Sino a Talaga ti Addaan ti Solusion ti Parparikut ti Sangatauan?

“INA ti sangatauan”​—kastoy ti panangdepinar ni Juan Paulo II ken Maria iti nabiit pay nga enciklikal a suratna, isu a mangikallangugan kadagiti sasao ti Maikadua a Konsilio ti Vaticana. Adu a Katoliko ti mamati a ni Maria sursurotenna ken tultulonganna ti tunggal manamati, a tumultulong kadakuada iti tunggal kanito iti panagbiagda. Gapu itoy a rason, adu kadakuada ti sipapasnek a dumawat ti pannalaknibna. Makumbinsirda nga iti adu nga okasion ti “Madonna” ket direkta a bimmallaet a mangbalbaliw ti kurso iti ar-aramid ti tao.

Sigun iti libro nga Un anno di grazia con Maria (Tawen iti Gracia a Kadua ni Maria), naidaton dagiti karkararag ken Maria kadagitoy a sasao: “Laglagipem, O manangngaasi a Birhen Maria, a pulos a saan pay a naibagbaga ditoy lubong a dagidiay a mangsapsapul iti pannalaknibmo, nga agpakpakaasi iti tulongmo, ken dumawdawat iti panangsuportarmo, ket binaybay-am.” Nakapatpateg a ti dua kadagiti pipiesta ni Maria nga adda iti “kalendario dagiti ritual”​—dagidiay managanan iti “Nagan ni Maria” ken iti “Maria iti Rosario”​—ipalagipda dagiti panagballigi a nagun-odan ti militaria, pagyamanan iti naipagarup nga ibaballaet ni Maria. Pagarupentay ngarud, aya, a ni Maria ket nasionalistiko?

Gagangay laeng ken kaawatan ti panangsapul ti tulong ken pannalaknib ti maysa a makabael a tumulong kadatayo iti panangrisot ti parparikuttayo. Ngem maitunos aya iti pagayatan ti Dios ken ti Biblia ti panangikabil iti panagtalek ken ni Maria, a dumawat kenkuana ti tulong?

Sino ti Addaan ti Solusion?

Dagiti pakadanagan ken dagiti pagbutbutngan iti kaputotantayo ket, kas naibagan, mairaman kadagiti rason iti panangiwaragawag ti papa iti Marian Year. Ti Iglesia Katolika inanamaenna a babaen ti panangiturong dagiti tattao iti is-isipda ken Maria, ti talna ken panagtutunos agsublinto iti sangatauan ket, ti maysa a teologo a Katoliko nagsurat nga, “iti kastoy a pamay-an ti pudno a drama daytoy a lubong marisotto.”

Uray pay ni Jesus iti maysa a nalatak a padtona isut’ nagsarita maipapan iti tiempo inton ti tao “mataydanto gapu iti butengda nga agur-uray iti mamagpeggad iti lubong.” (Lucas 21:25, 26, The Jerusalem Bible) Dagiti pammaneknek iti historia ipamatmatna a ni Jesus tuktukoyenna ti tiempotayo. Agbibiagtayon “iti maudi nga al-aldaw.” (2 Timoteo 3:1-5, JB; Mateo, kapitulo 24; Lucas, kapitulo 21) Adda kadi ruaran iti daytoy a napeggad a kasasaad? Iti siasino ti pagtalkantayo tapno makasaraktayo ti sulusion iti makariribuk a parparikut ti sangatauan? Ikabiltayo kadi ti panagtalektayo ken ni Maria?

Ti Pudno a Solusion

Nakalawlawag ti Dios maipapan iti banag. Iti Saona, ti Biblia, kunaenna a ditay agtalek iti lalaki wenno babai. (Salmo 49:6-9; 146:3) Ti pammalakadna kadagiti agsagsagaba ket: “Agtalekkayo ken ni Jehova iti agnanayon, ta ken ni Jah Jehova, maysa a bato nga agnanayon.”​—Isaias 26:4.

Ngem kasano ti panangrisot ni Jehova a Dios iti parparikut ti sangatauan? Babaen iti gobiernona, ti Pagarianna iti im-ima ni Jesu-Kristo. Daytoy isu ti Pagarian nga insuro ni Jesus nga ikararag dagiti tattao iti kararag nga “Amami.” (Mateo 6:9, 10) Adda iti panunot ni Jesus ti Pagarian idi, iti panagsaritana maipapan iti narikut a kasasaad “ti maudi nga al-aldaw,” kinunana: “Ngem inton dagitoy a banag mangrugida a maaramid, kumitakayo ket itangadyo dagiti ul-uloyo, ta ti pannakasubbotyo umasidegen.”​—Lucas 21:28-32.

Anianto ti ibanag daytoy a Pagarian? Addanto kadi ti sangalubongan a pannakakumberte dagiti amin a tattao, kas iti ninamnama dagiti dadduma a movimiento a Katoliko? Awan, nalawag ti Biblia iti daytoy a punto. Impamatmat ni Jesus a saan nga amin ket maisalakanto, wenno addanto pay ti pangkaaduan a pannakakumberte dagiti tattao. Sinaritana ti maymaysa a “dalan nga agturong iti biag” ket kinunana a “mammano” ti makasarak iti dayta.​—Mateo 7:13, 14.

Ti Pagarian ti Dios bumallaetto a mangpukaw a naan-anay iti parparikut ti sangatauan, kas dagiti gubgubat, kinakurang ti taraon, saksakit, krimen, di umiso a panangituray, ken ti polusion. (Salmo 46:9; 67:6; Proverbio 2:22; Isaias 33:24; Daniel 2:44) Iti sidong dayta a turay ti Pagarian, addanto ti “kinaruay ti talna.” (Salmo 72:7) Daytoy ti nadiosan a solusion a maipaay iti parparikut ti sangatauan, ket kas kunaen ti Biblia: “Nagasat ti tao nga agkammatalek ken Jehova ket ti talgedna ni met laeng Jehova.”​—Jeremias 17:7.

Saan a babaen ti panangikabil iti panagtalektayo iti maysa a natauan a parsua a kas ken ni Maria, kasano man ti kinamatalekna, a mainanamatayo a makita ti solusion iti nakaskasdaaw a parparikut ti lubong. Nasken nga ikabiltayo ti panagtalektayo ken Jehova, babaen ken ni Kristo Jesus, ket awatentayo ti pamay-anna a mangpalinteg kadagiti bambanag. Ti kinaragsak dumteng laeng babaen iti Pagarian ti Dios.

Ngem ania a pudno daytoy a Pagarian? Kasano ti panagandarna? Ania dagiti makita a resulta a pinataudnan? Mabalin a maammuanyo babaen ti panagimtuodyo kadagidiay a nangiyeg kadakayo itoy a magasin.

[Ladawan iti panid 10]

Ti Pagarian ti Dios babaen ni Kristo Jesus isu ti solusion iti parparikut ti sangatauan