanor kadagiti nabiit pay a tawtawen, ngangngani imposible kadagiti nasnasion ken kadagiti pannakabalin ti lubong a di maraut dagiti nasional a panagsolsoloda babaen kadagiti nasnasion uray sumagmamano a lubong ti kaadayuda. Dagiti satelait nga espia iti tangatang a nakabalan kadagiti napipigsa a kamera maretratoda uray pay manipud makinruar a law-ang ti nagbassitan a banag kas iti baseball ket mailasinda ti maysa a tao iti dakkel a bunggoy uray babaen laeng iti langa ti barbasna.
Nakalawlawag a ti panagsolsolo ti tao, “ti kasasaknapan ti saklawen kadagiti kalintegan ken ti kalintegan nga ipatpateg unay dagiti sibilisado a tattao,” ket maysa a wayawaya a sipapartak nga agpegpeggad, kas ipakita ti sumaganad nga artikulo.