Ti Bagi—Nakaskasdaaw Pannakaaramidna Tapno Tagiragsakenna ti Biag!
DAGITI sientista bigbigenda a ti natauan a bagi nakaskasdaaw ti pannakaaramidna, pudno a pagsidsiddaawan ti diseniona ken ti pannakabukelna. No dagiti amin a paspaset ti bagitayo ket normal ti panagtrabahoda, makaaramidtayo ken matagiragsaktayo dagiti bambanag a naan-anay a nakaskasdaaw.
Kas pangarigan, matmatanyo dagiti im-imayo. Nakasaysayaat ti pannakaaramidda a mangaramid kadagiti adu a bambanag iti panagtrabaho wenno iti panagay-ayam. Ita a mismo, ig-iggaman kadi dagiti im-imayo daytoy a magasin a basbasaenyo? No kasta, ngarud dagiti takkiagyo ti mapilko iti umiso nga anggulo tapno ti magasin ket umiso ti kaadayuna kadagiti matayo. Dagiti ramramayyo mangipapaayda iti kasapulan a pigsa a manglapped iti pannakatinnagna manipud iti im-imayo. Ket tengtenglen ti utek dagidiay a ramramay tapno aramidenda ti apag-isu a tarigagayanyo nga aramidenda no ukagenyo ti panid. Anian ti pannakaikapistayo no awan dagiti im-imatayo!
Nairaman met dagiti matayo iti panangbasa kadagitoy a panid. Maysa a nakaskasdaaw a sangal dagiti nerbio ken dagiti dadduma a paset iti bagi ti agtignay a mangiladawan kadagiti sasao ken ladladawan iti panid tapno makita ti mata ket kalpasanna agturong iti utek. Dagiti elektrikal a tignay a patauden ti mata ket maipan iti utek, isu a pakausaranda a mangporma kadagiti makita a banag a maitupag iti ladawan iti panid. Anian a nakapatpateg ti panagkitatayo, ket anian a nakalkaldaang no mapukaw dayta!
Ti utek ti tao agdagsen laeng iti agarup tallo a libra ket bassit laeng ta umdas a mapetpetan. Ngem nakaskasdaaw dayta, maysa kadagiti karirikutan a naparsua iti uniberso. Daytat’ mamagbalin kadatayo a makapanunot, makakita, makarikna, makasao, mamagtutunos kadagiti panaggarawtayo. Pagyamanan itoy a nakarikrikut ti pannakaaramidna nga utek, mabalintayo a tagiragsaken ti napintas nga ilelennek ti init, dagiti naiimas a taraon, ti nalamuyot a pul-oy iti kalgaw a maipul-oy iti rupatayo, dagiti nakatantan-ok a buya dagiti makakayaw a bambantay, ti panagkatawa ti maysa nga ubing, ti banglo ti maysa a sabong, ti panangapros ti maysa nga inay-ayattayo—ken ad-adu pay ngem daytoy nga awanen ti aniaman a panagpampanunot iti biangtayo. No awan daytoy nakaskasdaaw nga utek naan-anay nga awan ti matagiragsaktayo.
Anian nga umiso unay dagiti sasao ti salmista: “Nakaam-amak ken nakaskasdaaw ti pannakaaramidko”!—Salmo 139:14.
Kaskasdi, uray pay adda daytoy a nagsayaatan nga alikamen, dumteng ti tiempo a ti bagi madadael kamaudiananna. Agsakittayo ken lumakay/bumakettayo, ket kalpasanna mataytayo. Adu unay dagiti dakes a bambanag iti lubong nga aglawlawtayo ta uray pay no nasalun-attayo, ti panangtagiragsaktayo iti biag ket mapabassit. Dagitoy kadi a di makaayayo a kasasaad addadanto nga agnanayon? Wenno dagiti kadi bagitayo pudno a nadisenioda nga agpaut iti agnanayon—nga awan ti panangparigat ti sakit, panaglakay/panagbaket, ken ipapatay—ket tagiragsaken iti agnanayon ti biag ditoy daga iti naan-anay a pamay-an ngem ti aniaman a mapadpadasantayo itan?
Ti Agriingkayo! usigennanto dagitoy a bambanag kadagiti tallo a bilang kadagiti umay a bulbulan. Iti daytoy umuna a paset, salaysayenminto ti sumagmamano laeng maipapan iti nakaskasdaaw a paspaset ti bagitayo: ti ima, ti mata, ken ti utek.