Manipud Managbasatayo

Dagiti Pit Bull

Gagangay a masarakak a nasayaat ti pannakasirarak dagiti magasinyo, gapuna nasdaawak a makadlaw iti biddut iti “Apay a Dadduma Nauyongda ket Dadduma Naamoda” (Marso 22, 1988). Ti aso a naawagan Pete iti Our Gang ket saan a maysa a pit bull ngem maysa nga Americano a bulldog. Awan dagiti puraw a pit bull nga addaan kadagiti “nangisit a matmata”; ti aso a nailadawan iti panid 26 ket saan nga Akita; awan dagiti agresibo nga aso, no di ket dagiti agresibo a mangtaraken. No “agmauyong” ti aso, biddut dayta ti mangtartaraken.

D. H., Federal Republic of Germany

Ti gubuayan ti impormasion nga (“Sports Illustrated”) kunaenna a ti nangisit nga aglawlaw iti mata ni Pete ti “maysa laeng a trabaho ti make-up artist.” Itakderanmi ti panangilasinmi iti maysa nga Akita a nairaman iti grupo a nailadawan. Dagiti komento dagiti managbasa iti baba mabalin a saklawenna dagiti dadduma a punto a dinakamatyo.​—ED.

Kas maysa a nasayaat a paglinglingayan, mangsanayak kadagiti pit bull, ket ammok manipud iti kapadasak iti adun a tawtawen a dadduma a pit bull ti narigat nga iturong, ket kadagiti dadduma a kaso mabalin a “napeggadda.” Ngem saan a daytoy ti kangrunaan a personalidad dagitoy nga aso​—ti kababalin ti aso ket “sanayen” ti mangtartaraken. Umanamongak iti artikulo iti 100 a porsiento. Nupay kasta, dadduma a nakabasa iti dayta ti agkuna a ti artikulo ipaganetgetna a dagiti pit bull ket “naipasngayda a mammapatay” ken “kriminal manipud iti pannakaipasngay” nga awan ti mailaklaksid. Tarigagayak a buyogen iti amin a panagraem a pagbalinenyo a nalawag daytoy a punto, ta adu ti aglablabes maipapan iti daytoy a puli kalpasan ti panangbasada ti artikulo.

D. Q. H., Costa Rica

Imparangyo ti material iti pamay-an a makatulong kadagiti tattao a mangawat iti kinapateg ti kababalin dagiti amin nga aso, agraman ti nasken a paset ti mangtartaraken. Kas mangtartaraken kadagiti pit bull, nasarakanmi a babaen iti umiso a panangsanay, ti maysa a pit bull mabalin nga agbalin a nakaay-ayat a taraken. Ngem diak pagarupen a ti siasinoman nga addaan iti aso a taraken ket mabalinna a kunaen, “Isut’ di kumagat,” ta dagiti animal ket animal. Ditay maipadto dagiti kababalinda.

C. S., United States

Babaen iti kasta unay a panangipablaak ti pagiwarnak maipapan kadagiti pit bull, nasayaat ti makabasa iti natimbeng nga artikulo a mangipakpakita iti adu a parikut a maigapu kadagiti manangabuso a mangtartaraken (dadduma ti pudno a mangpakan kadagiti asoda iti burbura ken/wenno dagiti nagragadian ti metal) ken ti di natimbeng a panangpaadu, a mabalin a dagitoy ti mamataud iti saan a kinatalged iti aniaman a puli ti aso.

S. S., United States

Panagtalaw

“Ti Kadi Panagtalaw ti Sungbat?” (Marso 22, 1988) saritaenna ti maysa a 14-años nga ubing a babai a nagtalaw gapu ta isut’ awanan iti nasinged a relasion kadagiti dadakkelna ket mariknana a dina mabalin ti makisarita kadakuada. Mariknana nga awan ti siasinoman a makaawat kenkuana. Maysaak a 14-años, ket nabiit pay naaddaanak iti isu met laeng a kapadasan a kas iti kapadasan ni Amy iti artikulo. Pimmanawak iti pagtaengan ket napanak kadagiti gagayyemko gapu iti isu met laeng a rason. Ti laeng nagdumaan iti estoriami ket saanak a nakidenna ken nagtomar iti droga. Iti dayta met laeng a rabii nga ipapanawko, immaydak innala dagiti dadakkelko. Napankami kadagiti panglakayen iti kongregasion ket nagsasaritakami. Agtitinnulongkami itan ket ammokon nga adda sadiay dagiti dadakkelko a maipaay kaniak. Ammok a maawatandanto ti aniaman nga ibagak kadakuada. No nabasak koma a nasaksakbay daytoy nga artikulo, mabalin a diak koma nagtalaw.

A. B., United States